TULO ka libo ka tuig kanhi, usa ka emperador sa China naghimog parke ug gitawag kinig Garden sa Kaalam. Ang parke nga 607 ka ektarya gipuy-ag daghang mananap. Niadtong panahona, talagsa ra ang mga parke nga sama niini.

Apan karon milyon-milyong tawo sa tibuok kalibotan makasuroy nag zoo. “Niining kalibotan nga nagkagamay na ang mga dapit sa ihalas nga mananap ug nagkadaghang tawo ang namuyo sa siyudad, ang zoo mao ang kinadul-ang dapit sa pagtan-aw ug ihalas nga mga mananap,” nag-ingon ang librong Zoos in the 21st Century.

Makita diha sa zoo ang pipila sa kinanindotan ug talagsaong mga mananap diha sa ilang medyo natural nga pinuy-anan. Tingali makakita kag nindot kaayog kolor nga mga alibangbang nga naglupadlupad diha sa tropikal nga garden o mga penguin nga nangaligo sa ulan-ulan nga yelo diha sa kinoralang luna nga morag Antartika.

Makasuroy ka sa lasang-lasang niini ug makakitag mga mananap ug mga langgam. O makasulod ka sa ngitngit nga lawak sa pagtan-aw sa mga mananap nga magabii ra mokisaw. Ang ubang zoo dunay mga langgam nga mananagit nga maglupad-lupad o mga lumod nga magsirko-sirko sa tubig. Ang mga mananap sama sa leyon wala na isulod sa hawla kondili anaa na sa kinoralang luna nga gilibotag kanal nga may tubig aron dili sila makapameligro sa mga tumatan-aw.

Gikuwestiyon sa ubang mga aktibista nga naglaban sa mga katungod sa mananap kon kining mga mananapa angay bang kuhaon gikan sa ilang natural nga puy-anan ug ibutang sa zoo. Sila nangatarongan nga ang mga mananap dili libreng makalihok-lihok ug ang ilang kinaiyanhong batasan madaot.

Agig tubag niini, ang mga tigdumalag zoo moingon nga nakatabang sila sa pagprotektar sa mananap ug sa pag-edukar sa tawo. “Buot namo nga ang mga tawo matudloan sa pag-amping sa mga mananap,” miingon si Jaime Rull, sa Faunia, Madrid, Spain. “Gusto namo nga mapukaw ang mga tawo sa pagtabang sa pagpanalipod sa puy-anan sa mananap aron sila makapabiling buhi.” Ang ubang surbi nagpakita nga ang mga zoo makapaamgo sa mga tawo nga kinahanglang panalipdan ang mga mananap nga nameligrong mapuo.

Ang ubang talagsaong mananap—sama sa giant panda—nasuod sa mga tawo. “Ang tanang bisita ganahan gyong motan-aw sa duha ka panda,” miingon si Noelia Benito, sa Zoo Aquarium  sa Madrid. “Ang panda nahimong simbolo sa among paningkamot sa pagluwas sa mga mananap nga nameligrong mapuo. Maayo untag mosanay ang among panda, bisan tuod ug pilian kaayo kinig kaparis.”

Dili sama sa panda, daghang mananap mosanay diha sa zoo tungod sa maayong mga kahimtang niini ug tinagad usab sila sa mga beterinaryo. Ang malamposong mga programa sa pagpasanay nagsilbing tubag sa mga kritiko kinsa moingon nga ang mga zoo dili angayng mamalit o mamaligyag mga mananap nga nameligrong mapuo. Gawas sa pagbatog mga mananap nga matan-aw, daghang zoo nagpasanay usab ug mga mananap aron ikabalik kini ngadto sa ilang natural nga puy-anan.

Ang pangunang hinungdan sa pagkapuo sa ihalas nga mga mananap mao ang pagkadaot sa ilang puy-anan. Busa ang mga zoo dunay mga programa sa pagpangalap ug pondo sa pagluwas sa mga mananap gikan sa pagkapuo, nga nakigkooperar usab sa protektadong mga lugar sa mananap diha sa mga nasod sa tropiko. *

Sanglit kadaghanang bata ganahan kaayog mananap, ang pag-adtog zoo sa tibuok pamilya sa Sabado o Dominggo maoy mga higayon sa mga ginikanan sa pagtudlo sa ilang mga anak bahin sa kalalangan sa Diyos. Sila magkauban pagtan-aw ug mga mananap.

Sukad sa sinugdanan sa kasaysayan, ang tawo malingaw gayod ug mga mananap. Kining pagkalingaw ug mananap angayng ipalambo diha sa atong mga anak, kay pinaagi sa kinaiyahan atong mailhan ang personalidad sa Maglalalang. Ang pag-adtog zoo makapalambo usab sa atong pagtahod ug kaamgohan sa maanindot nga mga linalang nga nagpuyo sa atong Yuta.