Para kang María, Raúl, Arne, ug uban pa, ang pag-ampo maoy espesyal nga regalo. Ilang gibati nga pinaagi sa pag-ampo, sila makaestorya sa Diyos, makapasalamat kaniya, ug makahangyo sa iyang tabang. Kombinsido sila nga tinuod ang gipasalig sa Bibliya bahin sa pag-ampo ngadto sa Diyos: “May pagsalig ta niya nga bisan unsay atong pangayoon uyon sa iyang kabubut-on, maminaw siya nato.”​—1 Juan 5:14.

Pero daghan ang dili motuo sa giingon sa Bibliya bahin sa pag-ampo. Gisulti ni Steve kon unsay iyang gibati bahin sa pag-ampo: “Niadtong 17 anyos ko, namatay ang akong tulo ka amiga tungod sa aksidente. Ang usa naaksidente sa sakyanan, ug ang duha nalumos sa dagat.” Unsay gihimo ni Steve? “Nag-ampo ko sa Diyos kon nganong nahitabo kadto, pero  wala tubaga ang akong mga pag-ampo. Maong nakaingon ko, ‘Nganong mag-ampo pa man ko?’” Tungod kay gibati sa uban nga wala tubaga ang ilang mga pag-ampo, sila naghunahuna nga walay pulos nga mag-ampo.

Naa poy rason ang uban kon nganong dili sila moampo. Moingon sila nga tungod kay nahibalo ang Diyos sa tanang butang, nasayod na siya sa atong mga panginahanglan ug mga problema, busa dili na kinahanglan nga isulti kana kaniya.

Nagtuo sab ang uban nga dili paminawon sa Diyos ang ilang mga pag-ampo tungod sa mga sayop nga ilang nahimo. Si Jenny miingon: “Nalisdan gyod ko kay pirme kong mobating walay pulos. Tungod sa mga butang nga akong nahimo, naghunahuna ko nga dili ko angayng paminawon sa Diyos.”

Unsay imong hunahuna bahin sa pag-ampo? Kon nagduhaduha ka bahin sa pag-ampo, makasalig ka nga matubag sa Bibliya ang imong mga pangutana bahin sa pag-ampo. a Apil niana kini nga mga pangutana:

• Maminaw ba gyod ang Diyos sa atong mga pag-ampo?

• Nganong wala tubaga ang ubang pag-ampo?

• Unsaon nimo pag-ampo aron dunggon ka sa Diyos?

• Sa unsang paagi ang pag-ampo makatabang nimo?