Ang astrolohiya maoy usa ka klase sa pagpanag-an nga gibase sa pagtuo nga ang mga bituon, bulan, ug planeta dakog epekto sa kinabuhi sa tawo dinhi sa kalibotan. Ang mga astrologo nag-ingon nga ang personalidad ug kaugmaon sa usa ka tawo nagdepende sa posisyon sa bituon, bulan, ug planeta dihang gipanganak siya.

Bisag nagsugod ang astrolohiya sa karaang Babilonya, popular gihapon kini karon. Sumala sa 2012 nga survey sa United States, mga 33 porsiyento sa gi-survey ang nagtuo nga ang astrolohiya “morag gibase sa science,” ug 10 porsiyento ang nag-ingon nga kini “gibase gyod sa science.” Tinuod ba? Dili. Kini ang mga rason.

• Ang mga planeta ug bituon walay puwersa nga makaapektar sa tawo, dili sama sa giingon sa mga astrologo.

• Sagad ang mga prediksiyon lapad kaayo, nga puwedeng mahitabo kang bisan kinsa.

• Ang mga kalkulasyon sa mga astrologo karon gibase sa karaang pagtuo nga ang mga planeta naglibot sa planetang Yuta. Pero ang tinuod, ang mga planeta maoy naglibot sa adlaw.

• Ang lainlaing astrologo dili parehas ug prediksiyon sa usa ka indibiduwal.

• Sa astrolohiya, ang mga tawo gibahinbahin sa 12 ka kategoriya, o zodiac sign, base sa ilang birth date. Kay nausab ang posisyon sa atong planeta diha sa kawanangan sulod sa gatosan ka katuigan, ang mga petsa nga konektado sa mga zodiac sign dili na motakdo sa mga konstelasyon diin gibase ang ngalan sa mga zodiac sign.

Ang mga zodiac sign magpaila kuno kon unsay kinaiya sa usa ka tawo. Pero ang tinuod, ang mga tawo nga parehas ug birthday lainlaig kinaiya; ang birth date walay koneksiyon sa personalidad sa usa ka tawo. Imbes lantawon ang mga tawo kon unsa gyod sila, gihukman sa mga astrologo ang kinaiya ug karakter sa usa ka tawo pinaagig mga panaghap. Dili ba usa kini ka diskriminasyon?

Sukad sa karaang panahon, ang mga tawo mokonsultag mananag-an. Hatagan niinig kahulogan ang mga butang sama sa tinai, atay, o apdo sa mga hayop ug tawo o paagi sa pagtuhik sa manok sa pagkaon niini. Ang uban manag-an base sa porma sa dahon sa tsa o sa kape nga gigaling. Karon, mogamit silag mga tarot card, bolang kristal, dice, ug uban pa aron tag-anon ang kaugmaon sa usa ka tawo. Kasaligan ba gyod ang pagpanag-an? Dili. Hisgotan nato ang mga rason.

Ang mga prediksiyon sa lainlaing paagi sa pagpanag-an sagad managlahi. Gani, bisag parehas ra ang paagi sa pagpanag-an, lainlain ang prediksiyon. Pananglitan, kon ang usa ka tawo mokonsultag duha ka mananag-an ug parehas ra ang iyang pangutana nila bahin sa umaabot, angay unta nga parehas ang ilang tubag base sa ilang “mabasa” sa baraha. Pero sagad dili.

Kaduhaduhaan ang paagi o motibo sa mga mananag-an. Ang mga kritiko nag-ingon nga ang mga baraha o bolang kristal mga props lang ug ibase sa mga mananag-an ang ilang prediksiyon diha sa reaksiyon sa nagpatag-an imbes sa mga props. Pananglitan, ang ekspertong mananag-an mangutanag komon nga mga pangutana ug panid-an niyag maayo ang bisan unsang butang nga makahatag niyag ideya bahin sa iyang kliyente. Dayon, isulti niya ang mga impormasyon bahin sa iyang kliyente. Pero ang tinuod, nakuha ra niya ang maong impormasyon base sa iyang napanid-an. Kay napatuo nila ang ilang mga kliyente, nakakuwartag dako ang ubang mananag-an.

Ang astrolohiya ug pagpanag-an nagpakita nga ang atong kaugmaon gitakda nang daan. Pero tinuod ba na? Ang Bibliya nag-ingon nga naa tay kagawasan sa pagpili kon unsay atong tuohan o buhaton ug nga ang atong mga desisyon makaapektar sa atong kaugmaon.​—Josue 24:15.

Ang mga magsisimba sa Diyos dunay dugang rason kon nganong dili sila mokonsulta sa mananag-an o astrolohiya—gidumtan sa Diyos ang tanang klase sa pagpanag-an. Ato kining mabasa diha sa Bibliya: “Kinahanglang walay bisan kinsa ninyo nga . . . manag-an, maghimog salamangka, mangitag mga tilimad-on, mamarang, manglamat, mangonsultag espiritista o mananag-an, o magpakisayod sa mga patay. Kay gidumtan ni Jehova kadtong nagabuhat niining mga butanga.” a​—Deuteronomio 18:10-12.