Ang Kaso Gidawat sa Korte Suprema

SA KATUIGANG DI PA DUGAY, sa kapin sa 7,000 ka paghangyo alang sa pormal nga sinulat sa legal nga mga desisyon kada tuig, gidawat sa Korte Suprema ang mga 80 ngadto 90 ka kaso​—nga kapig diyutay sa 1 ka porsiyento!

Niadtong Mayo 2001, gipayl sa mga Saksi ni Jehova ang ilang Petisyon Alang sa Writ of Certiorari (permiso sa pagrepaso sa kaso) ngadto sa Korte Suprema, nga nangutana: “Nahiuyon ba sa konstitusyon nga ang relihiyosong mga ministro nga naghimo sa gipasukad-sa-Kasulatan ug kasiglohan-nag-gidugayon nga batasan sa pagsangyaw sa ilang relihiyosong mga tinuohan isipon nga pareho sa mga namaligya, nga obligadong mosunod sa restriksiyon sa pagkuhag permiso sa munisipyo aron makigsulti bahin sa Bibliya o magtanyag sa literatura nga gibase sa Bibliya nga walay bayad?”

Niadtong Oktubre 15, 2001, gipahibalo ang Legal nga Departamento  sa Watchtower nga gidawat sa Korte Suprema sa T.B. ang kasong Watchtower Bible and Tract Society of New York, Inc., et al. v. Village of Stratton et al. aron marepaso!

Ang gidawat lang sa Korte nga bahin sa kaso mao ang espesipikong isyu labot sa kagawasan sa pagsulti, nga mao, kon ang panalipod sa gawasnong pagsulti sa Unang Enmiyenda naglakip ba sa katungod sa katawhan labot sa pagkadili-obligado nga magpaila una sa awtoridad sa gobyerno.

Karon ang kaso kinahanglang ergohon atubangan sa siyam ka huwes sa Korte Suprema sa T.B. Kinahanglang may mga abogado ang mga Saksi; ug ang Balangay sa Stratton, ang kaatbang nga mga abogado. Unsay resulta sa panag-ergo sa maong korte?

[Kahon sa panid 5]

UNSA ANG UNANG ENMIYENDA?

“ENMIYENDA I (ANG PAGTUKOD UG RELIHIYON; KAGAWASAN SA RELIHIYON, PAGSULTI, PRENSA, PAGTIGOM, PETISYON) Ang Kongreso dili makahimog balaod labot sa pagtukod ug relihiyon, o pagdili sa gawasnong pagtuman niana; o paghikaw sa kagawasan sa pagsulti o sa prensa; o ang katungod sa mga tawo sa pagtigom nga malinawon, ug pagpetisyon sa Gobyerno nga wagtangon ang hinungdan sa mga reklamo.”​—Ang Konstitusyon sa T.B.

“Ang Unang Enmiyenda mao ang pasikaranan sa demokratikanhong proseso sa Tinipong Bansa. Ang Unang Enmiyenda nagdili sa Kongreso sa pag-aprobar ug mga balaod nga mopugong sa kagawasan sa pagsulti, sa prensa, sa pagtigom nga malinawon, o sa pagpetisyon. Giisip sa daghang tawo ang kagawasan sa pagsulti nga maoy labing hinungdanong kagawasan ug pasikaranan sa tanang ubang mga kagawasan. Ang Unang Enmiyenda nagdili usab sa Kongreso sa pag-aprobar ug mga balaod nga magtukod ug relihiyon sa estado o mopugong sa relihiyosong kagawasan.” (The World Book Encyclopedia) Makaiikag, sa Cantwell v. Connecticut, 310 U.S. 296 (1940), nga usa ka hinungdanon kaayong desisyon nga naglangkit usab sa mga Saksi ni Jehova, ang Korte Suprema sa T.B. midesisyon nga ang mga garantiya sa Unang Enmiyenda nagdili dili lang sa “Kongreso” (ang pederal nga gobyerno) kondili hasta sa lokal nga mga awtoridad (estado ug munisipyo) sa pag-aprobar ug mga balaod nga manghilabot sa mga katungod sa Unang Enmiyenda nga dili na uyon sa konstitusyon.

[Mga hulagway sa panid 5]

Ang mga isyung nalangkit makaapektar sa nagkalainlaing matang sa pagduaw sa kabalayan

[Picture Credit Line sa panid 4]

Photograph by Franz Jantzen, Collection of the Supreme Court of the United States