Usa ka Lalaki nga Mihukom sa Pagsunod sa Diyos

SA GUBOT nga mga adlaw sa 1937, sa dihang ang nagkasumpaking mga ideolohiya nagpahinabog tensiyon sa daghang Uropanhong mga nasod, ang tinuod nga mga Kristohanon nakaatubang ug lisod nga mga desisyon. Magmasinundanon ba sila sa Diyos o sa mga tawo? (Buhat 5:29) Ang batan-ong mga lalaki nga ang edad angay nang magsundalo nahibalo nga ang pagsunod sa Diyos mahimong bugtian sa ilang kinabuhi.

Si Antonio Gargallo maoy usa ka 19-anyos nga Katsila nga miatubang sa maong desisyon. Ang gubat sibil sa Espanya gibugno na sa halos usa ka tuig sa dihang siya girekluta sa pagkasundalo sa nasyonalistang mga puwersa ni Heneral Franco. Sa miaging tuig, si Antonio nabawtismohan ingong usa sa mga Saksi ni Jehova, ug nabasa niya ang Kasulatanhong tambag nga ang mga alagad sa Diyos kinahanglang magpabiling neyutral ug dili gani mokat-on ug gubat. (Isaias 2:4; Juan 17:16) Kay dili lagi gustong magsundalo ug mopatay sa iyang mga katagilungsod, naningkamot si Antonio sa pagkalagiw ngadto sa Pransiya. Apan nadakpan siya ug gidala sa baraks sa mga sundalo sa Jaca, Huesca, duol sa utlanan sa Pransiya.

Direktang gipapili siya sa hukmanang militar: Magsundalo o patyon. Si Antonio mihukom sa pagsunod sa Diyos. Sa hapit na siya patya, nagsulat siya sa iyang inahan ug igsoong babaye, nga dili mga Saksi ni Jehova, niining mosunod:

“Ako gidakop, ug bisan tuod wala husaya, ako gihukman ug kamatayon. Karong gabhiona ako mamatay. Ayaw pagkaguol o paghilak . . . , kay akong gisunod ang Diyos. Buweno, diyutay ra ang mawala kanako, kay kon kabubut-on sa Diyos, mabatonan ra nako ang usa ka bag-o ug mas maayong kinabuhi. . . . Kalmado kaayo ako samtang nagkapupos ang akong kataposang takna. Palihog dawata ang akong kataposang halog gikan niining inyong anak ug igsoon nga nahigugma gayod kaninyo.” *

Tulo ka sundalo nagtaho nga sa dihang siya nagpaingon sa iyang kamatayon, si Antonio miawit ug mga pagdayeg kang Jehova. Ang maong mga sakripisyo namatikdan gayod sa Diyos ug sa iyang Anak. Makaseguro kita nga ang matinumanong mga Kristohanon, sama kang Antonio, makadawat gayod sa ilang ganti pinaagi sa pagkabanhaw.​—Juan 5:​28, 29.

[Footnote]