Gikan sa Among mga Magbabasa

Mapintas nga Krimen Ang serye nga “Mapintas nga Krimen​—Aduna bay Solusyon?” (Hulyo 8, 2003) maayo kaayong pagkasulat. Nakadayeg ako sa paagi sa pagpadayag sa unang artikulo sa mga kamatuoran nga wala una maghatag ug solusyon. Gitapos lamang kini nga may pipila ka pangutana nga maayong palandongon, nga nagtugot sa magbabasa sa pagsabot sa gibug-aton sa suliran. Dayon ang Kasulatanhong mga solusyon gilaraw. Ang bugtong pulong nga akong mahunahunaan sa paghubit sa artikulo mao nga kini makaiikag kaayo!

A. L., Tinipong Bansa

Ang kataposang artikulo niini nga serye, nga nag-ulohang “Usa ka Realistikong Solusyon​—Posible Ba?,” nakatabang kanako sa pagsabot nga ang pagbag-o sa hunahuna ug kasingkasing gikinahanglan aron ang mga tawo mahigugma sa pagkamatarong. Kitang tanan kinahanglang matudloan ni Jehova nga Diyos, ingon sa gipahayag sa Isaias 54:13. Bisan karon, uban sa tabang ni Jehova kita makasugod na sa pagbansay sa atong kaugalingon aron mahimong matang sa mga tawo nga buot ni Jehova nga kita maingon.

V. K., Tinipong Bansa

Tour de France Nalingaw gayod ako sa artikulong “Ang Tour de France​—100 ka Tuig sa Kinalabwang Lumba sa Bisikleta.” (Hulyo 8, 2003) Tig-apil ako kaniadto sa dili-propesyonal nga mga lumba sa bisikleta. Bisan tuod tigtan-aw akog Tour de France sa telebisyon kada tuig, wala akoy nasayran bahin sa sinugdanan niini o nga ang 2003 mao ang ika-100 ka tuig niini. Ang artikulo naghisgot bahin sa “makitawhanon nga pagpakiglumba sa uban.” Sa tan-aw nako mao kini ang nakapadani sa daghang tawo.

R. S., Japan

Ako diyes anyos, ug nalingaw kaayo ko sa artikulo bahin sa Tour de France. Salamat sa pagbatbat ug daghan kaayong butang bahin sa kasaysayan sa pagbisikleta. Hinaot nga magpatik pa kamo ug dugang mga artikulo bahin sa mga esport.

J. F., Pransiya

Balas Gibasa nako nga maikagon ang artikulo nga “Ang Katahom sa Balas.” (Mayo 8, 2003) Ang paghubit sa paagi nga maporma ang balas ug sa buhing organismo nga anaa sa balas makaiikag kaayo. Nahingangha ako sa nagkadaiyang kolor sa balas. Kahibulongan ang paghunahuna nga kon walay balas, wala unta kitay bildo o semento​—mga butang nga bililhon kaayo! Salamat sa nindot kaayo nga impormasyon.

N. N., Habagatang Aprika

Diabetes Salamat kaayo sa serye nga “Pagsagubang sa Diabetes.” (Mayo 8, 2003) Duna akoy Type 1 nga diabetes sulod na sa 12 ka tuig, ug gitambalan ako pinaagig pag-ineksiyon kanunay ug insulin. Ang akong asawa dako kaayog tabang kanako. Kaming duha padayong nagsusisusi bahin sa sakit, nagduaw kami sa doktor nga magkauban, ug ako naningkamot nga mahimong mas positibo. Kay nag-alagad man ako ingong usa ka nagapanawng magtatan-aw, nakita ko nga ang akong mga isigka-Kristohanon mas nakaamgo na sa panginahanglan sa pagpakitag pagkamaluloton ug pagkamapailobon ngadto sa usa ka tawong masakiton aron matabangan siya sa pag-atubang sa mga suliran sa kinabuhi. Ang maong tinamdan nakatabang nako sa pagpadayon sa akong pag-alagad sa mga kongregasyon. Kining mga serye sa mga artikulo miabot gayod sa hustong panahon. Sa makausa pa, daghan kaayong salamat.

W. B., Polandia

Diabeteson ako sulod na sa 28 ka tuig. Napulo ka sakop sa akong pamilya ang nag-antos niining sakita. Ang inyong serye naundan sa labing masangkaron nga impormasyon nga akong nakita sukad. Ang mga artikulo nagpabanaag sa gugma sa atong Maglalalang​—usa ka butang nga kulang diha sa kalibotanong mga artikulo bahin sa maong ulohan. Sanglit dili ko buot nga magsalig pag-ayo sa akong pamilya, naningkamot ako nga dili ipakita sa uban nga ako may sakit. Malipay kaayo ko nga moatiman sa uban. Apan kining artikuloha nagtabang kanako sa pagkaamgo nga kinahanglang atimanon ko ang akong kaugalingon aron mas makaatiman akog maayo sa uban.

L. P., Pransiya