Mga Batan-on Nangutana . . .

Unsay Daotan sa Telephone Sex?

“ANG telephone sex,” matod pa sa usa ka iladong magasin sa Amerika, “maoy mipuli sa mga sulat sa gugma ingong paagi sa romantikong komunikasyon nga mas gusto sa mga magtiayon o managtrato nga layo sa usag usa.”

Unsa ang telephone sex? Kini maoy paghisgot o pagpamati sa mabutyagong mga butang nga makapukaw sa gana sa sekso diha sa telepono. a Ang mga tawo nga nagahimo niini sagad mag-ugay-ugay sa ilang kinatawo aron mahuwasan sa ilang seksuwal nga gana. Makapabalaka nga ang telephone sex nagkapopular, managtrato man o dili-magkaila ang maghisgot niining malaw-ay nga mga butang. Sa pagkatinuod, ang uban dayag nga nagpasiugda niini.

“Kini mao ang labing luwas nga paagi sa pagpakigsekso,” miingon ang usa ka babaye. Dayag nga may pipila ka tawong mouyon niya. Pananglitan, sa Oktubre 2000, agig reaksiyon sa pagdaghan sa natakboyan ug HIV, usa ka grupo sa mga eksperto sa panglawas didto sa Rusya migamit sa mga panganunsiyo diha sa mantalaan sa pagpasiugda sa telephone sex.

Apan, ang ubang mga tawo nagpasiugda sa telephone sex sa bugtong katuyoan nga makasapi. Ang mga serbisyo sa telephone sex​—diin ang mga tawo mobayad aron makadungog ug malaw-ayng mga butang​—nahimong bilyones-dolyares nga negosyo sa Tinipong Bansa lang.

Nganong napopular man kaayo kining maong bisyo? Mao kini ang giingon sa librong The Fantasy Factory: “Peligroso ang pagpakigsekso ug emosyonal nga kasuod. Anaa ang pisikal nga mga kapeligrohan nga mataptan sa sakit nga mapasa pinaagi sa pagpakigsekso, ang kapeligrohan nga madaot ang personal o propesyonal nga reputasyon kon mayagyag ang pagpakigsekso, ang kahadlok nga sawayon sa uban ug ang mga epekto sa abnormal nga seksuwal nga gana. Pinaagi sa phone sex mamenosan ang maong mga risgo.”

Tinuod, sa phone sex wala kay pisikal nga kontak sa laing tawo. Apan kini ba  nagpasabot nga kini dili daotan o kaha kini wala gayoy peligro o risgo?

Dili ba Makadaot ang Telephone Sex?

Ang seksuwal nga tinguha kusog kaayo panahon sa pagkabatan-on. Ang Bibliya nagtawag niining yugto sa dihang ang pagbati sa sekso nag-uros-uros nga “pagbuswak sa pagkabatan-on.” (1 Corinto 7:36) Niining importanteng yugto sa kinabuhi, ang batan-ong Kristohanon kinahanglang makakat-on sa “paghupot sa iyang kaugalingong sudlanan diha sa kabalaan ug kadungganan.” (1 Tesalonica 4:4) Sa ato pa, ikaw kinahanglang makakat-on sa pagsagubang ug sa pagkontrolar sa imong seksuwal nga mga pagbati. Importante kini aron mahimong maayo ug timbang ang imong panglantaw sa sekso.

Apan, ang telephone sex nagtudlo sa usa ka tawo sa pagpatuyang, imbes sa pagkontrolar, sa iyang gana sa sekso. Gawas pa niana, kini nagpasiugda sa malaw-ay, tinuis nga panglantaw sa kaatbang nga sekso. Ang Bibliya nagtudlo nga ang seksuwal nga relasyon maoy para lamang sa mga minyo. (Hebreohanon 13:4) Apan ang phone sex nagdasig sa mga batan-on sa pagtagamtam sa seksuwal nga kalipay bisag dili pa minyo. Ang Bibliya nagtudlo nga ang tinuod nga kalipay mabatonan pinaagi sa paghatag​—dili sa pagdawat. (Buhat 20:35) Apan ang phone sex nagtudlo sa usa ka tawo sa paggamit sa uban alang sa hinakog nga katagbawan. Ang Bibliya nagtudlo sa mga magtiayon sa pagpalambo sa tinuod nga kasuod pinaagi sa pag-ugmad sa gugma ug pagsalig sa usag usa. (Efeso 5:​22, 33) Apan, ang telephone sex nagpasiugda sa pagkadili-mabination ug dili-pagpaila.

Makadaot nga Pagkagiyan

Ang karaang Corinto gibantog ingong siyudad sa imoral nga mga bisyo. Busa may maayong rason nga si apostol Pablo misulat sa mga Kristohanon didto: “Ako nahadlok nga sa unsa mang paagi, ingon nga ang halas nagdaldal kang Eva pinaagi sa lipatlipat niini, basin ug ang inyong kaisipan pagapahisalaagon gikan sa katim-os ug kaputli nga angay kang Kristo.” (2 Corinto 11:3) Ang telephone sex maoy usa sa mga paagi nga gigamit ni Satanas nga Yawa sa pagdaot sa mga batan-on karon.

Alang sa pipila ka batan-on, ang ilang pagkagiyan sa pagtawag sa mga linya sa telepono nga nagtanyag ug telephone sex dili na makontrolar. Gipakita sa usa ka batan-ong lalaki nga atong nganlag Jim ang kagrabe sa pagkagiyan sa uban. Nakita ni Jim ang numero sa telepono nga nagtanyag ug telephone sex diha sa usa ka karatula sa panganunsiyo. Iyang gisag-ulo ang numero ug sa ulahi, tungod sa pagkamaukiton, gitawgan kini. Nagkasubsob ang iyang pagtawag sa maong numero sa telepono. Wala madugay, ang iyang bayranan sa telepono mikabat ug $600!

Ang pagpukaw sa seksuwal nga mga tinguha samtang ikaw dili pa minyo maoy supak sa tambag sa Pulong sa Diyos. Kini nag-awhag: “Busa, patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana.”​—Colosas 3:5.

Mga Kapeligrohan Diha sa Panagtratohay

Komosta ang bahin sa mga hohamtong na nga sinsero sa ilang panagtratohay? Siyempre, natural lamang sa mga tawong naghigugmaay nga ipahayag ang ilang mga pagbati sa usag usa. Niadtong kapanahonan sa Bibliya, ang usa ka mahinadlokon-sa-Diyos nga batan-ong babaye miingon bahin sa iyang trato: “Ako iya sa akong minahal, ug ako ang iyang gipangandoy.” (Awit ni Solomon 7:10) Samtang nagkaduol ang adlaw sa kasal, angay ug husto nga ang kaslonon maghisgot bahin sa pipila ka pribadong mga butang. Apan, ang phone sex ba maoy maayong paagi sa pagpahayag ug romantikong mga pagbati?

Dili. Bisan ang mga kaslonon obligado sa pagtuman sa tambag ni apostol Pablo: “Ang pakighilawas ug ang tanang matang sa kahugawan o kadalo dili gayod angay hisgotan sa inyong taliwala, ingon nga nahiangay sa mga balaan; ni ang makauulaw nga panggawi ni binuang nga sinultihan ni malaw-ay nga pagpanistis, mga butang nga dili angay, kondili himoa hinuon ninyo ang pagpasalamat. Kay kamo nahibalo niini, nga nag-ila mismo niini, nga walay makihilawason o tawong mahugaw o tawong dalo​—nga sa ato pa tigsimbag idolo​—nga may panulondon sa gingharian ni Kristo ug sa Diyos.”​—Efeso 5:3-5; Colosas 3:8.

Ang pribadong panaghisgot nga gituyo sa pagpukaw sa imoral nga mga hunahuna o nga mosangpot sa masturbasyon dayag gayod nga  mahugaw sa panan-aw ni Jehova. Ug mahimo pa gani nga kini moresulta sa mas seryosong mga paglapas sa diyosnong mga prinsipyo. Pananglitan, dihay managtrato nga layo sa usag usa. Sa sinugdanan, ang ilang kanunayng pag-estoryahanay diha sa telepono maoy ilang paagi nga dugang magkailhanay pa. Apan, sa wala madugay sila nagsugod sa paghisgot ug imoral nga mga topiko. Ang ilang panaghisgot nagkaanam ka mabutyagon. Busa, dili ikatingala nga sa dihang sa ulahi sila nagkauban, sila nahitumpawak gilayon sa mahugaw nga panggawi.

Siyempre, kon buot nato nga pahimut-an ang Diyos, atong himoon ang kutob sa atong maarangan sa paglikay sa lit-ag sa telephone sex. Sa unsang paagi magmalamposon kita sa paglikay niana?

‘Makmaka ang Imong Lawas’

Ang telephone sex makapagiyan. Kinahanglang atong ‘makmakan ang atong lawas ug maghimo niini nga samag-ulipon’ aron mapahimut-an si Jehova. (1 Corinto 9:27) Kon ikaw sa pagkakaron nag-apil-apil sa telephone sex, nganong dili ka mangayog tabang? Makatabang ang pagtug-an sa imong Kristohanong mga ginikanan. Oo, lagmit masuko sila kanimo. Apan sila usab ang labaw nga makatabang sa pagbantay sa imong panggawi aron dili ka mobalik sa maong bisyo. Ang mga ansiyano sa kongregasyon sa mga Saksi ni Jehova nga imong gipasakopan andam ug makaarang usab sa pagtabang.

Kon ikaw dunay trato, magmadeterminado sa pagpabiling putli, bisan sa pagpakig-estorya diha sa telepono. Ang usa ka kaslonon nga Kristohanong babaye nga ginganlag Leticia miingon: “Nag-uban kami sa akong trato sa pagbasa ug binase-sa-Bibliya nga mga artikulo bahin sa pagpabiling putli. Mapasalamaton kami kay nakatabang kini sa among padayong paghupot ug hinlo nga tanlag.” Pagbaton ug kaisog sa pag-usab sa topiko kon ang inyong panaghisgot medyo may hilas na nga kahulogan. Hisgoti ninyong duha ang panginahanglan nga kanunayng magmahinlo sa inyong panag-estorya.

Sa ubang nasod, ang mga panganunsiyo bahin sa telephone sex ipakita sa telebisyon sa gabii na kaayo. Tingali mas labing maayo kon dili ka na lang molantaw ug gabii na kaayong mga salida sa TV. Sanglit ang masturbasyon makapukaw usab, inay makawagtang, sa imoral nga mga hunahuna, kinahanglang imong likayan kining mahugaw nga buhat. b Magmalamposon ka sa pagwagtang sa mahugaw nga mga ideya gikan sa imong hunahuna pinaagi sa paghunahuna sa matul-id nga mga butang. (Filipos 4:8) Pakig-uban sa mga higala nga hinlo ug sinultihan, ug basaha ang Pulong sa Diyos ug ang Kristohanong mga basahon sa adlaw-adlaw aron sa pagpalig-on sa imong determinasyon. Niining paagiha imong gisanta ang imoral nga mga handurawan sa pagsulod ug pagdaot sa imong panghunahuna. Labaw sa tanan, pag-ampo sa Diyos alang sa tabang. Si apostol Pedro misulat: “Itugyan kaniya ang tanan ninyong mga kabalaka, kay siya may kahingawa kaninyo.”​—1 Pedro 5:​6, 7.

“Kusog kaayo ang pagpit-os nga ginaatubang sa mga batan-on sa pagpakigbahin sa imoral nga pakigsekso,” nag-ingon ang usa ka batan-ong Kristohanong babaye nga taga-Brazil. Apan, nasayod si Jehova sa mga problema nga imong ginaatubang. Magmasaligon nga siya magahatag kanimo sa tanang tabang nga imong gikinahanglan aron makapabiling hinlo sa iyang panan-aw.​—Efeso 6:14-18.

[Mga footnote]

[Hulagway sa panid 20, 21]

Ang telephone sex ug cyber sex nagkapopular

[Hulagway sa panid 20, 21]

Ang mga managtrato kinahanglang magbantay nga ang ilang panaghisgot dili mahimong hugaw

[Hulagway sa panid 22]

Ang pagbasa sa Pulong sa Diyos ug sa Kristohanong mga publikasyon makapalig-on sa imong determinasyon sa pagpabiling putli