Dihang may kagutom sa Israel, mibalhin sa Moab ang Israelinhong si Noemi uban sa iyang bana ug duha ka anak. Sa ulahi, namatay ang iyang bana. Ang iyang mga anak naminyo kang Ruth ug Orpa, nga mga Moabihanon. Pero paglabay sa panahon, namatay sab ang mga anak ni Noemi.

Nabalitaan ni Noemi nga daghan nag pagkaon sa Israel maong gusto niyang mobalik didto. Miuban niya si Ruth ug Orpa, pero samtang nagpaingon didto, si Noemi miingon: ‘Maayo mong asawa sa akong mga anak ug buotan kaayo mo nako. Gusto nakong maminyo mo pag-usab. Pauli mo sa Moab.’ Pero miingon sila: ‘Pinangga ka namo! Gusto namong mouban nimo.’ Balikbalik silang giingnan ni Noemi nga mopauli. Busa mipauli si Orpa, pero si Ruth wala. Giingnan siya ni Noemi: ‘Mipauli na si Orpa sa iyang katawhan ug sa iyang mga diyos. Kuyog niya, ug pauli mo sa inyong mga inahan.’ Pero si Ruth miingon: ‘Dili ti ka biyaan. Ang imong katawhan mahimong akong katawhan, ug ang imong Diyos mahimong akong Diyos.’ Unsa kahay gibati ni Noemi sa gisulti ni Ruth?

Pag-abot ni Ruth ug Noemi sa Israel, nagsugod na ang pagpangani ug sebada. Usa ka adlaw niana, nanguhag salin nga sebada si Ruth sa umahan ni Boaz nga anak ni Rahab. Nabalitaan ni Boaz nga taga-Moab si Ruth, kinsa miunong kang Noemi. Giingnan niya ang iyang mga trabahante nga binlan ug sebada si Ruth.

 Pagkagabii, gipangutana ni Noemi si Ruth: ‘Kinsa may tag-iya sa uma nga imong gikuhaan sa mga sebada?’ Si Ruth miingon: ‘Boaz man to iyang ngalan.’ Miingon si Noemi: ‘Si Boaz paryente sa akong bana. Padayon lang sa pagtrabaho sa iyang uma uban sa mga batan-ong babaye. Walay manghilabot nimo didto.’

Padayong nagtrabaho si Ruth sa uma ni Boaz hangtod nahuman ang pagpangani. Nakita ni Boaz nga kugihan si Ruth ug maayo kaayo. Kaniadto, kon mamatay ang usa ka lalaki ug walay anak, pangasaw-on sa iyang paryente ang iyang asawa. Busa giminyoan ni Boaz si Ruth. Anak nila si Obed, nga sa ulahi nahimong lolo ni Haring David. Lipay kaayo ang mga higala ni Noemi. Sila miingon: ‘Una, gihatag ni Jehova nimo si Ruth nga buotan kaayo, ug karon may apo ka na. Maayo kaayo si Jehova.’