Daghan ang naghunahuna nga kon taas kag edukasyon ug dato, segurado na ang imong kaugmaon. Nagtuo sila nga ang pag-eskuwela sa unibersidad makapahimo nilang mas hawod sa trabaho ug mas maayong membro sa pamilya ug sa komunidad. Lagmit gibati sab nila nga ang maayong edukasyon makatabang sa pagbaton ug dakog suweldo nga trabaho ug malipayon kadtong daghag kuwarta.

Matikdi ang komento ni Zhang Chen, nga gikan sa China: “Para nako, kinahanglan kong moeskuwela sa unibersidad aron mahaw-as mi sa kalisod. Nagtuo sab ko nga ang dakog suweldo nga trabaho moresultag malipayon ug tagbaw nga kinabuhi.”

Aron makabaton ug maayong kaugmaon, daghan ang gustong moeskuwela sa sikat nga mga unibersidad, lagmit sa laing nasod. Nagkadaghan ang mihimo niana sa wala pa ang restriksiyon sa internasyonal nga pagbiyahe tungod sa COVID-19. Ang 2012 nga report sa Organisation for Economic Co-operation and Development nag-ingon nga “52% sa mga estudyante nga mieskuwela sa laing nasod gikan sa Asia.”

Daghang ginikanan ang nanarbaho pag-ayo aron ang ilang mga anak makaeskuwela sa unibersidad sa laing nasod. Si Qixiang, nga gikan sa Taiwan, miingon: “Dili dato ang akong ginikanan, pero kaming upat ka magsoon gipaeskuwela nilag kolehiyo sa United States.” Aron mabayran ang maong edukasyon, ang iyang pamilya, sama sa uban, nalubong sa utang.

Dunay kaayohan ang edukasyon, pero dili niini kanunayng mahatag ang gidahom sa mga estudyante. Pananglitan, human sa daghang tuig nga pagsakripisyo ug pagpangutang aron mabayran ang pag-eskuwela, daghan ang wala makasulod sa trabaho nga ilang gusto. Ang report ni Rachel Mui sa Business Times sa Singapore nag-ingon: “Nagkadaghan ang mi-graduate sa unibersidad ang wala gihapoy trabaho.” Si Jianjie, nga taga-Taiwan ug taas kaayog edukasyon, miingon, “Daghan ang napugos sa pagdawat ug trabaho nga walay koneksiyon sa ilang kurso.”

Bisan pag ang uban nakatrabaho sa ilang gipili nga propesyon, ang ilang kinabuhi lahi ra kaayo sa ilang gidahom. Human sa iyang pag-eskuwela sa unibersidad sa United Kingdom, si Niran, nga taga-Thailand, nadawat sa trabaho nga iyang gusto. “Tungod sa akong kurso, nakakita kog trabaho nga dakog suweldo. Pero kay dako man kog suweldo, obligado ko nga mohatag ug dakong panahon sa pagtrabaho. Sa ulahi, ang kompaniya nanangtang ug daghang trabahante, ug naapil ko. Nakita nako nga wala gyoy kasegurohan ang bisan unsang trabaho.”

Bisan ang mga dato o kadtong morag maayog kinabuhi naa gihapoy mga problema sa pamilya, masakit, ug mabalaka gihapon bahin sa kuwarta. Si Katsutoshi, nga gikan sa Japan, miingon, “Daghan kog kuwarta, pero dili ko malipayon tungod sa kompetisyon ug daghan ang nasina ug nang-bully nako.” Si Lam, nga taga-Vietnam, miingon, “Daghan ang naghago pag-ayo para sa dakog suweldo nga trabaho aron dili sila magkaproblema sa pinansiyal, pero ang tinuod, lahi ang resulta—grabeng kabalaka, mga sakit, grabeng stress, ug depresyon.”

Sama kang Franklin, daghan ang nakaamgo nga naa pay mas importante sa taas nga edukasyon ug kuwarta. Imbes magpokus sa materyal nga mga butang, ang uban naningkamot nga mahimong maayong tawo ug mohimog maayo sa uban aron makabaton ug mas maayong kaugmaon. Kini ba makagarantiya ug maayong kaugmaon? Tubagon kana sa sunod nga artikulo.