Ang Pag-atake sa Sobyet sa Relihiyon

ANG Unyon Sobyet sa Sosyalistang mga Republika natukod niadtong 1922, nga ang Rusya mao ang kinadak-an ug labing inila sa orihinal nga upat ka republika. Ngadtongadto kini midako nga naglakip sa 15 ka republika ug duolan sa un-siksto sa nawong sa yuta ang gidak-on. Apan sa 1991 ang Unyon Sobyet kalit lang nabungkag. * Makahuloganon, kadto mao ang unang Estado nga misulay pagpapas sa pagtuo nga dunay Diyos gikan sa hunahuna sa mga sakop niini.

Si Vladimir Lenin, ang unang pangulo sa Unyon Sobyet, maoy tinun-an ni Karl Marx, kinsa naghulagway sa Kristiyanidad ingong galamiton sa pagdaogdaog. Gitawag ni Marx ang relihiyon ingong “opyum sa katawhan,” ug si Lenin miingon sa ulahi: “Ang bisan unsang relihiyosong ideya, ang bisan unsang ideya nga dunay diyos, . . . maoy labing talamayon.”

Sa dihang namatay niadtong 1925 si Patriarka Tikhon sa Ortodokso sa Rusya, ang iglesya wala tugti sa pagpili ug laing patriarka. Tungod kay giatake ang relihiyon human niana, kadaghanan sa mga simbahan gipangguba o kaha gigamit sa sekular nga mga katuyoan. Ang mga pari gisentensiyahan nga bilanggoon diha sa mga kampo sa pinugos nga trabaho, diin daghan ang nangamatay. “Ilalom sa pagmando ni Joseph Stalin sa ulahing bahin sa mga tuig sa 1920 ug 1930,” nag-ingon ang Encyclopædia Britannica, “ang iglesya nag-antos sa dugoong paglutos nga mikalas ug libolibong biktima. Pagka-1939 tulo o upat na lang ka Ortodoksong mga obispo ug 100 ka simbahan ang gitugtan sa gobyerno.”

Apan, sa kalit lang usa ka talagsaong kausaban ang nahitabo.

Gubat sa Kalibotan II ug ang Relihiyon

Sa 1939, ang Nazi nga Alemanya, kanhing kaalyado sa Unyon Sobyet, misulong sa Polandia, nga maoy hinungdan sa pagsugod sa Gubat sa Kalibotan II. Sulod sa usa ka tuig nailog sa Unyon Sobyet ang ulahing 4 sa 15 ka republika niini​—ang Latvia, Lithuania, Estonia, ug Moldavia. Sa Hunyo 1941, hinunoa, ang Alemanya milansad ug grabeng pag-atake sa Unyon Sobyet, nga nakapakurat gayod kang Stalin. Sa pagkatapos sa tuig, ang mga sundalong Aleman nakaabot na sa mga utlanan sa Moscow, ug ang kaparotan sa Unyon Sobyet daw nagkahiduol na.

Kay nawad-ag paglaom, naningkamot si Stalin sa pagpalihok sa nasod alang sa gitawag sa mga Ruso ug Dakong Patriotikong Gubat. Naamgohan ni Stalin nga kinahanglang ipasig-uli niya ang pipila ka katungod sa simbahan aron makuha niya ang pagpaluyo sa mga tawo alang sa kalihokan sa gubat, tungod kay milyonmilyon kanila ang relihiyoso gihapon. Unsay resulta sa  talagsaong pagbali sa polisa ni Stalin pabor sa relihiyon?

Sa tabang sa simbahan, ang mga Ruso gipalihok alang sa kalihokan sa gubat, ug sa 1945 nahitabo ang dakong kadaogan sa Sobyet batok sa mga Aleman. Human sa temporaryong paghunong sa pag-atake sa Sobyet sa relihiyon, ang gidaghanon sa Ortodoksong mga simbahan miuswag ngadto sa 25,000, ug ang gidaghanon sa mga pari miabot ug 33,000.

Miatake na Usab

Apan, sa pagkatinuod ang tumong sa mga lider sa Sobyet nga papason gikan sa hunahuna sa ilang mga sakop ang ideya nga dunay Diyos wala mausab. Ang The Encyclopædia Britannica nag-ingon: “Usa ka bag-ong kontra-relihiyon nga kalihokan ang gipasiugda ni Primer Ministro Nikita Khrushchev sa 1959-​64, nga nagpakunhod sa gidaghanon sa bukas nga mga simbahan ngadto sa duolan sa 10,000. Si Patriarka Pimen gipili niadtong 1971 human sa kamatayon ni Alexis, ug, bisan tuod ang simbahan nagbaod gihapon sa pagkamaunongon sa milyonmilyon, dili gihapon tino ang kaugmaon niini.” *

Hisgotan unya nato kon sa unsang paagi ang Ortodoksong Iglesya sa Rusya nakalahutay gihapon bisan pa sa pag-atake pag-usab sa Sobyet. Apan unsay gidangatan sa ubang mga relihiyon sa Unyon Sobyet? Niining mga relihiyona, unsa ang nahimong pangunang gipuntirya sa pag-atake, ug ngano? Hisgotan kini sa mosunod nga artikulo.

[Mga footnote]

[Hulagway sa panid 3]

Si Lenin nagtawag sa ‘bisan unsang ideya nga dunay Diyos nga labing talamayon’

[Credit Line]

Musée d’Histoire Contemporaine​—BDIC