Gikan sa Among mga Magbabasa

Makasagubang ba ang Kaminyoon sa Samag-Bagyo nga mga Suliran? (Hulyo 2006) Ako tigbasag magasing Pagmata! Katoliko ako, apan para nako makaiikag ug punog impormasyon ang inyong magasin. Ugaling lang, supak ako sa inyong giingon: “Niadtong 1983, gipaluagan sa maong relihiyon ang mga lagda niini bahin sa kaminyoon ug gipasayon alang sa mga Katoliko ang pagpakigbulag.”

G.V.M., Zambia

Ang “Pagmata!” nagtubag: Ang among gihisgotan mao ang mga kausaban sa Kodigo sa mga Balaod sa Simbahan sa 1983. Dako kaayog impluwensiya ang maong kausaban, ilabina sa Amerika. Sumala sa Romano Katoliko nga Obispo Mark A. Pivarunas, 338 lang ka kaminyoon ang gianular sa Amerika niadtong 1968. Apan sa pagka-1990, kana nga gidaghanon misulbong sa 62,824. Ngano man?

Ang abogado sa simbahan nga si Edward Peters miingon: “Dunay dagkong mga kausaban sa mga balaod sa simbahan sa milabayng 30 ka tuig, mga kausaban nga magpasayon sa pagpayl ug mga petisyon sa pag-anular sa kaminyoon ug sa pag-aprobar sa maong mga petisyon.” Human sa paghisgot ug pipila ka kausaban sa simbahan, si Peters dugang miingon: “Midaghan ang nagpaanular ug kaminyoon tungod niini nga mga kausaban nga gihimo sa Batikano.” Bisag unsa pay ilang intensiyon, ang epekto niini nga mga kausaban​—bisan sa Amerika—​maoy sama sa giingon sa “Pagmata!”: ‘Tungod niini nga mga kausaban, ang mga Katoliko dili na maglisod sa pagtapos sa kaminyoon.’

Aduna bay Usa ka Maglalalang? (Septiyembre 2006) Kining espesyal nga gula sa Pagmata! maayo kaayong pagkasulat. Simple, puwersado, ug makataronganon ang mga argumento nga gipresentar. Ginindotan ako sa pagkahan-ay niini, diin gihisgotan sa tibuok magasin ang usa lang ka ulohan diha sa nagkalainlaing anggulo.

A. B., Espanya

Salamat niining maayong pagkasulat ug makalingaw nga magasin. Ang daghang lainlaing mga argumento ug mga ilustrasyon nagpasidungog kang Jehova. Takos gayod siya nga pagadayegon.

R. B., Switzerland

Nakombinsir ako sa simple apan lig-ong mga pamatuod sa pagsuportar sa paglalang. Ang ebolusyon giyagyag nga bakak nga walay pagpangdaot apan gipresentar kini sa makinaadmanong paagi nga tukma sa siyensiya.

L. G., Pransiya

Ang mga Rom​—Usa ka Libo ka Tuig nga Kalipay ug Kaguol (Oktubre 2006) Gaan ang akong buot sa mga Rom. Apan ikasubo nga may mga tawo nga bug-at gihapon ug buot kanila. Nagtuo ako nga ang inyong artikulo makapukaw sa hunahuna sa mga tawo. Pagkamakapadasig ang pagkahibalo nga dili mapihigon si Jehova ug nga may mga Rom nga nagsimba usab kaniya!

B. B., Pransiya

Mga Rom kami. Ang akong amahan dili pa Saksi ni Jehova, ug dili kaayo siya ganahang mobasa. Apan nakaangay siya niining isyuha sa magasin, ug karon nia kini sa iyang lamesa!

A. G., Pinlandia