Kapig 400 ka tuig human matukod pag-usab ang mga paril sa Jerusalem, ang saserdote nga si Zacarias ug iyang asawa nga si Elisabet mipuyo duol niana nga siyudad. Dugay na silang minyo pero wala silay anak. Usa ka adlaw niana, samtang naghalad ug insenso si Zacarias didto sa sangtuwaryo sa templo, nagpakita ang anghel nga si Gabriel. Nahadlok si Zacarias, pero si Gabriel miingon: ‘Ayawg kahadlok. Naa koy maayong balita gikan kang Jehova. Ang imong asawa nga si Elisabet manganak ug lalaki ug nganlan siyag Juan. Gipili ni Jehova si Juan para sa espesyal nga buluhaton.’ Pero miingon si Zacarias: ‘Lisod tuohan ang imong giingon. Imposibleng makaanak mi sa akong asawa kay tigulang na kaayo mi.’ Si Gabriel miingon: ‘Gisugo ko sa Diyos nga isulti ni nimo. Pero kay dili man ka motuo, maamang ka hangtod matawo ang bata.’

Dugay nakagawas si Zacarias sa sangtuwaryo maong paggawas niya, gustong mahibalo ang mga tawo kon unsay nahitabo. Nagsenyas-senyas na lang si Zacarias kay dili na siya makasulti. Busa naghunahuna ang mga tawo nga nakadawat si Zacarias ug mensahe gikan sa Diyos.

Sa ulahi, natinuod ang giingon sa anghel kay namabdos si Elisabet ug nanganak ug lalaki. Mibisita ang iyang mga higala ug paryente aron makita ang bata. Nalipay kaayo sila. Si Elisabet miingon: ‘Nganlan namo siyag Juan.’ Miingon sila: ‘Wala may Juan sa inyong pamilya. Nganli siyag Zacarias parehas sa iyang amahan.’ Pero si Zacarias misulat: ‘Juan ang iyang ngalan.’ Dihadiha, nakasulti na si Zacarias! Ang pagkatawo niini nga bata nabalitaan sa tibuok Judea, ug naghunahuna ang mga tawo: ‘Unsa kaha ning bataa inigdako?’

Dayon si Zacarias napuno sa balaang espiritu. Siya  mitagna: ‘Dayegon si Jehova. Misaad siya kang Abraham nga magpadala Siyag manluluwas, ang Mesiyas. Mahimong propeta si Juan, ug siyay mag-andam sa dalan para sa Mesiyas.’

Naa poy talagsaong nahitabo sa paryente ni Elisabet nga si Maria. Ato kining mahibaloan sa sunod nga leksiyon.