1. Nganong maayong mahibalo ta bahin sa mga anghel?

 GUSTO ni Jehova nga mahibalo ta bahin sa iyang pamilya. Ang mga anghel maoy bahin sa pamilya sa Diyos. Sa Bibliya gitawag silag “anak sa Diyos.” (Job 38:7) Unsay ginahimo sa mga anghel? Giunsa nila pagtabang ang mga tawo kaniadto? Makatabang ba pod sila nato karon?—Tan-awa ang Endnote 8.

2. Kinsay naghimo sa mga anghel? Pila sila ka buok?

² Kinahanglang mahibalo ta kon kinsay naghimo sa mga anghel. Ang Colosas 1:16 nag-ingon nga human lalanga ni Jehova si Jesus, gihimo sab “ang tanang ubang butang sa langit ug sa yuta.” Apil niana ang mga anghel. Pila sila ka buok? Sumala sa Bibliya dunay ginatos ka milyong mga anghel.—Salmo 103:20; Pinadayag 5:11.

3. Unsay giingon sa Job 38:4-7 bahin sa mga anghel?

³ Ang Bibliya nagtudlo sab nga gilalang na ni Jehova ang mga anghel ayha niya lalanga ang yuta. Unsay ilang gibati pagkakita nila sa yuta? Ang basahon sa Job nag-ingon nga sila nalipay pag-ayo. Suod sila nga pamilya nga nagkahiusa sa pag-alagad kang Jehova.—Job 38:4-7.

4. Nganong nahibalo ta nga ang mga anghel interesado sa mga tawo?

⁴ Ang mga anghel kanunayng interesado sa mga tawo ug sa kabubut-on ni Jehova para sa yuta ug sa mga tawo. (Proverbio 8:30, 31; 1 Pedro 1:11, 12) Naguol gayod sila dihang mirebelde si Adan ug Eva. Samot na karon kay  nakita nila nga ang kadaghanang tawo misupak kang Jehova. Pero dihang may maghinulsol ug mobalik sa Diyos, ang mga anghel malipay pag-ayo. (Lucas 15:10) Interesado kaayo sila sa mga alagad sa Diyos. Gigamit sila ni Jehova aron tabangan ug proteksiyonan ang iyang mga alagad sa yuta. (Hebreohanon 1:7, 14) Maghisgot tag pipila ka pananglitan.

5. Sa unsang paagi gitabangan sa mga anghel ang mga alagad sa Diyos kaniadto?

 ⁵ Si Jehova nagpadalag duha ka anghel aron luwason si Lot ug ang iyang pamilya dihang gilaglag ang siyudad sa Sodoma ug Gomora. (Genesis 19:15, 16) Paglabay ug gatosan ka tuig, si propetang Daniel gitambog sa langob sa mga leyon, pero wala siya maunsa kay ang “Diyos nagpadala sa iyang anghel ug gitak-om niya ang baba sa mga leyon.” (Daniel 6:22) Sa ulahi, dihang gipriso si apostol Pedro, si Jehova nagpadalag anghel aron pagawson siya. (Buhat 12:6-11) Si Jesus gitabangan sab sa mga anghel sa dinhi siya sa yuta. Pananglitan, gihimo nila kini human siya bawtismohi. (Marcos 1:13) Sa hapit nang patyon si Jesus, may anghel nga “nagpalig-on kaniya.”—Lucas 22:43.

6. (a) Nganong nahibalo ta nga ang mga anghel motabang sa katawhan sa Diyos karon? (b) Unsang mga pangutana ang atong hisgotan?

⁶ Karon ang mga anghel dili na magpakita sa mga tawo. Pero gigamit gihapon sila sa Diyos aron tabangan ang iyang mga alagad. Ang Bibliya nag-ingon: “Ang anghel ni Jehova nagkampo libot niadtong mga nahadlok Kaniya, ug siya nagluwas kanila.” (Salmo 34:7) Nganong nagkinahanglan tag proteksiyon? Kay duna tay gamhanang mga kaaway nga gustong modaot nato. Kinsa sila? Unsay ilang sinugdanan? Unsaon ta nila pagdaot? Aron matubag ni, sayron nato kon unsay nahitabo human lalanga si Adan ug Eva.

7. Unsay resulta sa pag-ilad ni Satanas sa mga tawo?

⁷ Nakat-onan nato sa Kapitulo 3 nga dihay anghel nga mirebelde sa Diyos ug gustong magmando sa uban. Gitawag siya sa Bibliya ug Satanas nga Yawa. (Pinadayag 12:9) Gusto sab niya nga ang uban morebelde sa Diyos. Nailad niya si Eva, ug sukad niadto nailad sab niya  ang kadaghanang tawo. Pero ang uban, sama kang Abel, Enoc, ug Noe, nagpabiling matinumanon kang Jehova.—Hebreohanon 11:4, 5, 7.

8. (a) Nganong ang ubang anghel nahimong mga demonyo? (b) Unsay gihimo sa mga demonyo aron dili mamatay sa Lunop?

⁸ Sa panahon ni Noe, ang pipila ka anghel mirebelde ug mibiya sa langit aron mopuyo sa yuta ingong mga tawo. Ngano? Ang Bibliya nag-ingon nga gusto nilang makabaton ug asawa. (Basaha ang Genesis 6:2.) Pero dili na angayng himoon sa mga anghel. (Judas 6) Sama sa maong daotang mga anghel, kadaghanang tawo niadtong panahona nahimong daotan ug bayolente. Busa si Jehova nagpadalag Lunop (o, baha sa tibuok kalibotan) aron laglagon ang daotan. Pero giluwas niya ang iyang matinumanong mga alagad. (Genesis 7:17, 23) Aron dili mamatay, mibalik sa langit ang daotang mga anghel. Gitawag sila sa Bibliya ug mga demonyo. Mirebelde sila uban kang Satanas, ug ang Yawa nahimong ilang magmamando.—Mateo 9:34.

9. (a) Unsay nahitabo sa mga demonyo pagbalik nila sa langit? (b) Unsay sunod natong hisgotan?

⁹ Kay mga rebelde sila, ang mga demonyo wala na ilha ni Jehova ingong bahin sa iyang pamilya. (2 Pedro 2:4) Dili na sila mahimong tawo, pero ‘gipahisalaag’ gihapon nila ang tibuok yuta. (Pinadayag 12:9; 1 Juan 5:19) Hisgotan nato kon giunsa nila pag-ilad, o pagpahisalaag, ang daghang tawo.—Basaha ang 2 Corinto 2:11.

10. Giunsa pag-ilad sa mga demonyo ang mga tawo?

¹⁰ Giilad sa mga demonyo ang mga tawo sa daghang paagi. Kon makig-estorya ang mga tawo sa mga demonyo himoon nila kini sa direktang paagi o pinaagi sa  laing tawo, sama sa mga albularyo o espiritista. Gitawag kini nga demonismo o espiritismo. Pero ang Bibliya nag-ingon nga likayan nato ang bisan unsa nga konektado sa mga demonyo. (Galacia 5:19-21) Ngano? Sama nga ang mangangayam mogamit ug lit-ag aron makadakop ug hayop, ang mga demonyo mogamit sab ug mga pangilad aron malit-agan ug makontrolar ang mga tawo.—Tan-awa ang Endnote 26.

11. Unsa ang pagpanag-an, ug nganong angay nato ning likayan?

¹¹ Usa sa ilang paagi sa pagpangilad mao ang pagpanag-an. Kini maoy paggamit ug gahom aron ila kunong mahibaloan ang umaabot o ang mga butang nga wala mahibaloi. Himoon tingali ni sa uban pinaagi sa pagtan-aw sa mga bituon, pagpangitag mga tilimad-on, pagbasa sa tarot nga mga baraha, paggamit ug bolang kristal, o pagbasa sa palad sa tawo. Daghan ang nagtuo nga dili ni makadaot, pero dili na tinuod. Peligroso kaayo ni. Pananglitan, gipakita sa Bibliya nga ang mga demonyo ug mga mananag-an nagtinabangay. Atong mabasa sa Buhat 16:16-18 ang bahin sa “usa ka demonyo sa pagpanag-an” nga mitabang sa usa ka babaye aron “makapanag-an.” Human pagulaa ni apostol Pablo ang demonyo, ang babaye dili na makapanag-an.

12. (a) Nganong peligroso ang pagpakig-estorya sa mga patay? (b) Nganong ang mga alagad sa Diyos dili moapil sa mga kostumbre nga konektado sa mga demonyo?

¹² Naggamit sab ug laing pangilad ang mga demonyo aron malit-agan ang mga tawo. Patuohon ta nila nga puwedeng maestorya ang mga patay ug sila buhi gihapon sa laing dapit ug puwedeng makigsulti o modaot nato. Pananglitan, ang usa ka namatyan ug higala o paryente moadto tingali sa espiritista nga makaestorya kuno sa mga patay. Dayon, sultihan tingali siya sa  espiritista ug talagsaong impormasyon bahin sa namatay ug basin sundogon pa gani sa espiritista ang tingog sa namatay. (1 Samuel 28:3-19) Daghang kostumbre sa paglubong ang gibase sab sa pagtulon-an nga ang patay buhi pa gihapon sa laing dapit. Apil niini ang mga paglipaylipay human sa lubong, hubkas o kasumaran sa kamatayon, paghalad alang sa patay, rituwal sa pagkabalo, o ubang rituwal panahon sa haya. Dihang ang mga Kristohanon dili moapil niini, lagmit sawayon, insultohon, o isalikway sila sa ilang pamilya o komunidad. Pero ang mga Kristohanon nahibalo nga dili buhi sa laing dapit ang mga patay. Imposible ang pagpakig-estorya nila, ug dili sila makadaot nato. (Salmo 115:17) Busa pag-amping pag-ayo. Ayaw gyod pagpakig-estorya sa mga patay o mga demonyo ug ayaw pag-apil sa mga kostumbre nga konektado sa mga demonyo.—Basaha ang Deuteronomio 18:10, 11; Isaias 8:19.

13. Unsa nay gibati karon sa linibo ka tawo nga kaniadto nahadlok sa mga demonyo?

¹³ Gihadlok sab sa mga demonyo ang mga tawo. Karon, si Satanas ug ang iyang mga demonyo nahibalo nga “mubo na lang” ang ilang panahon ug hapit na silang wagtangon sa Diyos dinhi sa yuta, maong misamot sila ka bayolente ug ka bangis. (Pinadayag 12:12, 17) Pero linibo ka tawo nga nahadlok kaniadto sa mga demonyo ang wala na mahadlok karon. Ngano?

14. Sama sa mga Kristohanon sa unang siglo, sa unsang paagi ta makalingkawas sa mga demonyo?

¹⁴ Gisulti sa Bibliya kon sa unsang paagi masuklan nato ang mga demonyo ug mawala ang atong kahadlok kanila. Pananglitan, ang ubang tawo sa siyudad sa Efeso nakig-estorya sa mga demonyo sa wala pa  sila makakat-on sa kamatuoran. Sa unsang paagi sila nakalingkawas sa mga demonyo? Ang Bibliya nag-ingon: “Gitapok sa ubay-ubay niadtong naggamit ug salamangka ang ilang mga basahon ug gisunog kini atubangan sa tanan.” (Buhat 19:19) Kay gusto nilang mahimong Kristohanon, ilang gisunog ang tanan nilang libro bahin sa madyik. Mao sab nay kinahanglang himoon karon. Kon gusto natong moalagad kang Jehova, kinahanglang wad-on nato ang bisan unsa nga konektado sa mga demonyo. Apil niini ang mga libro, magasin, horoscope, salida, musika, dula, ug bisan mga poster nga nagpakita nga morag makalingaw o dili makadaot ang mga madyik, demonyo, o ang mga dili ingon nato. Apil pod niini ang mga butang nga isul-ob sa mga tawo isip proteksiyon batok sa daotang espiritu.—1 Corinto 10:21.

15. Unsa pay kinahanglan natong buhaton aron masuklan si Satanas ug ang mga demonyo?

¹⁵ Pipila ka tuig human sunoga sa taga-Efeso ang ilang mga libro bahin sa madyik, si apostol Pablo misulat nga ‘nakig-away’ gihapon sila “sa daotang espiritung mga puwersa.” (Efeso 6:12) Oo, bisan pag gisunog na nila ang ilang mga libro, naningkamot gihapon ang mga demonyo sa pagdaot kanila. Busa unsa pay kinahanglan nilang buhaton? Si Pablo miingon: “Dad-a ang dakong taming sa pagtuo, nga pinaagi niini mapalong [o, masagang] ninyo ang tanang nagdilaab nga pana sa daotan.” (Efeso 6:16) Sama nga ang taming makapanalipod sa sundalo, ang atong pagtuo makapanalipod nato. Kon hugot ang atong pagsalig nga si Jehova makapanalipod nato, atong masuklan si Satanas ug ang mga demonyo.—Mateo 17:20.

16. Unsay himoon aron mas molig-on ang atong pagtuo kang Jehova?

¹⁶ Unsay himoon aron mas molig-on ang atong pagtuo kang Jehova? Kinahanglang basahon nato ang Bibliya  kada adlaw ug mosalig kaniya alang sa proteksiyon. Kon hugot ang atong pagsalig kang Jehova, si Satanas ug ang mga demonyo dili makadaot nato.—1 Juan 5:5.

17. Unsa pay makapanalipod nato batok sa mga demonyo?

¹⁷ Unsa pay angayng himoon sa mga Kristohanon sa Efeso? Nagpuyo sila sa siyudad nga grabe ang demonismo. Busa giingnan sila ni Pablo: “Padayon mong mag-ampo . . . sa matag higayon.” (Efeso 6:18) Kinahanglan silang mangayog proteksiyon kang Jehova sa tanang panahon. Komosta kita? Grabe sab ang demonismo karon. Busa kinahanglan sab tang mangayog proteksiyon kang Jehova, ug kinahanglang gamiton nato ang iyang ngalan dihang moampo ta. (Basaha ang Proverbio 18:10.) Kon kanunay tang moampo kang Jehova nga luwason ta gikan kang Satanas, dunggon ta niya.—Salmo 145:19; Mateo 6:13.

18, 19. (a) Sa unsang paagi ta modaog sa pagpakig-away kang Satanas ug sa mga demonyo? (b) Unsay hisgotan sa sunod kapitulo?

¹⁸ Kon atong wad-on sa atong kinabuhi ang tanang butang nga konektado sa demonismo ug mosalig kang Jehova alang sa proteksiyon, atong masuklan si Satanas ug ang mga demonyo. Dili ta angayng mahadlok nila. (Basaha ang Santiago 4:7, 8.) Mas gamhanan si Jehova kay sa mga demonyo. Gisilotan niya sila sa panahon ni Noe, ug sa umaabot iya silang laglagon. (Judas 6) Hinumdomi nga wala ta mag-inusara sa atong pagpakig-away. Gigamit ni Jehova ang iyang mga anghel aron proteksiyonan ta. (2 Hari 6:15-17) Makasalig ta nga sa tabang ni Jehova, modaog ta sa pagpakig-away kang Satanas ug sa mga demonyo.—1 Pedro 5:6, 7; 2 Pedro 2:9.

¹⁹ Pero kon si Satanas ug ang mga demonyo maoy hinungdan sa grabeng pag-antos, nganong wala pa man sila laglaga sa Diyos? Hisgotan kini sa sunod kapitulo.