Mga Batan-on Nangutana . . .

Unsay Akong Himoon Kon Maglalis ang Akong mga Ginikanan?

MAAPEKTOHAN ka gayod kon mag-ergo ang imong mga ginikanan. Siyempre kay imo man silang gihigugma ug silay nagsuportar nimo. Busa kon dili sila magkasinabot, may mga problema gayod nga motungha. Ngano man nga ang imong mga ginikanan usahay magkasuhi man ug hunahuna?

Lahi ug mga Opinyon

Si Jesus miingon nga sa dihang ang lalaki ug babaye magminyo, sila mahimong “usa ka unod.” (Mateo 19:5) Apan nagpasabot ba kini nga ang imong Papa ug Mama parehas ug panglantaw sa tanang panahon? Dili. Sa pagkatinuod, bisan kinsang duha ka tawo—bisan bana ug asawa nga tinuod nga nagkahiusa—magkabangi usahay.

Kon ang imong mga ginikanan magkalahi ug opinyon, wala kini magpasabot nga ang ilang kaminyoon kabungkagon. Lagmit ang imong mga ginikanan naghigugmaay gihapon—bisan tuod usahay mapikal sila sa usag usa. Nan nganong maglalis man sila? Tingali magkalahi sila ug panglantaw sa pipila ka butang. Dili kana daotan, ni nagpasabot kana nga pakyas ang ilang kaminyoon.

Sa pag-ilustrar: Nakasulay ka na bag tan-aw ug salida uban sa imong suod nga mga higala ug imong nakita nga ang imong opinyon bahin sa salida lahi sa ilaha? Mahimo kining mahitabo. Bisan gani ang mga tawong suod kaayo dili managsama ug mga panglantaw.

Ingon usab niini ang imong mga ginikanan. Tingali sila nabalaka bahin sa panalapi sa pamilya, apan ang matag usa lahi ug hunahuna kon unsaon pagbadyet sa kuwarta; sila gustong magbakasyon, apan ang matag usa lahi ug ideya kon unsay makalingaw; o silang duha dako kaayog tinguha nga makatapos ka sa pagtungha, apan magkalahi sila ug ideya kon unsay ilang himoon sa pagdasig kanimo. Ang punto mao, ang panaghiusa wala magpasabot nga managsama ug panglantaw ang duha ka tawo. Bisan ang duha ka tawo nga nabugkos sa kaminyoon lahi ug mga panglantaw.

Apan nganong maglalis man usahay ang imong mga ginikanan? Nganong ang panaglahi ug opinyon mahimo mang dakong panaglalis nga gamay ra man unta kanang butanga?

Ang Pagkadili-hingpit

Ang hinungdan sa kadaghanang panag-bingkil sa mga ginikanan maoy tungod sa pagkadili-hingpit. Ang Bibliya nag-ingon: “Kitang tanan mangapandol sa makadaghan. Kon adunay dili  mapandol sa pulong, siya usa ka tawong hingpit.” (Santiago 3:2) Ang imong mga ginikanan dili hingpit, ug ikaw pod dili hingpit. Usahay, kitang tanan makasulti ug dili maayo nga wala nato tuyoa, ug usahay makasulti kita ug sakit nga morag “mga dunggab sa espada.”—Proverbio 12:18.

Tingali nakaobserbar ka nga ingon ka usab niana. Pananglitan, may mahinumdoman ka bang higayon nga nagkabangi kamo sa tawo nga suod nimo? Tingali may mahinumdoman ka. “Ang mga tawo magkabangi gayod,” miingon ang batan-on nga ginganlag Marie. a “Sa tinuod lang, kon kinsa pa tong akong gihigugma pag-ayo mao hinuoy makapasuko pag-ayo nako—tingali tungod kay sobra ra ang akong gidahom kanila!” Ang Kristohanong mga bana ug asawa daghan ug gidahom gikan sa usag usa, ug dili kini ikahibulong tungod kay ang Bibliya naghatag ug taas kaayong sukdanan kanila. (Efeso 5:24, 25) Kay dili man sila hingpit, sa madugay ug sa madali may masayop gayod kanila. Ang Bibliya nag-ingon: “Ang tanan nakasala ug wala makaabot sa himaya sa Diyos.”—Roma 3:23; 5:12.

Busa, makadahom ka gayod nga ang imong mga ginikanan maglain ang buot sa usag usa. Gani, si apostol Pablo nagsulat nga ang mga magtiayon makaagom ug “kasakitan sa ilang unod” o, sumala sa pagkahubad nianang mga pulonga diha sa The New English Bible, “kasakit ug kaguol.” (1 Corinto 7:28) Ang lisod pahimut-an nga amo, grabeng trapik, wala damhang bayronon maoy pipila lang sa mga problema nga mopasamot sa tensiyon sa panimalay.

Ang pagkahibalo nga dili hingpit ang imong mga ginikanan ug basin duna silay dakong problema makatabang kanimo sa paglantaw sa timbang nga paagi sa ilang away. Ug uyon niana si Marie. “Ang akong mga ginikanan magpunay na lag away karon,” siya miingon, “ug usahay makahunahuna hinuon ko nga basig gilaayan na sila sa usag usa. Apan sultihan nako ang akong kaugalingon, ‘Laliman ka—25 ka tuig na god silang minyo ug lima pa ka anak ang ilang buhion!’” Tingali ikaw usab makapakitag konsiderasyon o simpatiya pinaagi sa pagsabot nga ang imong mga ginikanan daghan kaayog alatubangon.—1 Pedro 3:8.

Kon Unsay Imong Himoon

Tingali moadmitir ka nga dili hingpit ang imong mga ginikanan, ug nahibalo ka nga daghan kaayo silag mga problema adlaw-adlaw. Apan ang pangutana mao ra gihapon, Unsa may imong himoon kon sila maglalis? Sulayi ang mosunod nga mga sugyot:

◼ Ayaw pag-apil-apil. (Proverbio 26:17) Dili nimo trabaho ang pagtambag sa imong mga ginikanan o pagsulbad sa ilang away. Lagmit ikaw ang mabuthan kon mag-apil-apil ka. “Misulay ko sa pagbadlong nila ug nasultihan hinuon ko nga wala koy labot,” miingon ang 18-anyos nga si Charlene. Pasagdi ang imong mga ginikanan nga maoy mosulbad sa ilang problema.

◼ Pagbaton ug timbang nga panglantaw. (Colosas 3:13) Sama sa giingon sa ibabaw, kon ang imong mga ginikanan maglalis matag karon ug unya, wala kini magpasabot nga sa madugay ug  sa madali sila magbulag. Busa ayaw kaayo kabalaka kon mag-away sila usahay. Si Melanie, nga nag-edad ug 20, miingon bahin sa iyang mga ginikanan: “Bisag mag-away pa sila, ako nahibalo nga nahigugma gihapon sila sa usag usa ug sa pamilya. Makakita ra sila ug paagi sa pagsulbad niana.” Tingali ang imong mga ginikanan makakita ra usab ug paagi sa pagsulbad sa ilang away.

◼ Iampo ang imong mga kabalaka. Ayaw iluom ang imong pagbati. Ang Bibliya nag-ingon: “Itugyan ang imong palas-anon kang Jehova, ug siya magasapnay kanimo.” (Salmo 55:22) Dakog tabang ang pag-ampo. Si apostol Pablo misulat ngadto sa mga taga-Filipos: “Ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:6, 7.

◼ Atimana ang imong kaugalingon. Dili maayong maguol ka sa butang nga dili nimo kapugngan. Makadaot lang kini sa imong panglawas. Ang Bibliya nag-ingon: “Ang pagkamabalak-on diha sa kasingkasing sa usa ka tawo maoy magpatikuko niini, apan ang maayong pulong mao ang makapalipay niini.” (Proverbio 12:25) Hupaya ang imong kabalaka pinaagi sa pagpakigkuyog sa imong makapadasig nga mga higala ug sa pagpakigbahin sa maayong mga kalihokan.

◼ Pakigsulti sa imong mga ginikanan. Bisan tuod dili ka angayng mag-apil-apil sa away sa imong mga ginikanan, makasulti ka kanila sa imong gibati. Pagpilig maayong panahon sa pagduol sa usa kanila. (Proverbio 25:11) Pakigsulti nga may “kalumo . . . ug halawom nga pagtahod.” (1 Pedro 3:15) Ayaw pangakusar. Isulti lang kon unsay imong gibati.

Sulayi ang mga sugyot sa ibabaw. Basin rag mamati ang imong mga ginikanan. Kon dili sila mamati, labing menos nahibalo ka nga bisag dili nimo makontrolar ang imong mga ginikanan, makakontrolar ka sa imong reaksiyon sa dihang sila maglalis.

Ang ubang mga artikulo gikan sa seryeng “Mga Batan-on Nangutana . . .” makita diha sa Web site nga www.watchtower.org/ype

[Footnote]

MGA BUTANG NGA ANGAYNG PALANDONGON

◼ Nganong dili man usahay magkasinabot ang mga ginikanan?

◼ Unsay imong isulti sa imong manghod nga naguol tungod sa away sa inyong mga ginikanan?

[Kahon sa panid 20]

PAHINUMDOM SA MGA GINIKANAN

Dili kalikayan nga magkabangi ang magtiayon. Apan, naa ra ninyo kon unsaon ninyo kini pagsulbad. Ang mga anak maguol gayod kon mag-ergo ang ilang mga ginikanan. Angay nga inyo kining hunahunaon ug maayo kay ang inyong kaminyoon maoy sundon sa inyong mga anak kon magminyo na unya sila. (Proverbio 22:6) Sa dihang magbangi kamo, mahimo ninyong ipakita kon unsa ang epektibong mga paagi sa pagsulbad sa panag-away. Sulayi ang mosunod:

Pamati. Gisugo kita sa Bibliya nga “magmaabtik sa pagpaminaw, magmahinay sa pagsulti, magmahinay sa pagkapungot.” (Santiago 1:19) Modako ang away kon imong ‘balosan ang daotan ug daotan.’ (Roma 12:17) Bisag dili gustong mamati nimo ang imong kapikas, pamati niya.

Pangatarongan imbes manaway. Sultihi ang imong kapikas sa malumo nga tingog nga nasakit ka. (“Sakitan ko kon imo kong . . .”) Ayaw pagpangakusar ug ayaw panaway. (“Wa ka na magtagad nako.” “Dili gyod ka mamati.”)

Ayawg tubayi ang imong kapikas. Usahay mas maayong dili nimo tumpangan ang imong kapikas ug pakigsulti lang dihang kalmado na kamong duha. Ang Bibliya nag-ingon: “Ang sinugdanan sa panaglalis maoy ingon sa usa nga nagapaagas sa tubig; busa sa dili pa moulbo ang away, biya na.”—Proverbio 17:14.

Pangayog pasaylo sa usag usa—ug, kon gikinahanglan, pangayog pasaylo sa inyong mga anak. Si Brianne, nga nag-edad ug 14, miingon: “Usahay pagkahuman nilag lalis, ang akong mga ginikanan mangayog pasaylo kanako ug sa akong magulang nga lalaki tungod kay nahibalo sila nga naapektohan kami.” Ang usa sa labing hinungdanong pagtulon-an nga mahimo ninyong itudlo sa inyong mga anak mao ang mapainubsanong pag-ingon, “Pasayloa ko.”

Alang sa dugang impormasyon, tan-awa ang mga gula sa Pagmata! sa Enero 8, 2001, mga panid 8-14, ug Enero 22, 1994, mga panid 3-12.

[Hulagway sa panid 19]

Ayaw pangakusar. Isulti lang kon unsay imong gibati