Halos 40 na ka tuig nga naglibotlibot ang mga Israelinhon sa kamingawan. Daghan silag napildi nga lig-ong mga siyudad. Karon nagkampo sila sa Moab, sa sidlakan sa Suba sa Jordan, ug mosuloray na sila sa Yutang Saad. Ang hari sa Moab nga si Balak nahadlok kay basig mailog ang iyang yuta. Tungod niana, iyang gipatawag si Balaam aron tunglohon ang mga Israelinhon.

Pero giingnan ni Jehova si Balaam: ‘Ayaw tungloha ang mga Israelinhon.’ Busa wala moadto si Balaam. Gipatawag na pod siya ni Haring Balak ug gisaaran nga ihatag kaniya ang tanan niyang gusto. Wala gihapon siya moadto. Dayon ang Diyos miingon: ‘Puwede kang moadto, pero kon unsay akong giingon nimo mao ray imong isulti.’

Misakay si Balaam sa iyang asno paingon sa Moab. Gusto niyang tunglohon ang mga Israelinhon bisag gibadlong siya ni Jehova. Tulo ka beses nga nagpakita diha sa dalan ang anghel ni Jehova. Nakita sa asno ang anghel, pero wala siya makita ni Balaam. Sa primero, mitipas ang asno paingon sa uma. Dayon namidpid kini sa paril ug naipit ang tiil ni Balaam. Sa kataposan, milubog ang asno sa tunga sa dalan. Gisigehan kinig puspos ni Balaam.

Dayon gipasulti ni Jehova ang asno: ‘Nganong gisigehan man ko nimog puspos?’ Mitubag si Balaam: ‘Kay imo kong gibinuangan. Kon naa pa koy espada, gipatay na ti ka.’ Miingon ang asno: ‘Di ba sa una pa ko nimo ginasakyan? Gihimo ba nako ni sukad?’

Dayon gipakita ni Jehova kang Balaam ang anghel. Ang anghel miingon: ‘Giingnan na ka ni Jehova nga dili tunglohon ang Israel.’ Mitubag si Balaam: ‘Nakasala ko. Mouli na ko.’ Pero ang anghel  miingon: ‘Puwede kang moadto sa Moab, pero kadto lang giingon ni Jehova ang imong isulti.’

Nagbag-o ba si Balaam? Wala. Katulo niya gitunglo ang Israel. Pero gipanalanginan ni Jehova ang Israel matag higayon nga gihimo niya kana. Sa ulahi, giatake sa mga Israelinhon ang Moab ug namatay si Balaam. Di ba mas maayo unta kon naminaw si Balaam kang Jehova?