Mga Manggugubat nga Nahimong Tigpatunhay sa Kalinaw

ANG Disyembre 8, 2002, nga gula sa Pagmata! adunay eksperyensiya ni Toshiaki Niwa, usa ka kanhing piloto nga Hapones nga gibansay alang sa misyong kamikaze panahon sa Gubat sa Kalibotan II. Giasoy ni Niwa nga sa Agosto 1945, didto siya sa base militar duol sa Kyoto nagpaabot sa mando aron magpakamatay nga moatake sa mga barko de giyera sa Tinipong Bansa. Wala gayod moabot ang maong mando tungod kay pipila lamang ka adlaw sa ulahi natapos na ang gubat. Mga tuig sa ulahi si Niwa nagtuon sa Bibliya uban sa mga Saksi ni Jehova. Iyang nakat-onan nga kadtong buot mopahimuot sa Diyos dili moapil sa gubat. Gitahod gayod nila ang ilang isigkatawo, bisan diin pa sila nagpuyo o bisan unsa pay ilang nasodnong kagikan. (1 Pedro 2:17) Si Niwa, nga usa ka manggugubat kanhi, usa na karon ka tigpatunhay sa kalinaw nga nagpaambit sa uban sa makapahiusang mensahe sa Pulong sa Diyos.

Si Russell Werts, nga taga-Tinipong Bansa, natandog sa sugilanon sa kinabuhi ni Niwa, tungod kay siya nakig-away usab sa mao gihapong gubat​—apan sa pikas kiliran. “Nag-ingon ka nga sa Agosto 1945 didto ka duol sa Kyoto nga nagpaabot sa pag-atake,” matod ni Werts diha sa iyang sulat kang Niwa. “Sa samang higayon, diha na ako sa kataposang mga hugna sa pagbansay alang sa maong pag-atake. Kon wala pa matapos ang gubat niadtong tungora, tingali nangamatay na tang duha diha sa matag kiliran sa maong gubat. Sama kanimo ug sa imong pamilya, ang akong asawa ug ako nahimong mga Saksi ni Jehova sa ulahi. Nindot kaayo ang akong gibati sa pagkahibalo nga kita nga magkaaway kanhi nga nagtinguha sa pagpatay sa usag usa dili lang managhigala karon kondili managsoon usab!”

Sama kang Toshiaki Niwa ug Russell Werts, daghang mortal nga mga magkaaway kaniadto nagpuyo na karon nga malinawon ug nagkahiusa tungod kay ilang gitun-an ug gipadapat ang Pulong sa Diyos, ang Bibliya. Taliwala sa mga Saksi ni Jehova anaay mga Hudiyo ug Arabo, mga Armeniano ug Turko, mga Aleman ug Ruso, mga Hutu ug Tutsi, kinsa nagpamatuod nga sila tinuod nga mga Kristohanon. Sa pagkatinuod, si Jesus nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”​—Juan 13:35.

[Mga hulagway sa panid 31]

Sila si Toshiaki Niwa ug Russell Werts panahon sa Gubat sa Kalibotan II