Tambag sa Bibliya: “Ayaw ninyog higugmaa ang kuwarta, hinuon magmakontento mo kon unsay naa ninyo.”​—Hebreohanon 13:5.

Ang kalibotan karon nagtanyag ug daghan kaayong butang nga kinahanglan kuno natong mabatonan. Pero ang Bibliya nag-ingon nga ‘magmakontento kon unsay naa nato.’ Sa unsang paagi?

Ayaw ‘higugmaa ang kuwarta.’ Tungod sa “gugma sa kuwarta,” gisakripisyo sa uban ang ilang panglawas, pamilya, mga higala, ug bisan ang ilang dignidad. (1 Timoteo 6:10) Sayang lang ang ilang gisakripisyo! Ang tinuod, kadtong mahigugmaon sa bahandi “dili matagbaw.”​—Ecclesiastes 5:10.

Pabilhi ang mga tawo, dili ang mga butang. Tinuod, makatabang ang materyal nga mga butang. Pero ang mga butang dili makapakitag gugma ug apresasyon nato; tawo ray makahimo niana. Ang pagbaton ug “tinuod nga higala” makatabang nato nga magmakontento sa kinabuhi.​—Proverbio 17:17.

Tambag sa Bibliya: “Ang malipayong kasingkasing maayo nga tambal.”​—Proverbio 17:22.

Ang kalipay samag “maayo nga tambal” nga makatabang nato sa paglahutay dihang magsakit. Pero sa unsang paagi ta magmalipayon bisag nag-antos sa sakit?

Magmapasalamaton. Kon pirme ra problema ang atong hunahunaon, para nato dili maayo “ang tanang adlaw.” (Proverbio 15:15) Hinuon, ang Bibliya nagtambag nga ‘magmapasalamaton.’ (Colosas 3:15) Apresyaha bisan ang simpleng mga butang, sama sa pagsalop sa adlaw, preskong hangin, o pahiyom sa imong minahal. Kining mga butanga makahatag ug kalipay nato.

Tabangi ang uban. Bisag dili maayo ang atong panglawas, “dunay labaw nga kalipay sa paghatag kay sa pagdawat.” (Buhat 20:35) Dihang apresyahon sa uban ang atong gihimo para nila, malipay ta ug dili kaayo ta magsigeg hunahuna sa atong mga problema. Mahimong mas maayo ang atong kinabuhi kon motabang ta sa uban nga makabatog maayong kinabuhi.

Tambag sa Bibliya: ‘Seguroa ang mas importanteng mga butang.’​—Filipos 1:10.

Kon ang magtiayon wala na kaayoy panahon sa usag usa, posibleng madaot ang ilang relasyon. Busa maalamon gyod nga himoong prayoridad sa mga bana ug asawa ang ilang kaminyoon, nga usa sa mas importanteng mga butang sa kinabuhi.

Paggahig panahon nga magkauban mo. Imbes mag-iyahay sa paghimo sa mga kalihokan o mga hilig, pagsabot mo nga mag-uban sa usa ka kalihokan. “Ang duha mas maayo kay sa usa,” nag-ingon ang Bibliya. (Ecclesiastes 4:9) Puwede mong mag-uban sa pagluto, pag-ehersisyo, paglingawlingaw, o sa pagmeryenda.

Ipakita ang imong pagmahal. Gidasig sa Bibliya ang bana ug asawa nga higugmaon ug tahoron ang usag usa. (Efeso 5:28, 33) Ang tam-is nga pahiyom, mahigugmaong gakos, o simpleng regalo dakog mahimo sa pagpalig-on sa kaminyoon. Siyempre, ang seksuwal nga relasyon angayng ihatag ngadto lang sa imong kapikas.​—Hebreohanon 13:4.