Hilwas ba ang Imong Anak?

Sumala sa National Highway Traffic Safety Administration (NHTSA) sa T.B., ang mga pagbanggaay sa sakyanan mao ang pangunang hinungdan sa kamatayon taliwala sa mga bata nga tali sa 5 ug 14 anyos. Nag-ingon ang NHTSA: “Kapin sa 50% sa mga bata nga nangamatay sa pagbanggaay ang walay pugong [pinaagig mga himan sa kahilwas]. Dugang pa, 4 sa 5 ka bata ang may pugong nga gitaod sa dili hustong paagi.”

Ang NHTSA naghatag ug daghang sugyot labot sa kahilwas ug mga pasidaan alang niadtong adunay kuyog nga mga bata samtang nagmaneho. Bisan kon ang mga balaod magkalahi sa lainlaing mga nasod ug bisan sa lainlaing mga estado, kini nga mga lagda maoy butang nga angayng palandongon sa daghang ginikanan ug mga tig-atiman sa mga bata. Palihog susiha ang inyong lokal nga mga balaod ug buhata ang bisan unsa nga imong mahimo aron kanunayng hilwas ang imong mga pasaherong bata!

MGA SUGYOT SA KAHILWAS

Ang labing hilwas nga dapit alang sa tanang bata maoy sa lingkoranan sa likod.

1 Ang mga masuso angayng ibutang sa hilwas nga lingkoranan sa bata nga nag-atubang sa luyo diha sa lingkoranan sa likod sa sakyanan.

2 Ang bata nga labing menos usa ka tuig ang pangedaron ug motimbang ug labing menos siyam ka kilo mahimong ibutang diha sa may-pugong nga lingkoranan nga nag-atubang sa unahan.

3 Sa timbang nga 18 ka kilo, ang bata mahimong mogamit ug “booster seat,” nga gihigot ginamit ang usa sa mga bakos sa sabakan ug abaga diha sa lingkoranan sa sakyanan.

4 Sa mga 36 kilos ug sa gitas-on nga mga upat ka tiil ug siyam ka pulgada, ang bata mahimong mosugod paggamit sa bakos sa kahilwas alang sa hamtong.

MGA PASIDAAN

Ang mga bata dili angayng molingkod sa atubang nga lingkoranan sa pasahero hangtod nga sila maoy labing menos 13 anyos. Ang mga air bag alang sa pasahero sa atubang makapahinabog grabeng mga kadaot sa mga bata ug masuso.

Sa dihang mogamit ug booster seat, ang bakos sa sabakan lamang dili magtaganag igong proteksiyon kon ang booster seat walay salipod nga mopugong sa bata engkasog maduso paabante.

Ayaw hunahunaa nga ang bakos sa abaga igo nang manalipod sa gamayng bata; kon mahitabo ang pagbanggaay, ang bakos mahimong motuok sa liog sa bata, nga magpahinabog grabeng kadaot o kamatayon pa gani.

Sunda pag-ayo ang mga instruksiyon sa dihang magtaod ug maggamit ug mga lingkoranan sa bata. Sumala sa NHTSA, “bisan ang ‘labing hilwas’ nga lingkoranan mahimong dili manalipod sa imong bata kon kini dili gamiton sa hustong paagi.”

[Hulagway sa panid 31]

Ang hustong pagtaod sa lingkoranan sa bata maglakip sa hugot nga pagtaod sa bakos sa lingkoranan