Ang Hunahuna sa Bibliya

Nagtagad ba Gayod ang Diyos sa mga Bata?

GATOSAN ka milyong kabataan ang gipahimuslan, giabusohan, ug mapintas nga giatake matag tuig. Daghan ang nagtrabaho nga daw mga ulipon diha sa peligroso nga mga kahimtang. Ang uban gipangidnap ug gipugos sa pagkahimong mga sundalo o mga batang pampam. Ang pagsalig sa daghang kabataan dugang nga gibudhian tungod sa pag-abuso kanila sa sekso sa ilang suod nga kadugo mismo ug ubang makalilisang nga mga buhat sa pag-abuso sa kabataan.

Busa, masabtan nga ang sinsero, matinagdanong mga indibiduwal nabalaka sa kahimtang sa kabataan. Samtang moadmitir nga ang kahakog sa tawo ug ang pagkadaotan maoy nakaingon sa pag-abuso, ang uban nalisdan gihapon sa pagdawat nga gitugot sa mahigugmaong Diyos kining dako nga inhustisya. Sila tingali maghunahuna nga gipasagdan sa Diyos kining mga kabataana ug nga tingali siya wala gayoy pagtagad. Tinuod ba kana? Kining makasubo ba nga kahimtang diin ang kabataan ginapahimuslan ug kanunayng ginaabusohan nagkahulogan nga ang Diyos wala gayoy pagtagad kanila? Unsay giingon sa Bibliya?

Gihukman sa Diyos ang mga Tig-abuso

Dili gayod katuyoan ni Jehova nga Diyos nga ang kabataan pahimuslan sa mabangis nga mga hamtong. Ang pag-abusog mga bata maoy usa sa labing makasubong mga resulta sa pag-alsa sa tawo didto sa tanaman sa Eden. Ang maong  pagsalikway sa pagkasoberano sa Diyos misangpot ug mabangis nga pagpahimulos sa mga tawo sa ilang isigkatawo.​—Genesis 3:​11-​13, 16; Ecclesiastes 8:9.

Gikasilagan sa Diyos ang mga tawo nga nagapahimulos sa mahuyang ug sa mga dili-makapanalipod sa kaugalingon. Daghang karaang mga nasod nga wala mag-alagad kang Jehova naghalad ug mga bata, apan si Jehova miingon nga kini maoy “usa ka butang nga wala nako isugo ug nga wala motungha sa akong kasingkasing.” (Jeremias 7:31) Gipasidan-an sa Diyos ang iyang karaang katawhan: ‘Kon ikaw magsakit sa batang lalaki nga nailo sa amahan, nan kon siya motuaw kanako, sa walay pakyas akong dunggon ang iyang pagtuaw; ug ang akong kasuko mosilaob gayod.’​—Exodo 22:​22-​24.

Gihigugma ni Jehova ang Kabataan

Ang kabalaka sa Diyos alang sa mga bata makita diha sa maalamon nga mga sugo nga iyang gihatag ngadto sa tawhanong mga ginikanan. Ang kabataan nga gimatuto sa panimalay nga may kasegurohan dakog posibilidad nga modako nga mahimong hamtong, maayong-mopahiangay nga mga adulto. Busa, ang atong Maglalalang nagmugna sa kaminyoon, nga usa ka tibuok-kinabuhi nga kahikayan diin “ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.” (Genesis 2:24) Diha sa Bibliya, ang seksuwal nga mga relasyon gitugot alang lamang sa mga minyo aron ang mga bata nga ipanganak maatiman diha sa may-kasegurohan nga palibot.​—Hebreohanon 13:4.

Gipasiugda usab sa Kasulatan ang importansiya sa pagbansay nga ihatag sa mga ginikanan. “Ang mga anak maoy panulondon gikan ni Jehova,” nag-ingon ang Bibliya, “ang bunga sa tiyan maoy usa ka ganti. Ingon sa mga udyong diha sa kamot sa tawong gamhanan, mao man usab ang mga anak sa pagkabatan-on.” (Salmo 127:​3, 4) Ang mga bata maoy bililhong gasa gikan sa Diyos, ug buot niya nga sila mouswag. Gitambagan sa Diyos ang mga ginikanan sa paghatag sa ilang mga anak ug maayong direksiyon sa kinabuhi, sama sa usa ka magpapana nga nagpunting ug maayo sa target sa dili pa niya itiro ang mga pana. “Kamong mga amahan,” nagsugo ang Pulong sa Diyos, “ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.”​—Efeso 6:4.

Ang laing paagi nga si Jehova nagpakita sa iyang gugma alang sa mga bata mao ang pagtudlo sa mga ginikanan sa pagpanalipod sa ilang mga anak batok sa mga tawong daotan. Sa karaang Israel, bisan “ang mga bata” gisugo sa pagpatalinghog sa Balaod, nga naglakip sa mga lagda bahin sa husto ug dili-hustong panggawi may kalabotan sa sekso. (Deuteronomio 31:12; Levitico 18:​6-​24) Buot sa Diyos nga himoon sa mga ginikanan ang kutob sa ilang mahimo sa pagpanalipod sa ilang mga anak batok sa kang bisan kinsa nga magpahimulos o magaabuso kanila.

Paglaom Alang sa Kabataan

Ang walay-paglubad nga gugma ni Jehova sa mga kabataan katingalahan kaayong gipasundayag ni Jesu-Kristo, kinsa hingpit nga nagpabanaag sa personalidad sa iyang Amahan. (Juan 5:19) Sa dihang ang mga apostoles ni Jesus nagtuo nga sila nagtabang kang Jesus pinaagi sa pagpugong sa mga ginikanan sa pagdala sa ilang gagmayng kabataan ngadto kaniya, masuk-anong gibadlong sila ni Jesus. “Pasagdi ang mga bata nga moduol kanako,” siya miingon. Ug dayon, “iyang gikugos ang mga bata ug gipanalanginan sila.” (Marcos 10:​13-​16) Ang mga bata bililhon kaayo sa mga mata ni Jehova nga Diyos o sa iyang Anak.

Sa pagkatinuod, pinaagi sa iyang tinudlong Hari, si Jesu-Kristo, ang Diyos molihok sa dili madugay sa paghupay sa kabataan nga gimaltrato. Ang hakog nga mga mapahimuslanon ug walay-puangod nga mga tig-abuso niining kalibotana laglagon gayod. (Salmo 37:​10,11) Kon bahin sa mga maaghop nga nagapangita kang Jehova, ang Bibliya nag-ingon: “Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”​—Pinadayag 21:​3, 4.

Kasamtangan, ang Diyos nagpasundayag sa iyang gugma karon pinaagi sa pagtanyag ug espirituwal ug emosyonal nga tabang sa tanan nga gipahimuslan ug giabusohan. “Ang nawala akong pangitaon,” siya nagsaad, ug ang natibuagsa akong dad-on pagbalik, ug “ang nabalian akong bendahean ug ang nasakit akong palig-onon.” (Ezequiel 34:16) Pinaagi sa iyang Pulong, sa iyang balaang espiritu, ug sa Kristohanong kongregasyon, si Jehova maglipay sa mga bata nga gidaogdaog ug timawa. Pagkamakapalipay ang pagkasayod nga karon, ug sama sa iyang himoon unya sa umaabot, ‘ang Amahan sa malumong mga kaluoy ug ang Diyos sa tanang paghupay, . . . nagahupay kanato sa tanan natong kasakitan.’​—2 Corinto 1:​3, 4.

[Picture Credit Line sa panid 18]

© Mikkel Ostergaard /Panos Pictures