ANG UBAN MOTUBAG UG DILI. Usa ka doktor miingon nga ang paggamit ug Bibliya ingong giya sama rag paggamit ug libro nga gisulat panahon pa sa 1920 sa pagtudlog chemistry. Tingali pangutan-on ka sa usa ka tawo nga dili motuo ug Bibliya kon mogamit ka bag manual sa karaang computer nga imong tamdan kon unsaon paggamit sa bag-ong computer. Sa ato pa, para sa uban ang Bibliya dili na gyod praktikal kay kini karaan na.

Duna pa ba goy mogamit nianang karaang giya niining moderno, high-tech nga kalibotan karon? Daghang website ug blog kanunayng naghatag ug kinabag-ohang tambag ug giya. Ang mga programa sa TV nagpresentar ug mga tambag sa mga psychologist, lifestyle guru, ug mga awtor. Ug ang mga bookstore namaligyag daghang libro nga naghisgot kon unsaon pagsulbad sa personal nga mga problema, nga mikita ug bilyonbilyong dolyares.

Sa kadaghan sa bag-ong mga impormasyon nga mabatonan karon, nganong sa Bibliya pa man kita mangitag giya nga mga 2,000 ka tuig na man kining natapos pagsulat? Dili kaha husto ang giingon sa mga dili motuo ug Bibliya nga ang paggamit ug ingon niini ka karaang basahon ingong giya sama rag paggamit ug karaang libro sa chemistry o manual sa computer? Ang tinuod, sayop kana nga pangatarongan. Ang siyensiya ug teknolohiya dali kaayong mausab, apan nausab ba ang pangunang mga panginahanglan sa tawo? Ang tawo gusto gihapong mahibalo sa katuyoan sa kinabuhi ug gustong makabatog kalipay, kasegurohan, maayong relasyon sa pamilya, ug malipayong panaghigalaay.

Bisag karaan na, ang Bibliya makatagana sa maong mga panginahanglan ug sa uban pa. Ang mga magsusulat niini dinasig sa atong Maglalalang. Kini dunay mga giya sa tanang bahin sa atong kinabuhi ug motabang nato sa pagsagubang sa bisan unsang problema. (2 Timoteo 3:16, 17) Dugang pa, kini dunay mga tambag nga walay paglubad​—tambag nga dili gyod mabiyaan sa panahon! Ang Bibliya nag-ingon: “Ang pulong sa Diyos buhi.”​—Hebreohanon 4:12.

Ang giingon ba sa Bibliya tinuod? Kini ba karaan na, o kini ba hinuon ang labing mapuslanon ug praktikal sa tanang basahon​—usa ka buhing basahon? Gipadayag niini nga edisyon sa Bantayanang Torre, nga una sa serye sa espesyal nga mga isyu, ang mga tubag niana nga mga pangutana.