Ang Akong mga Paningkamot sa Paghimog Maalamong mga Pagpili

SUMALA SA GIASOY NI GUSTAVO SISSON

Sa edad nga 12, bisan tuod interesado kaayo ako sa paglangoy, mihukom ako nga magdoktor. Apan halos sa samang higayon, nagsugod ako pagtuon sa Bibliya ug, ingong sangpotanan, gustong mahimong ministro. Unsay nahitabo sa akong lainlaing mga ambisyon ug mga gikaikagan? Kini ba magkauyonay?

SA 1961 si Olive Springate, usa ka misyonaryo sa mga Saksi ni Jehova sa Brazil, nagsugod pagtuon sa Bibliya uban kang Mama ug kanako. Tungod sa pagsupak ni Papa, usa ka tinamod nga medikal nga doktor sa Pôrto Alegre, mihunong kami sa pagtuon. Apan, kontakon gihapon kami ni Olive, ug ngadtongadto akong nasabtan ang kamatuoran diha sa akong nakat-onan. Apan niadtong tungora ang akong interes sa paglangoy nakapalinga sa akong pagtagad gikan sa espirituwal nga mga butang.

Sa nag-edad ako ug 19, akong nahimamat ang usa ka madanihong batan-ong babaye nga ginganlag Vera Lúcia didto sa dapit diin ako maglangoylangoy, ug nagsugod kami pagdeyt. Gisultian siya ni Mama bahin sa among gituohan, ug siya interesado. Busa akong gikontak si Olive, ug misugod siya pagtuon sa Bibliya uban kanamo, bisan pa sa pagsupak sa amahan ni Vera Lúcia.

Si Vera Lúcia nagpadayon sa pagtuon, ug miuswag ang iyang kahibalo sa Bibliya. Nagsugod gani siya pagdumala ug mga pagtuon sa Bibliya uban sa mga trabahante sa swimming club nga akong gianiban. Sa samang higayon, gitumong nako ang akong pagtagad sa pagbansay alang sa nagsingabot nga nasodnong mga indigay sa paglangoy.

Human kami magtuon ug magtambongan sa Kristohanong mga tigom sulod sa kapin sa tuig, ang amahan ni Vera Lúcia nagduda nga may nagakahitabo. Usa ka adlaw niana sa dihang mipauli kami gikan sa tigom, siya naghulat ug isog nga nangutana kon diin kami gikan. Ako mitubag nga mitambong kami ug Kristohanong tigom ug nga bisan tuod ang relihiyon dili tingali hinungdanon kaniya, kini nagkahulogag kinabuhi ug kamatayon alang kanamo. Nanghupaw siya ug miingon: “Buweno, kon nagkahulogan man diay ug kinabuhi ug kamatayon, dawaton na lang nako ang mga butang.” Sukad niadtong adlawa, nausab ang iyang tinamdan, ug bisan tuod wala gayod siya mahimong usa sa mga Saksi ni Jehova, siya nahimong suod nga higala ug kauban sa mga panahon sa panginahanglan.

Paghimog mga Pagpili

Mihukom ako sa pag-undang sa maindigong paglangoy human sa nasodnong mga kampeyonato, apan tungod sa duha ka kadaogan ug sa pagkapiling kinamaayohan sa Brazil sa 400- ug 1,500-metros  nga freestyle nga paglangoy, gidapit ako sa Pan American Games sa Cali, Colombia, sa 1970. Bisan tuod dili gusto ni Vera Lúcia nga moadto ko, nagsugod ako sa pagbansay alang sa mga dula.

Sa dihang maayo ang akong paglangoy didto sa Cali, ang mga tigbansay nangutana kon andam ba akong magbansay alang sa Olimpiada. Akong gihunahuna ang akong wala pa matapos nga pagtuon sa medisina ug ang kahibulongang mga kamatuoran nga akong nakat-onan bahin sa mga katuyoan ni Jehova ug wala na maghunahuna sa pagpadayon sa karera sa paglangoy. Sukad niadto, tulin ang akong pag-uswag sa espirituwal. Sa 1972, ang tuig sa Olimpiada sa Munich, Alemanya, si Vera Lúcia ug ako nagpasimbolo sa among pagpahinungod kang Jehova pinaagi sa pagpabawtismo sa tubig. Nakapadasig kini kang Mama sa pagtuon pag-usab sa Bibliya, ug ngadtongadto nabawtismohan usab siya.

Human mabawtismohi si Mama, misamot ang pagsupak ni Papa. Sa kataposan nabungkag ang among pamilya, ug sanglit nagtungha pa ko sa unibersidad, kinahanglang paigoon namo ang gamayng pensiyon ni Mama ug ang halin sa pagbaligya sa among balay. Ingong sangpotanan, gioktaba namo ni Vera ang among kasal. Sa pagkatinuod ang maayong mga pagtulon-an nga akong nakat-onan kang Papa nakatabang kanako sa paghimo sa akong mga desisyon. Kanunay siyang moingon: “Ayawg kahadlok nga mahimong lahi” ug, “Ang kadaghanan dili kanunayng husto.” Usa sa paborito niyang mga panultihon mao, “Ang bili sa usa ka tawo sukdon sa kon unsay iyang ihatag sa uban.”

Ingong usa sa mga Saksi ni Jehova, nakapadapat ako sa maayo kaayong tambag ni Papa. Diha ko tupad sa iyang higdaanan sa dihang siya namatay sa 1986. Nagkauli na ang among maayong kabubut-on ug nagtahod sa usag usa. Ako nagtuo nga gikalipay niya ako, sanglit, sama kaniya, ako nahimong medikal nga doktor.

Sa kasamtangan, migraduwar ako sa tunghaan sa medisina sa 1974. Mihukom ako sa pagkahimong general practitioner, apan sa ulahi, human hunahunaa pag-ayo ang maong butang, nakahukom ako nga mas makatabang ako sa akong Kristohanong mga igsoon pinaagi sa pagkahimong siruhano. (Buhat 15:​28, 29) Busa gidawat nako ang hagit ug gigugol ang misunod nga tulo ka tuig sa pagbansay ingong siruhano.

Malisod nga Legal nga Pakigbugno

Usa ka makapasubong kaso nga niana ako nalangkit mao kadtong sa usa ka 15-anyos nga dalagitang Saksi nga nagdugo sa sulod sa lawas. Siya luspad ug may ubos nga presyon sa dugo apan maayo pag panabot ug hugot nga midesisyon nga dili magpaabono ug dugo. Human padaghana ang iyang dugo ginamit ang volume expander, gihimo ko ang endoscopy ug gihugasan ang parte nga naapektohan ginamit ang gipabugnaw nga saline solution aron mohunong ang pagdugo. Sa sinugdan miarang-arang ang iyang kahimtang, apan 36 ka oras sa ulahi, samtang didto siya sa intensive care, kalit lang mibalik ang pagdugo. Bisan pa sa pagpaningkamot pag-ayo, ang doktor nga maoy mirelyebo niadtong tungora wala makakontrolar sa pagdugo ug makamentinar sa gidaghanon sa iyang dugo, ug namatay ang dalagita.

Sa dihang nahitabo kini, ang komite sa etika nagsuspenso sa akong internship ug gisang-at ang akong kaso sa rehiyonal nga medikal nga konseho. Gipasakaan akog sumbong nga milapas sa tulo ka artikulo sa medikal nga kodigo sa etika, nga nagpameligro sa akong lisensiya sa medisina ug usab sa akong panginabuhi.

Gitagalan ako sa usa ka komite ug 30 ka adlaw nga niana kinahanglan nakong ipresentar ang akong sinulat nga depensa. Ang akong mga abogado nag-andam ug legal ug konstitusyonal nga mga argumento, ug ako nag-andam ug teknikal nga depensa sa tabang sa lokal nga Hospital Liaison Committee (HLC), usa ka grupo sa mga Saksi ni Jehova nga nagtinguha sa pagpalambo sa kooperasyon sa ospital ug pasyente. Panahon sa husay ang komite sa instruksiyon nangutana ilabina bahin sa akong baroganan ingong doktor ug ingong usa sa mga Saksi ni Jehova. Apan, ang akong depensa sa panguna gipasukad sa medikal ug siyentipikanhong mga argumento ug sa mga taho sa tinamod nga mga siruhano.

Ang ebidensiya nga gipresentar nagpamatuod nga ang pasyente midumili sa pagpaabono ug dugo ug nga wala akoy gihimo sa pag-impluwensiya kaniya sa paghimo nianang maong desisyon. Ang husay nag-establisar usab nga sa upat ka  doktor nga gikonsulta, ako lamang ang bugtong doktor nga nagsugod pagdapat ug usa ka matang sa pagtambal nga uyon sa mga kagustohan sa pasyente ug sa iyang sakit.

Dayon ang akong kaso giduso ngadto sa usa ka komite nga mobotar sa usa ka sesyon nga tambongan sa tanang takos niana. Mihimo ako ug diyes-minutos nga binabang pagdepensa nga, sama sa akong nag-unang sinulat nga depensa, akong gisentro lamang sa medikal nga mga bahin. Human ako paminawa, duha ka membro sa komite miingon nga bisan tuod wala ako moabono ug dugo, ang pagtambal nga akong gireseta dunay lig-ong siyentipikanhong pasukaranan. Ang laing doktor nagpasiugda nga ang walay-dugo nga pagtambal epektibo ug nga kini dunay mas ubos nga gidaghanon sa nangamatay. Ang kataposang konsehal miingon nga dili maoy isyu kon kaha ang mga pag-abono ug dugo maayong tambal o dili. Ang isyu mao kon kaha ang doktor makapugos ba sa iyang pasyente sa usa ka pagtambal nga dili gusto sa pasyente, ug ang konsehal wala magtuo nga dunay katungod niana ang doktor. Busa, sa mayoriya nga 12 kontra 2, ang mga konsehal mibotar pabor sa pagdismis sa tanang sumbong, niana gihukman akong dili-sad-an.

Pagpanalipod sa mga Katungod sa Pasyente

Ang pipila ka awtoridad sa medisina nakakuhag mga orden sa korte aron pugson ang mga pasyenteng Saksi sa pagpaabono ug dugo, ug usahay nakahatag ako ug pamatuod panahon sa mga husay sa korte nga nakatabang sa pagbali sa maong mga orden. Usa ka kaso naglangkit sa usa ka Saksi nga may naghubag nga mga ugat diha sa iyang tutonlan, usa ka sakit nga magpahinabog grabeng pagdugo sa tiyan. Sa naospital siya, anemik na kaayo siya​—ang ihap sa iyang hemoglobin maoy 4.7 gramos matag desilitro. * Sa sinugdan, wala siya pugsa sa pagpaabono ug dugo, ug nakadawat lamang siya ug pagtambal nga mohupay kaniya.

Unya, human sa usa ka semana nga pag-estar sa ospital, ang pasyente natingala nga giduaw sa usa ka opisyal sa korte nga nagdala sa orden sa pag-abono ug dugo. Niining tungora ang ihap sa iyang hemoglobin misaka na ngadto sa 6.4 gramos matag desilitro, ug wala kini mous-os. Morag ang huwes nagbase sa iyang desisyon sa unang sukod sa hemoglobin dili sa ikaduha, ang mas taas nga sukod.

Ang HLC mitanyag ug tabang. Gihangyo ako sa pasyente nga eksaminon siya. Gibuhat ko kadto ug human niadto milampos sa pagbutang kaniya sa usa ka ospital diin mahimo siyang tambalan nga walay dugo. Sa samang higayon, gikuwestiyon sa iyang mga abogado ang orden sa korte nga abonohan ug dugo ang pasyente.

Gipatawag ako sa usa ka husay atubangan sa huwes, kinsa nangutana kanako bahin sa kahimtang sa pasyente. Panahon sa husay, giawtorisahan niya ako sa pagpadayon sa pagtambal sa pasyente samtang gilantugian pa ang mga merito sa orden sa korte. Sa dihang panahon na sa laing husay, ang pasyente miarang-arang na ug gipagawas sa ospital. Sa dihang gipatawag ako aron sa pagtestigos pag-usab, ang abogado sa ospital mihagit kanako sa pagpamatuod nga ang pagtambal nga akong girekomendar dunay siyentipikanhong pasukaranan. Sa iyang kaulaw, akong gipakita ang artikulo diha sa medikal nga magasin nga gipatik sa mao gihapong ospital nga iyang gihawasan, ug kini nagrekomendar sa maong pagtambal!

Sa dihang gipahayag na ang desisyon, nalipay kami sa pagkadungog nga ang among baroganan sa pagsalig sa medikal nga pagtambal gawas sa mga pag-abono ug dugo napamatud-ang husto. Ang ospital gimandoan nga bayran ang tanang gastos, lakip na ang nagasto sa kaso. Bisan tuod miapelar ang ospital, kini napildi pag-usab.

Pag-atiman sa Among Pamilya

Sukad ako nahimong Saksi, naangkon nako ang pagpaluyo ni Vera Lúcia ingong debotadong kauban ug ingong takos nga asawa ug sulondang inahan sa among mga anak. Sa unsang paagi kaha siya nakaarang sa pag-atubang sa tanang suliran, pagmentinar sa among panimalay ug pagtabang sa pag-atiman sa mga bata, nga karon maoy lagsik nang mga batan-on? Naposible kini tungod sa iyang lalom nga gugma alang kang Jehova ug sa Kristohanong ministeryo.

Ingong mga ginikanan, among gitudloan ang among mga anak sa mga doktrina ug mga prinsipyo sa Bibliya sukad sa bata pa kaayo sila. Bisan pag puliki ang among kinabuhi, naningkamot  kami sa pag-alagad diha sa bug-os-panahong ministeryo sulod sa pipila ka bulan kada tuig. Ug buhaton namo ang among kinamaayohan sa pagsunod sa eskedyul nga naglakip sa pagbasa sa Bibliya nga regular, paghisgot sa teksto sa Bibliya kada adlaw, ug pagpaambit sa among pagtuo ngadto sa uban diha sa Kristohanong ministeryo. Ning bag-o pa ang among pamilya kanunayng magdumala ug hangtod sa 12 ka panagtuon sa Bibliya kada semana uban sa mga tawo nga dili mga Saksi.

Si Vera Lúcia ug ako naningkamot usab sa paglangkit sa among mga anak nga lalaki sa among mga kalihokan nga, sa samang higayon, nagtahod sa ilang personal nga mga kagustohan. Kami nagtuo nga tulo ka sukaranang butang ang gikinahanglan aron maatiman sa mga ginikanan ang ilang pamilya sa hustong paagi. Una, ang hustong pagtulon-an, nga pinasikad sa Pulong sa Diyos, ang Bibliya. Ikaduha, ang hustong ehemplo, nga maghatag sa mga anak ug klarong ebidensiya nga ang ilang mga ginikanan dunay maayong kahadlok sa Diyos. Ug ikatulo, ang hustong pagpakig-uban sa mga Kristohanon sa tanang pangedaron ug mga kahimtang sa katilingban, kinsa makahatag ug lainlaing gasa ug mga katakos sa mga membro sa pamilya. Ingong magtiayon, among tumong nga itagana sa among pamilya kining mga butanga.

Sa paghinumdom sa among duolan sa 30 ka tuig nga pag-alagad kang Jehova, ang akong asawa ug ako makaingon nga, sa walay duhaduha, gihatag niya kanamo ang kinamaayohan sa kinabuhi ug nagtagana ug daghang butang nga gikalipayan ug mga panalangin. Bisan tuod wala ako makaapil sa Olimpiada, malingaw gihapon akong maglangoylangoy ug ubay-ubayng kilometro kada semana. Tinuod, ang akong pagkadoktor maingon man ang pagkahimong usa sa mga Saksi ni Jehova misangpot sa hilabihan ka puliki nga kinabuhi, apan nakaplagan nakong magantihon kaayo ang pagtabang sa akong Kristohanong mga igsoong lalaki ug babaye sa paglahutay sa ilang pag-alagad sa Diyos atubangan sa mga pagsulay.

Kanunay akong pangutan-on kon nabalaka ba ako nga mawad-an akog trabaho sa pag-abot sa bag-ong sistema sa Diyos ug wala nay sakit. Ako motubag nga ako ang unang molukso sa kalipay sa dihang ‘ang bakol mokatkat sama sa lagsaw, ang dila sa amang mosinggit sa kalipay,’ ug ‘walay molupyo nga moingong: “Ako masakiton.”’​—Isaias 33:​24; 35:6.

[Footnote]

[Hulagway sa panid 15]

Nag-opera sa usa ka pasyente

[Mga hulagway sa panid 15]

Uban kang Vera Lúcia, ug ang among pagtuon sa pamilya