Tambong, Pamati sa Walay-Bayad nga Pakigpulong Publiko

“Kinsay Nagatudlo sa Tanang Nasod sa Kamatuoran?”

Usa ka obispo kas-a mipatugbaw: “Ang bug-os nga kamatuoran dili maangkon natong tanan.” Husto ba ang maong opinyon? O aduna bay tuboran sa bug-os nga kamatuoran? Posible bang modangat ang panahon nga ang tanan magasulti sa kamatuoran?

Sugod sa Nobyembre 23-25, 2001, ug padayon hangtod sa Enero 11-13, 2002, ang pakigpulong nga ang ulohan anaa sa itaas ipahayag panahon sa 60 ka tagtulo ka adlawng “Mga Magtutudlo sa Pulong sa Diyos” Distritong mga Kombensiyon sa mga Saksi ni Jehova sa Pilipinas. Sa pagkamatuod, kini mao unya ang haylayt nianang mga 2,000 ka kombensiyon sa halos 150 ka nasod sa tibuok kalibotan.

Apil sa mga pangutana nga tubagon mao: Diin gikan ang kamatuoran? Sa unsang paagi gipadayag ang kamatuoran? Unsa ang pangunang teksbok nga nagpadayag sa kamatuoran?

Makapamati ka sa maong hinungdanong pakigpulong panahon sa usa ka kombensiyon nga duol sa inyong balay. Kontaka ang mga Saksi ni Jehova sa inyong dapit, o pagsulat sa mga magpapatik niining magasina alang sa dapit sa kombensiyon nga labing duol kanimo.