“Pagkagiyan” sa Cell Phone

TINAMPO SA MAGSUSULAT SA PAGMATA! SA JAPAN

“ANG Pagsalig sa mga Cell Phone Makagiyan Na,” nag-ingon ang ulohang balita sa The Daily Yomiuri sa Japan. Pagkagiyan ba kini? “Ang mga batan-on morag nag-isip sa ilang mga cell phone ingong mga bahin sa ilang mga lawas ug matarantar pa gani kon wala nila madala ang ilang mga cell phone,” nag-ingon ang mantalaan. Sa kahadlok nga mawad-ag komunikasyon sa uban, daghan ang dili gayod magpalong sa ilang cell phone, bisag asa. Kon sila “dili makadawat ug mga mensahe diha sa ilang mga cell phone, sila mabalaka ug sapoton, ug magsugod sa pagbati nga walay nagkinahanglan kanila.” Kining maong kabalaka nagtukmod kanila sa pagtubag sa tanang mensahe nga gipadala kanila dihadiha dayon, nga kasagarang dili ra kinahanglang tubagon.

Siyempre, ang mga cell phone mahimong mapuslanon. Gani, kini napamatud-ang bililhon panahon sa mga emerhensiya. Bisan ang ordinaryong paggamit sa mga cell phone dili awtomatikong sayop, basta buhaton kini sa timbang nga paagi. Apan ang ubang mga awtoridad nag-ingon nga ang “pagkagiyan” sa cell phone makadaot sa normal nga mga kahanas sa pagpakigkomunikar. Usa ka magtutudlo sa hayskul sa Osaka nabalaka nga tungod sa mga cell phone, “ang mga bata nawad-an na sa katakos sa pag-interpretar sa mga ekspresyon sa nawong, panggawi ug tingog sa uban. Ang sangpotanan niini mao ang nagkagrabeng pagkaagresibo sa mga bata, nga giduyogan sa dili-pagpanumbaling sa mga pagbati sa uban,” nag-ingon ang mantalaan.

Ang artikulo mihinapos: “Morag dili kalikayan nga ang pagsalig sa mga bata sa mga cell phone mosamot pa sa umaabot. Ang bugtong paagi sa pagpamenos sa makadaot nga mga epekto niining maong uso mao ang pagseguro nga ang mga hamtong maghatag sa mga bata ug maayong panig-ingnan sa paggamit sa mga cell phone.”