Nakadungog ka na bag mga komento nga sama niini? Nahibalo ka ba nga ang mga teksto sa Bibliya nga lisod sabton, Bibliya ra gihapoy makapatin-aw? Ang yawi mao kini: Kon ang palibot nga mga teksto dili makapatin-aw sa kahulogan sa partikular nga gihisgotan, itandi kana sa ubang teksto sa Bibliya nga naghisgot sa mao gihapong ulohan. Niining paagiha, ang Bibliya maoy naghatag ug interpretasyon, dili kita.

Tagda pananglitan ang doktrina sa Bibliya bahin sa kahimtang sa mga patay. Makita sa ubos ang unom ka teksto nga gikutlo gikan sa lainlaing bahin sa Bibliya. Imong makita nga kini nagkauyon.

• “Ang mga patay dili na makadayeg sa GINOO, o ang nanaog ngadto sa yuta sa kahilom.”—Salmo 115:17. *
• “Ayaw pagsalig sa mga prinsipe, ni sa anak sa tawo, kay sila dili makatabang. Ang iyang gininhawa mogula, mobalik siya sa iyang yuta; nianang adlawa mahanaw ang iyang hunahuna.”—Salmo 146:3, 4.
• “Ang mga buhi nasayod nga sila mangamatay: apan ang mga patay wala nay mahibaloan bisan unsa.”—Ecclesiastes 9:5.
• “Ang lubnganan dili makadayeg kanimo, ang kamatayon dili makahimaya kanimo ... Ang buhi, ang buhi, siya magdayeg kanimo, ingon sa akong pagdayeg kanimo karon.”—Isaias 38:18, 19.
• “Ang kalag nga makasala, kini mamatay.”—Ezequiel 18:4.
• Bahin sa iyang higalang si Lazaro nga mao pay pagkamatay, si Jesu-Kristo miingon: “Ang atong higalang si Lazaro natulog; apan moadto ko aron pukawon nako siya gikan sa pagkatulog. Busa ang iyang mga tinun-an mitubag, Ginoo, kon siya natulog lang, siya mamaayo ra. ... Dayon si Jesus miingon kanila, si Lazaro namatay.”—Juan 11:11-14.

Nakita ba nimo nga nagkauyon kini nga mga teksto? Oo, sukwahi sa gituohan sa kadaghanan, ang Bibliya nagtudlo nga ang patay tinuod gyod nga patay. Wala sila magkinabuhi sa langit o sa ubang dapit apan sila morag hinanok nga nangatulog, nga walay kalibotan bisan unsa. Busa sila dili makadayeg sa Diyos ni makahunahuna. *

Kini ang punto: Kon atong susihon ang Bibliya ulohan por ulohan, ang pangunang mga doktrina niini motin-aw. Siyempre kini nga paagi, nga maoy ginahimo sa mga Saksi ni Jehova, nagkinahanglag paghago. (Proverbio 2:1-5) Ug dili ba kinahanglang hagoan man gyod ang mga butang nga importante?