Tensiyon—Makadaot sa Panglawas
Tensiyon—Makadaot sa Panglawas
“Ang akong trabaho walay klarong eskedyul, motrabaho ko bisan unsang orasa adlaw man o gabii. Sagad mag-opera kog pasyente sa usa ka ospital ug dayon magdali-dali na pod kog adto sa sunod nakong pasyente sa laing ospital agi sa trapik kaayong dalan.”—Dr. Peter Stuart, South Africa.
TINGALI nakasabot ka sa gibati ni Dr. Stuart bisag lahi ang hinungdan sa imong tensiyon. Bisag unsa pay hinungdan sa imong tensiyon—nagdrayb ka man sa trapik kaayo nga dalan, problema sa panimalay o sa trabaho, o uban pa—wala ka mag-inusara kay bisan ang mga tawo kaniadto natensiyon usab.
Kapin sa 3,000 ka tuig kanhi, usa ka banggiitang manggugubat miangkon: “Giabot ako ug kahadlok, . . . ug gihakgom ako sa kalisang.” (Salmo 55:5) Siya usab natensiyon. Sa magbalantay pa siyag karnero, nakapakigbugno siyag leyon ug oso, ug nakapakig-awayg usa ka makahahadlok nga sundalo nga gustong mopatay kaniya.—1 Samuel 17:4-10, 23, 24, 34-36, 41-51.
Dili man hinuon sa tanang higayon makadaot ang tensiyon. Makahatag kini kanatog kaisog sa pag-atubang sa malisod nga kahimtang. Panahon sa emerhensiya, ang tensiyon maoy hinungdan nga makahimo kitag mga buhat nga dili nato mahimo sa ordinaryong kahimtang. Kon duna kay trabaho nga dinalian, ang tensiyon makapatunghag adrenaline nga magpaarang kanimo sa pagtapos niana sa gitakdang panahon. a
Apan kon kanunay kang matensiyon ug dili marelaks ang imong lawas, kini makadaot. Sumala sa usa ka tigdukiduki, “ang tensiyon maoy numero unong makadaot sa atong panglawas.” Kon moabot sa punto nga morag dili na nimo maagwanta ang tensiyon o kaha buot nimong malikayan kana, tingali makapangutana ka, “Duna ba koy mahimo aron dili ko kaayo matensiyon?”
Sa pagkatinuod, duna! Ang kahupayan nga nakatabang na sa daghan mabatonan sa tanan. Kini nga tabang naggikan sa Pulong sa Diyos, ang Bibliya. Bisag kini dili usa ka libro sa medisina, naundan kinig praktikal ug mapuslanong kaalam. Kini nagpatin-aw kon nganong makapatensiyon kaayo ang atong kahimtang karon ug kon unsay mga hinungdan niini. Naghatag usab kinig praktikal nga mga sugyot aron dili kaayo kita matensiyon ug kon unsaon nato kana pagsagubang.
[Footnote]
a Ang adrenaline maoy usa ka hormone gikan sa adrenal glands nga magpaabtik kanimo panahon sa emerhensiya.