Ang Pagkahimong Maayong Tawo Makagarantiya bag Maayong Kaugmaon?
Sukad pa kaniadto, daghan ang naghunahuna nga ang pagkahimong maayong tawo seguradong makahatag ug maayong kaugmaon. Pananglitan, ang mga tawo sa sidlakang bahin sa Asia nagtahod sa giingon sa pilosopong magtutudlo nga si Confucius (551-479 B.C.E.): “Ang dili nimo gustong buhaton sa imong kaugalingon, ayaw buhata sa uban.” *
ANG GIHIMO SA DAGHAN
Daghan gihapon ang nagtuo nga ang sekreto sa maayong kaugmaon mao ang maayong panggawi. Naningkamot sila nga magmatinahoron, magpakitag maayong pamatasan, mohimo sa ilang papel diha sa komunidad, ug mamentinar ang maayong konsensiya. “Nagtuo ko nga kon matinud-anon ko ug sinsero,” miingon si Linh nga taga-Vietnam, “panalanginan ko.”
Ang uban naghimog maayo tungod sa gitudlo sa ilang relihiyon. Si Hsu-Yun, nga nagpuyo sa Taiwan, miingon, “Gitudloan ko nga kon ang usa maayog binuhatan, magmalipayon siya human sa iyang kamatayon. Pero kon daotan ang iyang ginahimo, siya mag-antos.”
UNSAY RESULTA?
Tinuod nga kon mohimo tag maayo sa uban, daghan tag madawat nga kaayohan. Pero daghan ang nakamatikod nga dili kanunayng maayo ang ibalos kanila. “Sa akong eksperyensiya, kadtong naghimog maayo dili kanunayng panalanginan,” miingon si Shiu Ping nga nagpuyo sa Hong Kong. “Naningkamot ko sa pag-atiman sa akong pamilya ug sa paghimog maayo. Pero nabungkag ang akong kaminyoon, ug ako ug ang akong anak gibiyaan sa akong bana.”
Nakita sa daghan nga ang relihiyon dili kanunayng makatabang sa uban nga mahimong maayong tawo. “Miapil ko sa usa ka relihiyon ug nahimong direktor sa mga kalihokan sa mga batan-on,” miingon si Etsuko nga nagpuyo sa Japan. “Nakurat ko kay ang ubang membro sa akong relihiyon imoral, nag-ilogay ug posisyon, ug naggamit sa kuwarta sa simbahan sa dili maayong paagi.”
“Naningkamot ko sa pag-atiman sa akong pamilya ug sa paghimog maayo. Pero nabungkag ang akong kaminyoon, ug ako ug ang akong anak gibiyaan sa akong bana.”—SHIU PING, HONG KONG
Ang ubang relihiyoso nawad-ag kalipay kay wala panalangini ang ilang maayong ginahimo. Kanay gibati ni Van nga gikan sa Vietnam. “Kada adlaw kong magdala ug prutas, bulak, ug pagkaon ug ihalad ni sa altar sa akong namatay nga mga katigulangan, kay naglaom ko nga panalanginan ko sa umaabot,” siya miingon. “Bisan pa sa maayong mga butang ug mga rituwal nga akong gihimo sa daghang tuig, ang akong bana grabeng nasakit. Dayon, namatay ang akong anak nga nag-eskuwela sa laing nasod.”
Kon ang pagkahimong maayong tawo dili garantiya aron makabaton ug maayong kaugmaon, unsay makahatag ug garantiya? Aron matubag kini, nagkinahanglan tag kasaligang giya nga makatubag sa atong mga pangutana ug motultol nato sa maayong kaugmaon. Asa nato makita ang maong giya?
^ par. 2 Para sa dugang impormasyon sa gitudlo ni Confucius, tan-awa ang kapitulo 7, parapo 31-35, sa librong Mankind’s Search for God, nga gipatik sa mga Saksi ni Jehova ug naa online sa www.jw.org.
Basin Ganahan Pod Ka
PAGMATA!
Importante ang Moral nga mga Prinsipyo
Kon tudloan nimog maayong moral nga mga prinsipyo ang imong mga anak, makabaton silag maayong kaugmaon.
TUBAG SA MGA PANGUTANA BAHIN SA BIBLIYA
Unsa ang Bulawanong Lagda?
Sa dihang gisulti ni Jesus ang Bulawanong Lagda, iyang gihisgotan kon unsaon nato pagtratar dili lang ang mga tawo sa katibuk-an, kondili bisan ang atong mga kaaway.
ANG BANTAYANANG TORRE
Nag-antos ang Maayong mga Tawo
Gipakita sa Bibliya ang tulo ka hinungdan sa pag-antos sa tawo.
