Si Atalia, nga asawa sa hari sa Juda, pareho gyod ka daotan kang Jezebel nga iyang inahan. Dihang namatay ang bana ni Atalia, ang iyang anak ang misunod nga hari. Pero pagkamatay sa iyang anak, si Atalia ang mipuli nga lider sa Juda. Gipatay niya ang tanang kaliwat sa hari, apil na kadtong posible nga mahimong lider puli niya, bisan ang iyang mga apo. Ang tanan nahadlok niya.

Ang hataas nga saserdoteng si Jehoiada ug iyang asawa, si Jehoseba, nahibalo nga daotan kaayo ang gihimo ni Atalia. Gipameligro nila ang ilang kinabuhi kay ilang gitagoan ang apo ni Atalia nga si Jehoas. Giatiman nila ang bata didto sa templo.

Dihang pito ka tuig na si Jehoas, gitigom ni Jehoiada ang tanang pangulo ug mga Levihanon ug giingnan sila: ‘Bantayi ninyo ang mga pultahan sa templo, ug ayaw pasudla si bisan kinsa.’ Dayon si Jehoas gihimong hari ni Jehoiada ug gikoronahan siya. Naninggit ang mga tawo sa Juda: ‘Mabuhi ang hari!’

Dihang nadungog ni Raynang Atalia ang singgit sa mga tawo, nagdalidali siyag adto sa templo. Pagkakita niya sa bag-ong hari, misiyagit siya: ‘Nagkunsabo mo!’ Gidakop siya sa mga pangulo ug gipatay. Pero unsay gihimo sa nasod sa daotang impluwensiya sa rayna?

Gitabangan ni Jehoiada ang nasod nga mohimog saad kang Jehova. Nanaad sila nga si Jehova lang ang ilang simbahon. Gisugo sila ni Jehoiada nga lumpagon ang templo ni Baal ug dugmokon ang mga idolo. Nagpili siyag mga saserdote ug mga Levihanon nga motrabaho sa templo aron makasimba na ang katawhan  didto. Gibutangan niyag mga tigbantay ang templo aron walay makasulod nga tawong mahugaw. Dayon si Jehoas gidala ni Jehoiada ug sa mga pangulo didto sa palasyo ug gipalingkod sa trono. Nalipay kaayo ang mga tawo sa Juda. Makaalagad na sila kang Jehova kay wala na ang daotang si Atalia, ug wala nay moimpluwensiya nila sa pagsimba kang Baal. Daghan ang natabangan tungod sa kaisog ni Jehoiada!