“Kon kami mag-away, mosumbong ang akong asawa ngadto sa iyang ginikanan. Dayon tawgan ko sa iyang amahan ug tambagan. Wala ko makaangay niana!”—James. *

“Ang akong ugangang babaye kanunayng moingon, ‘Gimingaw kaayo ko sa akong anak!’ Mosulti siya nako nga suod kuno kaayo sila, nga mora na hinuon ug sad-an ko sa pagminyo sa iyang anak nga nakahatag kaniya ug kaguol!”—Natasha.

Ang problema labot sa ugangan malikayan kaha nga mahimong problema sa kaminyoon?

Ang kaminyoon makamugnag bag-ong pamilya. Ang Bibliya nag-ingon nga ang lalaki nga magminyo “mobiya sa iyang amahan ug sa iyang inahan ug moipon sa iyang asawa.” Mao man usab ang asawa. Ang Bibliya nag-ingon nga dihang ang babaye magminyo, ang duha mahimong “usa ka unod.” Sila usa ka bag-ong pamilya.—Mateo 19:5.

Ang imong kaminyoon maoy una kay sa imong ginikanan. “Usa sa labing importante sa magtiayon mao ang pagbatog kaisipan nga ‘usa lang sila,’” misulat ang magtatambag sa kaminyoon nga si John M. Gottman. “Aron mobati nga usa gayod kamo sa imong kapikas, kinahanglang maglain kamog puyo aron malayo gikan sa inyong mga pamilya.” *

Ang ubang ginikanan maglisod sa pagpasibo. Usa ka bana miingon: “Sa dalaga pa, unahon gayod sa akong asawa ang kagustohan sa iyang mga ginikanan. Dihang naminyo na kami, nakita sa iyang inahan nga ako na ang iyang ginauna. Naglisod siya pagdawat niana.”

Ang ubang bag-ong minyo nalisdan usab. “Ang pagkabaton ug ugangan dili parehas sa pagkabaton ug mga higala nga ikay nagpili,” miingon si James nga gihisgotan sa sinugdan. “Sama ra kinig dunay nag-ingon, ‘Gusto ka man o dili, duna ka nay duha ka bag-ong higala.’ Bisag sila makalagot, sila imo nang pamilya!”

Kon ikaw ug ang imong kapikas dunay problema labot sa ugangan, pagtinabangay kamo sa pagsulbad niana. Sunda ang tambag sa Bibliya nga “pangitaa ang pakigdait, ug sunda kini.”—Salmo 34:14.

Aron masunod kana, tagda ang mosunod nga mga situwasyon. Kini gipresentar sumala sa panglantaw sa bana o sa asawa. Pero matag usa kanila mahimong dunay problema sa ilang masigka-ugangan, ug ang mga prinsipyo nga gihisgotan makatabang kanimo sa pagsulbad sa mga problema labot sa ugangan.

Ang imong asawa gustong masuod ka sa iyang inahan. Pero morag lisod ikasabot ang iyang inahan.

Himoa kini: Hisgoti ang problema uban sa imong asawa, ug pakitai siya ug konsiderasyon. Ang problema dili kon unsay imong gibati sa imong ugangang babaye kondili kon unsay imong pagbati sa imong asawa—ang tawo nga imong gisaaran nga higugmaon. Sa inyong panag-estoryahay, pangitag usa o duha ka espesipikong mga paagi sa pagpauswag sa imong relasyon sa iyang inahan, ug himoa kana. Dihang makita sa imong asawa ang imong paningkamot, ang iyang pagtahod kanimo modako.—Prinsipyo sa Bibliya: 1 Corinto 10:24.

Ang imong bana miingon nga mas gipalabi nimo ang imong ginikanan kay kaniya.

Himoa kini: Hisgoti kini nga problema uban sa imong bana, ug sabta ang iyang panglantaw. Siyempre, dili mabalaka ang imong bana kon nagpakita ka lang ug nahiangayng pasidungog sa imong ginikanan. (Proverbio 23:22) Bisan pa niana, tingali kinahanglan lang nimo siyang pasaligan—sa pulong ug buhat—nga una siya sa imong kinabuhi kay sa imong ginikanan. Kon mapasaligan ug ingon niana ang imong bana, lagmit dili na siya mobati nga nakigkompetensiya siya sa imong ginikanan sa imong atensiyon.—Prinsipyo sa Bibliya: Efeso 5:33.

Ang imong asawa mangayog tambag sa iyang ginikanan imbes kanimo.

Himoa kini: Pakig-estorya sa imong asawa, ug pagtakda kamog limitasyon. Magmakataronganon. Sayop ba gayod nga makig-estorya ug ginikanan bahin sa usa ka problema? Kanus-a ka angayng moduol kanila? Kon kamo duna nay nasabotang mga limitasyon, dili kini mahimong problema.—Prinsipyo sa Bibliya: Filipos 4:5.