1. Asa nato mahibaloan ang bahin sa atong umaabot?

NAKASULAY na ba kag tan-aw ug balita unya nakaingon ka, ‘Unsa na lay mahitabo ining kalibotana?’ Daghan kaayo ang trahedya ug pagkadaotan maong nagtuo ang uban nga hapit na ang kataposan sa kalibotan. Tinuod ba na? Posible bang mahibalo ta sa umaabot? Oo. Ang mga tawo dili makatagna sa mahitabo sa umaabot, pero si Jehova nga Diyos makatagna. Gisulti niya diha sa Bibliya ang bahin sa atong umaabot ug sa mahitabo unya sa yuta.​—Isaias 46:10; Santiago 4:14.

2, 3. Unsay gustong mahibaloan sa mga tinun-an ni Jesus, ug unsay iyang tubag kanila?

² Dihang mabasa nato sa Bibliya ang bahin sa kataposan sa kalibotan, ang gitumong ana, dili ang kataposan sa planetang Yuta, kondili ang kataposan sa pagkadaotan. Gitudloan ni Jesus ang mga tawo nga ang Gingharian sa Diyos magmando sa yuta. (Lucas 4:43) Gustong mahibaloan sa mga tinun-an ni Jesus kon kanus-a kana moabot maong gipangutana nila siya: “Kanus-a kini mahitabo, ug unsa man unyay ilhanan sa imong presensiya ug sa hinapos sa sistema sa mga butang?” (Mateo 24:3) Wala maghatag si Jesus ug eksaktong petsa, pero gisultihan niya sila kon unsay mahitabo sa dili pa moabot ang kataposan niining kalibotana. Ang gisulti ni Jesus nahitabo na karon.

³ Hisgotan nato niining kapituloha ang mga ebidensiya nga nagkinabuhi na ta sa panahon nga hapit na ang kataposan sa kalibotan. Pero ato unang hisgotan ang gubat  nga nahitabo sa langit aron atong masabtan kon nganong daotan kaayo ang mga panghitabo dinhi sa yuta.

4, 5. (a) Unsay nahitabo didto sa langit dihang nahimo nang Hari si Jesus? (b) Sumala sa Pinadayag 12:12, unsay mahitabo sa yuta human itambog si Satanas dinhi?

⁴ Sa Kapitulo 8 atong nakat-onan nga si Jesus nahimong Hari sa langit niadtong 1914. (Daniel 7:13, 14) Mabasa nato sa Pinadayag kon unsay nahitabo: “Miulbo ang gubat sa langit: Si Miguel [nagtumong kang Jesus] ug ang iyang mga anghel nakiggubat sa dragon [si Satanas], ug ang dragon ug ang mga anghel niini nakiggubat.” * Si Satanas ug ang iyang mga demonyo napildi sa gubat ug gitambog sa yuta. Seguradong nalipay ang mga anghel! Pero unsay nahitabo sa mga tawo sa yuta? Ang Bibliya nag-ingon nga nianang panahona ang mga tawo makasinatig grabeng kalisdanan. Ngano? Ang Yawa nasuko kaayo, “kay nahibalo siya nga mubo na lang ang iyang panahon.”​—Pinadayag 12:7, 9, 12.

⁵ Ang Yawa nagdalag grabeng kalisdanan sa yuta. Nasuko siya pag-ayo kay hapit na gyod siyang wagtangon sa Diyos. Atong susihon kon unsay giingon ni Jesus nga mahitabo sa kataposang mga adlaw.​—Tan-awa ang Endnote 24.

6, 7. Unsay imong ikasulti bahin sa gubat ug gutom nga nahitabo karon?

⁶ Gubat. Si Jesus miingon: “Ang nasod makiggubat batok sa nasod ug ang gingharian batok sa gingharian.” (Mateo 24:7) Mas daghang tawo ang namatay sa mga gubat karon kon ikompara sa tanang gubat  kaniadto. Sumala sa usa ka report sa Worldwatch Institute, sukad sa 1914 kapin nag 100 ka milyon ang namatay sa gubat. Gani, tulo ka pilo nga mas daghan ang namatay sa gubat sulod lang sa 100 ka tuig (1900-2000) kon ikompara sa namatay sa gubat sukad sa tuig 1 C.E. hangtod sa 1900. Hunahunaa ang kaguol ug kasakit nga giantos sa minilyon tungod sa gubat!

⁷ Gutom. Si Jesus miingon: “Duna unyay mga kanihit sa pagkaon.” (Mateo 24:7) Bisag mas daghan ang pagkaon karon kay kaniadto, daghan gihapon ang nagutman. Ngano? Kay wala silay kuwarta nga ikapalit ug pagkaon o yuta nga katamnan. Kapin sa usa ka bilyong tawo ang mokitag ubos lang sa usa ka dolyar kada adlaw. Ang World Health Organization miingon nga milyonmilyong bata ang mamatay kada tuig kay kulang silag pagkaon.

8, 9. Unsay pamatuod nga natuman ang tagna ni Jesus bahin sa mga linog ug sakit?

⁸ Linog. Si Jesus nagtagna: “Duna unyay dagkong linog.” (Lucas 21:11) Karon daghang  kusog nga linog ang gidahom nga mahitabo kada tuig. Sukad sa tuig 1900, kapin nag duha ka milyon ang namatay tungod sa linog. Ug bisag abante nang mahibaloan karon ang linog tungod sa teknolohiya, daghan gihapon ang namatay.

⁹ Sakit. Gitagna ni Jesus nga duna unyay “kamatay.” Ang delikadong mga sakit paspas kaayong mokaylap ug daghan ang mamatay. (Lucas 21:11) Bisag daghan nag nahibaloan ang mga doktor kon unsaon pagtambal ang daghang sakit, duna gihapoy mga sakit nga dili matambalan. Gani, ang usa ka report nag-ingon nga kada tuig minilyon ang mamatay tungod sa sakit, sama sa tuberkulosis, malarya, ug kolera. Nadiskobrehan sab sa mga doktor ang 30 ka bag-ong sakit, ug ang pipila niini dili matambalan.

10. Unsay pamatuod nga natuman karon ang 2 Timoteo 3:1-5?

¹⁰ Ang Bibliya diha sa 2 Timoteo 3:1-5 nag-ingon: “Sa kataposang mga adlaw moabot ang  kuyaw nga mga panahong lisod sagubangon.” Gihisgotan ni apostol Pablo ang kinaiya sa daghang tawo sa kataposang mga adlaw. Siya miingon nga ang mga tawo

• kaugalingon ray gihunahuna

• mahigugmaon sa kuwarta

• dili masinugtanon sa ginikanan

• dili maunongon

• walay gugma sa ilang pamilya

• walay pagpugong sa kaugalingon

• bayolente ug daling masuko

• mahigugmaon sa kalipayan imbes sa Diyos

• diyosnon tan-awon pero wala magsunod sa sugo sa Diyos

11. Sumala sa Salmo 92:7, unsay mahitabo sa mga daotan?

¹¹ Ingon ani bag kinaiya ang mga tawo sa inyong lugar? Sa tibuok kalibotan, daghan ang ingon anig kinaiya. Pero sa dili madugay naay himoon ang Diyos bahin niini. Siya nagsaad: “Bisan pag ang mga daotan manurok samag mga bunglayon  ug ang tanang mamumuhat ug daotan molambo, bug-os nga kalaglagan ang ilang dangatan.”​—Salmo 92:7.

12, 13. Unsay gitudlo ni Jehova kanato niining kataposang mga adlaw?

¹² Gitagna sa Bibliya nga sa kataposang mga adlaw, ang kalibotan mapunog kasakit ug pag-antos. Pero kini nag-ingon sab nga naay maayong mga butang nga mahitabo.

¹³ Mas nasabtan ang Bibliya. Si propetang Daniel misulat bahin sa kataposang mga adlaw. Siya miingon: “Ang tinuod nga kahibalo modagaya.” (Daniel 12:4) Gitabangan sa Diyos ang iyang katawhan nga mas klaro nilang masabtan karon ang Bibliya. Kanunay ning gihimo ni Jehova ilabina sukad sa 1914. Pananglitan, iya tang gitudloan sa kaimportante sa iyang ngalan, sa iyang gusto para sa yuta, sa kamatuoran bahin sa lukat, sa kahimtang nato dihang kita mamatay, ug sa pagkabanhaw. Atong nakat-onan nga ang Gingharian sa Diyos lang ang makasulbad sa tanan natong problema. Nakat-onan sab nato kon unsaon nga magmalipayon ug magkinabuhi sa paagi nga makapalipay sa Diyos. Pero unsa may himoon sa mga alagad sa Diyos sa ilang nakat-onan? Ang laing tagna magtubag niana.​—Tan-awa ang Endnotes 21 ug 25.

14. Asa ginasangyaw ang maayong balita sa Gingharian, ug kinsay nagsangyaw niini?

¹⁴ Tibuok kalibotang pagsangyaw. Bahin sa kataposang mga adlaw, si Jesus miingon: “Kining maayong balita sa Gingharian isangyaw sa tibuok yuta.” (Mateo 24:3, 14) Ang maayong balita sa Gingharian gisangyaw na karon sa 240 ka kayutaan ug sa kapig 900 ka pinulongan. Oo, sa tibuok kalibotan, ang mga Saksi ni Jehova nga gikan sa “tanang kanasoran ug tribo” nagtabang sa mga tawo nga masabtan kon unsa ang Gingharian ug kon  unsay himoon niini para sa mga tawo. (Pinadayag 7:9) Ug walay bayad ang paghimo nila niini. Bisag daghan ang nagsupak ug naglutos nila, wala gyoy makapahunong sa pagsangyaw, sama sa gitagna ni Jesus.​—Lucas 21:17.

15. (a) Motuo ba ka nga naa na ta sa kataposang mga adlaw, ug ngano? (b) Unsay mahitabo niadtong mosunod kang Jehova ug niadtong dili mosunod niya?

¹⁵ Motuo ba ka nga naa na ta sa kataposang mga adlaw? Daghang tagna sa Bibliya bahin sa kataposang mga adlaw ang nagakatuman na. Sa dili madugay pahunongon ni Jehova ang pagsangyaw sa maayong balita ug “ang kataposan” moabot. (Mateo 24:14) Unsa ang kataposan? Kini ang Armagedon, dihang wagtangon na sa Diyos ang tanang pagkadaotan. Gamiton ni Jehova si Jesus ug ang iyang gamhanang mga anghel aron laglagon ang tanang dili mosunod Kaniya ug sa iyang Anak. (2 Tesalonica 1:6-9) Human niana, si Satanas ug ang iyang mga demonyo dili na makapahisalaag sa mga tawo. Ug ang tanan nga gustong mosunod sa Diyos ug modawat sa Gingharian makakita nga matuman ang tanang saad sa Diyos.​—Pinadayag 20:1-3; 21:3-5.

16. Kay hapit na kaayo ang kataposan, unsay kinahanglan nimong himoon?

¹⁶ Kining kalibotana nga gimandoan ni Satanas hapit nang matapos. Busa angay gyod natong pangutan-on ang atong kaugalingon, ‘Unsay kinahanglan nakong himoon?’ Gusto ni Jehova nga daghan kag makat-onan sa Bibliya kutob sa mahimo. Kinahanglang seryosohon nimo ang imong pagtuon. (Juan 17:3) Ang mga Saksi ni Jehova naay tigom kada semana aron tabangan ang mga tawo nga masabtan ang Bibliya. Sulayi ang pagtambong pirme sa maong mga tigom. (Basaha ang Hebreohanon  10:24, 25.) Kon imong nakat-onan nga kinahanglan kang mohimog kausaban, ayawg kahadlok sa paghimo niana. Samtang imo nang himoon, mas masuod ka kang Jehova.​—Santiago 4:8.

17. Nganong makurat ang kadaghanang tawo inig-abot sa kataposan?

¹⁷ Si apostol Pablo miingon nga ang kalaglagan sa mga daotan moabot sa panahong wala damha sa kadaghanang tawo, “samag kawatan sa kagabhion.” (1 Tesalonica 5:2) Gitagna ni Jesus nga daghan ang magbalewala sa ebidensiya nga nagkinabuhi na ta sa kataposang mga adlaw. Siya miingon: “Sama sa mga adlaw ni Noe, mao man usab unya sa presensiya sa Anak sa tawo [o, kataposang mga adlaw]. Sa wala pa ang Lunop, ang mga tawo nangaon, nanginom, ug nagminyo hangtod sa adlaw nga si Noe misulod sa arka, ug wala sila magtagad hangtod miabot ang Lunop ug gibanlas silang tanan. Mao man usab unya sa presensiya sa Anak sa tawo.”​—Mateo 24:37-39.

18. Unsang pasidaan ang gihatag ni Jesus kanato?

¹⁸ Si Jesus nagpasidaan nga dili ta angayng magpabalda “sa pagpalabig kaon, sa pagpalabig inom, ug sa mga kabalaka sa kinabuhi.” Miingon siya nga ang kataposan kalit nga moabot, “ingong usa ka lit-ag.” Miingon sab siya nga “moabot kini sa tanang nagpuyo sa tibuok yuta.” Dayon siya midugang: “Padayon sa pagtukaw, nga mangamuyo kanunay [o, kinasingkasing nga mag-ampo] nga kamo makaikyas niining tanang butang nga kinahanglang mahitabo ug makabarog atubangan sa Anak sa tawo.” (Lucas 21:34-36) Nganong kinahanglan gyod natong sundon ang pasidaan ni Jesus? Kay hapit na kaayong laglagon ang kalibotan ni Satanas. Kadto lang giuyonan ni Jehova ug ni Jesus ang maluwas sa kataposan ug mabuhi hangtod sa hangtod sa bag-ong kalibotan.​—Juan 3:16; 2 Pedro 3:13.