1, 2. Unsay kinahanglan nimong ipangutana sa imong kaugalingon, ug nganong importante kini?

 SA IMONG pagtuon sa Bibliya, imong nakat-onan nga daghan ang nag-angkong nagsimba sa Diyos pero ang ilang ginatudlo o ginahimo gidumtan sa Diyos. (2 Corinto 6:17) Kanay rason nga gisugo ta ni Jehova nga mogula sa bakak nga relihiyon, ang “Bantogang Babilonya.” (Pinadayag 18:2, 4) Unsay imong himoon? Kitang tanan angayng modesisyon ug mangutana sa atong kaugalingon, ‘Gusto ba nakong simbahon ang Diyos sa paagi nga gusto niya o sa paagi nga akong naandan?’

² Kon mibiya na ka sa bakak nga relihiyon, maayo kana. Pero basig naa pay kalihokan ug kostumbre sa bakak nga relihiyon nga dili nimo mabiyaan. Atong hisgotan ang pipila niini ug susihon kon nganong importante kaayo nga atong sundogon ang panglantaw ni Jehova bahin niini.

3. (a) Nganong nalisdan ang uban nga mohunong sa paggamit ug imahen sa pagsimba? (b) Unsay giingon sa Bibliya bahin sa paggamit ug imahen?

³ Ang uban dugay nang naggamit ug mga imahen o ampoanan diha sa ilang balay aron simbahon ang Diyos. Kon kanay imong ginahimo, basin bation nimo nga lain o sayop ang pagsimba nga wala kining mga butanga. Pero hinumdomi nga gitudloan ta ni Jehova kon unsaon siya pagsimba. Ug ang Bibliya klarong nag-ingon nga dili  niya gustong mogamit tag imahen sa pagsimba.​—Basaha ang Exodo 20:4, 5; Salmo 115:4-8; Isaias 42:8; 1 Juan 5:21.

4. (a) Nganong dili nato angayng simbahon ang atong katigulangan? (b) Nganong gidid-an ni Jehova ang iyang katawhan sa pagpakig-estorya sa mga patay?

⁴ Ang uban tingali maggahin ug dakong panahon ug kusog aron pahimut-an ang ilang namatay nga katigulangan. Lagmit ila pa gani silang simbahon. Pero atong nakat-onan nga ang mga patay dili makatabang o dili makadaot nato. Dili sila magpabiling buhi sa laing dapit. Gani, delikado ang pagpakig-estorya kanila kay ang bisan unsang mensahe nga morag gikan sa namatay, sa tinuod lang, gikan sa mga demonyo. Busa gidid-an ni Jehova ang mga Israelinhon sa pagpakig-estorya sa mga patay o pag-apil sa bisan unsang matang sa demonismo.​—Deuteronomio 18:10-12; tan-awa ang Endnotes 26 ug 31.

5. Unsay makatabang nimo nga mahunong ang paggamit ug imahen sa pagsimba sa Diyos o ang pagsimba sa katigulangan?

⁵ Unsay makatabang nimo nga mahunong ang paggamit ug imahen sa pagsimba sa Diyos o ang pagsimba sa katigulangan? Kinahanglan nimong basahon ang Bibliya ug hunahunaon pag-ayo ang panglantaw ni Jehova sa maong mga butang. Iya kining “gidumtan.” (Deuteronomio 27:15) Pag-ampo kang Jehova kada adlaw nga tabangan ka nga masundog ang iyang panglantaw ug simbahon siya sa paagi nga gusto niya. (Isaias 55:9) Makasalig ka nga tagaan ka ni Jehova sa kusog nga gikinahanglan aron imong mawala sa imong kinabuhi ang bisan unsa nga konektado sa bakak nga pagsimba.

6. Nganong ang Disyembre 25 maoy gipili nga petsa nga saulogon ang pagkatawo ni Jesus?

⁶ Sa tibuok kalibotan, ang Pasko usa ka ilado kaayo nga holiday (selebrasyon), ug ang kadaghanan nagtuo nga  pagsaulog kini sa pagkatawo ni Jesus. Pero ang tinuod, konektado ni sa bakak nga pagsimba. Ang usa ka ensiklopedia nag-ingon nga ang birthday sa Adlaw gisaulog sa paganong mga Romano sa Disyembre 25. Gusto sa mga lider sa relihiyon nga daghan pang pagano ang mahimong Kristiyano, maong bisag wala matawo si Jesus sa Disyembre 25, midesisyon sila nga saulogon ang iyang adlawng natawhan nianang petsaha. (Lucas 2:8-12) Ang mga tinun-an ni Jesus wala magsaulog ug Pasko. Ang usa ka libro nag-ingon nga 200 ka tuig human ipanganak si Jesus, “walay nahibalo ug pipila ra ang interesado kon kanus-a gyod siya natawo.” (Sacred Origins of Profound Things) Nagsugod ang pagsaulog sa Pasko gatosan ka tuig human magkinabuhi si Jesus sa yuta.

7. Nganong dili magsaulog ug Pasko ang tinuod nga mga Kristohanon?

⁷ Daghan ang nahibalo sa paganong sinugdanan sa Pasko ug sa mga tradisyon niini, sama sa paglipaylipay ug paghatag ug regalo. Pananglitan, sa England ug sa ubang bahin sa America, dihay panahon nga gidili ang pagsaulog niini kay pagano kinig sinugdanan. Ang nagsaulog niini gisilotan. Pero paglabay sa panahon gisaulog na pod kini. Nganong dili magsaulog ug Pasko ang tinuod nga mga Kristohanon? Kay gusto nilang mapalipay ang Diyos sa tanan nilang himoon.

8, 9. Nganong dili magsaulog ug birthday ang unang mga Kristohanon?

⁸ Ang laing iladong selebrasyon mao ang pagsaulog ug birthday. Angay ba kining saulogon sa mga Kristohanon? Ang Bibliya naghisgot ug birthday, pero ang nagsaulog niini dili mga alagad ni Jehova. (Genesis 40:20; Marcos 6:21) Ang birthday gisaulog kaniadto aron pasidunggan ang bakak nga mga diyos. Kanay rason nga ang  unang mga Kristohanon “nag-isip sa pagsaulog ug birthday ingong paganong kostumbre.”​—The World Book Encyclopedia.

⁹ Ang mga Romano ug mga Grego kaniadto nagtuo nga dunay espiritu nga presente dihang ipanganak ang matag tawo ug proteksiyonan niini ang maong tawo sa tibuok niyang kinabuhi. “Ang maong espiritu dunay misteryosong relasyon sa diyos kansang birthday mao pod ang adlaw nga gipanganak ang maong tawo,” nag-ingon ang librong The Lore of Birthdays.

10. Nganong dili angayng magsaulog ug birthday ang mga Kristohanon karon?

¹⁰ Sa imong hunahuna, uyonan kaha ni Jehova ang mga selebrasyon nga konektado sa bakak nga relihiyon? (Isaias 65:11, 12) Dili gayod. Kanay rason nga dili ta magsaulog ug birthday o holiday nga konektado sa bakak nga relihiyon.

11. Nganong ang uban nagsaulog ug mga holiday? Unsay angay nimong unahon?

¹¹ Ang uban nahibalo nga pagano ang sinugdanan sa Pasko ug sa ubang holiday, pero nagsaulog gihapon sila niini. Para nila, maayong higayon ni nga makauban ang ilang pamilya. Kana bay imong gibati? Dili sayop nga gusto kang makig-uban sa imong pamilya. Si Jehova ang naghimo sa pamilya, ug gusto niya nga masuod ta nila. (Efeso 3:14, 15) Pero kinahanglang unahon nato ang pagpakigsuod kang Jehova imbes pahimut-an ang atong mga paryente pinaagi sa pagsaulog ug mga selebrasyon sa bakak nga relihiyon. Busa si apostol Pablo miingon: “Seguroa kanunay kon unsay dalawaton sa Ginoo.”​—Efeso 5:10.

12. Unsay rason nga dili uyonan ni Jehova ang usa ka holiday?

¹² Daghan ang nagtuo nga dili importante kon unsay  sinugdanan sa usa ka holiday, pero lahi ang hunahuna ni Jehova. Supak siya sa mga holiday nga konektado sa bakak nga pagsimba o nagbayaw ug mga tawo o mga simbolo sa nasod. Pananglitan, ang Ehipto kaniadto daghag selebrasyon para sa ilang bakak nga mga diyos. Human makabiya sa Ehipto ang mga Israelinhon, ilang gisundog ang usa ka paganong selebrasyon sa Ehipto ug gitawag kinig “pista para kang Jehova.” Pero gisilotan sila ni Jehova tungod niana. (Exodo 32:2-10) Si propetang Isaias miingon nga dili ta angayng ‘mohikap ug bisan unsang hugaw!’​—Basaha ang Isaias 52:11.

13. Unsa tingali ang imong mga pangutana dihang makadesisyon ka nga dili na magsaulog ug holiday?

¹³ Dihang makadesisyon ka nga dili na magsaulog ug holiday, basig daghan kag pangutana. Pananglitan: Unsay akong himoon dihang mangutana ang akong mga katrabaho kon nganong dili ko moapil nila sa pagsaulog ug Pasko? Unsay akong himoon kon naay mohatag nakog pinaskohan? Unsay akong himoon kon gusto sa akong kapikas nga moapil ko sa usa ka holiday? Unsay akong himoon aron dili maguol ang akong mga anak kay dili sila makasaulog ug holiday o birthday?

14, 15. Unsay imong himoon kon dunay moingon nimog “Merry Christmas” o mohatag nimog regalo?

¹⁴ Importante nga hunahunaon nimo kon unsay praktikal nga isulti ug buhaton sa matag situwasyon. Pananglitan, kon dunay moingon nimog “Merry Christmas,” tagda pod siya. Puwede kang moingon, “Salamat.” Pero kon dunay mangutana, puwede nimong ipatin-aw kon nganong dili ka magsaulog ug holiday. Pero kanunayng ipakita ang kaayo ug pagtahod. Ang Bibliya nag-ingon: “Himoa ang inyong sinultihan nga kanunayng maayo, tinimplahag  asin, aron mahibalo mo kon unsaon pagtubag ang matag tawo.” (Colosas 4:6) Tingali puwede nimong ipatin-aw nga ganahan kang maglipaylipay kauban ang ubang tawo ug mohatag ug regalo pero dili lang nimo gusto nga himoon kana panahon sa maong mga holiday.

¹⁵ Unsay imong himoon kon naay mohatag nimog regalo? Ang Bibliya wala maghatag ug listahan sa mga balaod, pero nag-ingon ni nga kinahanglang hinlo ang atong konsensiya. (1 Timoteo 1:18, 19) Tingali ang naghatag wala mahibalo kon nganong dili ka magsaulog ug holiday. O basig moingon siya, “Nahibalo ko nga dili ka magsaulog ani nga holiday, pero gusto gihapon nako ning ihatag nimo.” Niana nga mga situwasyon, ikaw ang mag-igo kon dawaton ba nimo ang regalo o dili. Pero bisan unsa may imong desisyon, seguroa nga hinlo ang imong konsensiya. Dili nato gusto nga mohimog bisan unsa nga makadaot sa atong relasyon kang Jehova.

16. Unsay angay nimong himoon kon gusto sa imong pamilya nga magsaulog ug holiday?

¹⁶ Unsay imong himoon kon gusto sa imong pamilya nga magsaulog ug holiday? Dili ka angayng makiglalis nila. Hinumdomi nga duna silay katungod nga modesisyon sa ilang gustong himoon. Ipakita ang kaayo ug tahora ang ilang desisyon sama nga gusto nimong tahoron nila ang imong desisyon. (Basaha ang Mateo 7:12.) Pero kon gusto sa imong pamilya nga makauban ka nila panahon sa holiday, unsay imong himoon? Sa dili pa modesisyon, ampo kang Jehova nga tabangan kang makahimog hustong desisyon. Hunahunaa ang situwasyon ug pag-research. Hinumdomi, gusto nimong mapalipay kanunay si Jehova.

17. Unsay imong mahimo aron dili masina ang imong mga anak dihang ang uban nagsaulog ug holiday?

 ¹⁷ Unsay imong mahimo aron dili masina ang imong mga anak dihang ang uban nagsaulog ug holiday? Puwedeng duna kay himoong espesyal para nila matag karon ug unya. Mahimo sab nimong sorpresahon silag mga regalo. Ug usa sa kinamaayohang mga regalo nga ikahatag nimo kanila mao ang imong panahon ug gugma.

18. Nganong angay tang motambong sa Kristohanong mga tigom?

¹⁸ Aron mapalipay si Jehova, kinahanglan natong biyaan ang bakak nga relihiyon ug ang mga kostumbre ug holiday nga konektado niini. Apan kinahanglan sab natong simbahon ang Diyos sa hustong paagi. Unsaon? Usa ka paagi mao ang regular nga pagtambong sa Kristohanong mga tigom. (Basaha ang Hebreohanon 10:24, 25.) Ang mga tigom maoy importante kaayong bahin sa matuod nga pagsimba. (Salmo 22:22; 122:1) Atong madasig ang usag usa dihang magtigom ta.​—Roma 1:12.

19. Nganong importanteng sultihan ang uban bahin sa imong nakat-onan nga mga kamatuoran sa Bibliya?

¹⁹ Ang laing bahin sa matuod nga pagsimba mao ang pagpakigsulti sa uban bahin sa imong nakat-onan sa Bibliya. Daghan ang naguol sa daotang nagakahitabo sa kalibotan. Tingali duna kay nailhan nga ingon niana ang pagbati. Sultihi sila sa imong nindot nga paglaom sa umaabot. Dihang motambong kag Kristohanong mga tigom ug mosulti sa uban bahin sa kamatuoran sa Bibliya, sa ngadtongadto bation nimo nga dili na ka gustong makigbahin sa bakak nga relihiyon ug sa mga kostumbre niini. Magmalipayon ka ug panalanginan pag-ayo ni Jehova ang imong paningkamot sa pagsimba kaniya sa hustong paagi.​—Malaquias 3:10.