Gikan sa Among mga Magbabasa

Mubo Kaayo? Ako usa ka siruhano sa utok, ug akong namatikdan nga may diperensiya ang usa ka hulagway nga mipatim-aw diha sa artikulong “Ang Imong Utok​—Kahibulongan sa Kakuti.” (Mayo 8, 1999) Inyong gipadayag ang usa ka bahin sa utok nga may linya sa mga tulbok nga nagpunting sa glandulang pituitary. Sa akong tan-aw ang linya mubo kaayo ug kining linyaha nagpunting sa optic chiasma.

A. W., Hapon

Husto ang among hait-ug-panan-aw nga magbabasa, ug among gikasubo ang sayop.​—ED.

Bagyong Mitch Salamat tungod sa makapatandog nga artikulong “Pagluwas Gikan sa Mamumunong Bagyo!” (Hunyo 8, 1999) Ako kasagarang makadawat ug impormasyon agi sa E-mail bahin sa mga katalagmang naagoman sa atong mga igsoon, apan wala gayod ako mahibalo kon pila sa impormasyon ang katuohan. Ang paagi sa pagpahayag sa impormasyon diha sa artikulo maoy makapadasig pag-ayo ug makapalig-on. Kana nagsilbing makapahinuklog nga pahinumdom bahin sa makuyaw nga mga panahong atong gikinabuhian.

C. P., Tinipong Bansa

Ako nakaamgo nga daghan ang napildihan sa ilang mga kabtangan sa maong katalagman, apan kulbahinam ang pagbasa bahin sa paglihok sa atong tibuok-kalibotang panag-igsoonay, bisan atubangan sa dakong kapeligrohan. Ang hulagway sa igsoong lalaki atubangan sa iyang nagubang balay naghatag kanakog butang pamalandongon. Unsa ba ang akong katarongan sa pagmulo bahin sa mga kahimtang?

R.C.N., Brazil

Guarana Ang inyong artikulong “Kape, Tsa, o ‘Guarana’?” (Hunyo 8, 1999) makahatag ug kalamdagan. Ingong bug-os-panahong ministro nga nag-alagad ubay sa mga tampi sa Suba sa Amazon, ako nagsangyaw duol sa mga dapit diin ang guarana ginatanom. Ako kadaghan makakita kon giunsa kini pag-andam. Sa sunod higayong may motanyag kanakog guarana, nahibalo na ko kon unsa unya ang akong itubag.

J.R.S.M., Brazil

Uniberso Buot kong pasalamatan kamog dako kaayo tungod sa seryeng “Atong Uniberso​—Gihimo nga May Katuyoan?” (Hunyo 22, 1999) Ingong usa ka bag-ohang astronomo, naangayan ko ang maong mga artikulo. Ang kahibulongang talan-awon nga mahitabo kada gabii magdapit kanato sa pagpalandong bahin sa labihan ka dakong gahom, kahibalo, ug gugma sa atong Maglalalang.

V. V., Espanya

Ang mga artikulo sayong sabton, bisan alang sa dili-siyentipikanhong kaisipan. Salamat kaninyo tungod sa pagtabang kanako nga mas mailhan si Jehova. Human sa 58 ka tuig nga kaminyoon, ang akong asawa namatay karong bag-o pa. Busa kining makapalamdag nga pagsabot bahin sa atong Maglalalang miabot gayod sa hustong panahon sa akong kinabuhi.

F. W., Tinipong Bansa

Mga Babayeng Trabahante sa Konstruksiyon Salamat kaayo tungod sa artikulong “Ang Kababayen-an May Dakong Bahin.” (Hunyo 22, 1999) Mga usa ka tuig nga miagi, ako mibalhin sa Thailand gikan sa California. Karong bag-o kami nakapribilehiyo sa pagtukod sa among kaugalingong Kingdom Hall. Sama sa kababayen-an sa Zimbabwe, ang among mga igsoong babaye mitabang sa pagsagol sa semento, pagbugkot sa aserong mga kable, pagbutang ug baldosa, ug paghimo sa daghan pang ubang trabaho sa pagtukod. Uban sa tabang ni Jehova natapos namo ang trabaho sa mga tulo ka bulan. Salamat kaninyo sa pag-ila sa bahin nga nabatonan sa kababayen-an diha sa tibuok-kalibotang pagpanukod.

R. G., Thailand

Ang akong mga ginikanan ug ako nakabaton sa higayon nga motabang sa proyekto sa daling-tukorong Kingdom Hall sa unang higayon. Dako gayod ang akong kalipay sa dihang akong nakita kon giunsa sa kababayen-an sa tibuok kalibotan pagtabang sa tibuok-kalibotang pagpanukod sa mga sangang-buhatan ug mga Kingdom Hall sa mga Saksi ni Jehova. Ang mga proyekto sa pagpanukod nga sama niadtong sa Zimbabwe maoy pagpangandam alang sa buluhatong atong himoon sa bag-ong kalibotan. Kon kita mahimong magkalipay sa maong mga proyekto karon, hunahunaa kon unsa gayod kini sa dihang ang tanang tawo maoy hingpit ug nagkahiusa sa pag-alagad kang Jehova!

S.W.S., Brazil