Gamita ang mga Tambal sa Maalamong Paagi

TINAMPO SA MAGSUSULAT SA PAGMATA! SA HABAGATANG APRIKA

SA DIHANG resetaan ka sa imong doktor ug mga tambal, sa walay duhaduha gihimo niya kana nga may maayong mga katuyoan, nga nagbase sa iyang reseta diha sa iyang dayagnosis, kahibalo sa medisina, ug kasinatian. Bisan pa niana, ang pasyente dili angayng magdahom nga ang doktor maoy bug-os nga responsable sa iyang kaayohan. Ang pasyente mao gihapoy responsable kon unsay iyang ipasulod sa iyang lawas.

Sa dihang motomar ug mga tambal nga gireseta, tagda ang mosunod nga praktikal nga mga giya gikan sa usa ka medikal nga doktor:

● Ang tanang tambal dunay segundaryong mga epekto. Aduna kay katungod sa pagkahibalo kon unsang tambala ang gireseta ug kon unsa ang posibleng segundaryong mga epekto niini. Kon ang imong doktor dili mohatag niining impormasyona, ayaw pagpanuko sa pagpangutana. Sa kadaghanang kaso ang mga benepisyo mas bug-at pa kay sa segundaryong mga epekto. Apan kinahanglang pahibaloon ka aron makahimo ka ug intelihenteng desisyon.

● Ang mga tambal lainlaig epekto diha sa matag indibiduwal. Ang imong doktor dili eksaktong makatag-an kon unsay epekto diha kanimo sa gireseta nga tambal. Kon nabalaka ka sa wala-damhang segundaryong mga epekto, konsultaha ang imong doktor.

● Susiha kon unsa ka dugay nga kinahanglan nimong tomaron ang tambal. Dugang pa tinoa kon kini lagmit bang makagiyan.

● Ayaw pagbuotbuot ug hunong sa pagtomar sa maong tambal, tingali tungod kay miarang-arang na ang imong gibati. Ang paghunong dayon sa pagtomar sa tambal mahimong makapagrabe pa sa imong sakit. Hinunoa, konsultaha una ang imong doktor.

● Kanunayng tomara ang tambal nga gireseta ilalom sa superbisyon sa doktor.