Nganong nahimo kang pianista?

Ang akong ginikanan mga pianista. Gisugdan ko nila pagtudlo sa singko anyos pa ko. Dayon, mieskuyla ko sa advanced school of music sa Tashkent.

Nganong lisod magtugtog ug piano nga may duyog nga orkestra?

Walay orkestra nga parehas. Sama kini ug dagko nga mga instrumento sa musika nga “patugtogon” sa konduktor niini. Tingali ang kinalisdan para sa solowista mao ang pagpakighiangay sa konduktor. Sama kini ug managhigala nga nag-estoryahanay—imbes usa lang ang magsige ug sulti, kinahanglang hatagan pod niya ug higayon ang usa. Kasagaran, kas-a o kaduha lang sila magpraktis aron sila magkahiangay.

Pila ka oras ka magpraktis?

Labing menos tulo ka oras kada adlaw—ug dili lang ko basta magpraktis sa lisod tugtogon nga bahin sa pisa. Tun-an usab nako ang pagkahan-ay sa pisa—pero dili nako kini tugtogon. Mamati usab ko sa uban pang pisa sa kompositor, nga makatabang nako sa pagsabot sa pisa nga akong gitun-an.

Unsay magpaila nga ang usa hawod nga pianista?

Kon “mapaawit” niya ang piano. Ingon niini kini: Ang piano tugtogon pinaagig pagtapoy. Inigtapoy sa tekla, ang sound magkaawop, dili sama sa sound sa huyponong mga instrumento o kaha sa tingog sa tawo nga mapadugay o mapakusgan. Kinahanglang tun-an ug maayo sa pianista kon unsaon nga dili dayon moawop  ang sound sa nota. Iyang himoon kini pinaagi sa hanas nga paglihok sa iyang mga tudlo ug pulso, ug sa tayming nga pagtunob sa tuo nga pedal nga magpadugay sa sound sa usa ka nota ug magpausab sa tunog niini. Kon mahanas na ang pianista niining lisod nga mga teknik, makahimo siya sa pagpatingog sa piano nga morag plawta, trompeta, o bisan orkestra. Mahimong mapatingog usab kini sama sa kinamaayohang instrumento sa tanan—ang tingog sa tawo.

Klaro nga gusto kaayo kag musika.

Para nako, ang musika makapahayag sa mga pagbati nga lisod o dili gayod ikapahayag sa pulong.

Nganong nainteres ka bahin sa Diyos?

Daghan kamig libro sa balay, nga gidala ni Papa gikan sa Moscow. Ang libro nga nakapainteres gyod nako naghisgot sa mga estorya sa Bibliya bahin sa sinugdanan sa tawo ug sa kaagi sa mga Israelinhon. Nabasa usab nako ang librong Ikaw Mabuhing Walay Kataposan sa Paraiso sa Yuta, nga giimprenta sa mga Saksi ni Jehova. * Nainteres kaayo ko sa tin-awng pagkapresentar niini sa mga pagtulon-an sa Bibliya. Pag-adto nako sa Spain niadtong 1991 aron magtuon ug music, akong gidala kini nga libro ug daghang beses ko kini gibasa. Akong nakaplagan ang pagtuo nga dili lang tinukmod sa emosyon kondili sa makapakombinsir nga mga pamatuod.

Ang pagtulon-an nga nakapainteres kaayo nako mao ang saad sa Bibliya nga ang tawo puwedeng mabuhi sa walay kataposan dinhi sa yuta. Kini makataronganon pamation! Niadtong panahona wala pa ko makahimamat ug Saksi ni Jehova. Pero nakaingon ko nga kon makahimamat gani kog Saksi, magpa-Bible study ko.

Sa unsang paagi nimo nahimamat ang mga Saksi?

Pipila ka adlaw human ko makadesisyon nga magpa-Bible study, nakakita kog duha ka babaye nga nagdalag Bibliya. Nakaingon ko nga sila kadtong mga tawo nga akong nabasahan sa libro. Sila nagsangyaw sama sa mga Kristohanon panahon sa Bibliya. Wala madugay, nagpa-Bible study ko sa mga Saksi. Karon malipayon kaayo ko sa pagtabang sa uban sa pagkat-on bahin sa atong Maglalalang.

Nganong nakombinsir ka nga dunay Diyos nga ateyista man ka kaniadto?

Tungod sa musika. Halos tanang tawo makaapresyar ug musika, samtang ang mga mananap dili. Ikapahayag sa musika ang kalipay, pagsalig, pagmahal, ug halos tanang emosyon. Kita madala gyod sa tempo sa musika. Pero gikinahanglan ba nato ang musika aron mabuhi? Kini ba gikinahanglan sa gitawag sa mga ebolusyonista nga “survival of the fittest”? Morag dili. Para nako, dili katuohan nga ang utok sa tawo, nga may katakos sa pagkomposo ug pag-apresyar ug musika sama nianang kang Mozart ug Beethoven, mitungha pinaagig ebolusyon. Mas katuohan ang pag-ingon nga ang atong utok gilalang sa maalamon ug mahigugmaong Diyos.

Unsay nakapakombinsir nimo nga ang Bibliya pulong sa Diyos?

Ang Bibliya maoy koleksiyon sa 66 ka basahon nga gisulat sa mga 40 ka tawo sa kapig 1,600 ka tuig. Ako nakapangutana, ‘Kinsay naghikay nga masulat kini nga obra maestra?’ Walay lain kondili ang Diyos. Para nako, ang Bibliya samag pisa sa orkestra nga maayong pagkahimo, maayong pagkahan-ay, ug dunay makapatandog nga mensahe para sa tanang tawo.