1, 2. Unsay atong himoon aron magpabilin sa gugma sa Diyos?

 KITANG tanan gusto nga mahimong lig-on ug himsog. Busa mokaon tag sustansiyadong pagkaon, mag-ehersisyo kanunay, ug mag-amping sa atong lawas. Bisag nagkinahanglan nig paningkamot, malipay ta sa resulta, maong angay tang mopadayon. Pero kinahanglan sab ta nga mahimong lig-on ug himsog sa laing paagi.

² Bisan nailhan na nato si Jehova, kinahanglang padayon natong palig-onon ang atong relasyon kaniya. Dihang gidasig ni Judas ang mga Kristohanon nga ‘magpabilin sa gugma sa Diyos,’ iyang gipatin-aw kon unsaon kini paghimo. Siya miingon: “Palig-ona ang inyong kaugalingon diha sa inyong labing balaang pagtuo.” (Judas 20, 21) Busa unsaon nato pagpalig-on ang atong pagtuo?

3-5. (a) Unsay gusto ni Satanas nga hunahunaon nimo bahin sa mga sukdanan ni Jehova? (b) Unsay imong pag-isip sa mga balaod ug prinsipyo ni Jehova?

³ Importante nga ikaw mismo kombinsido nga ang mga paagi ni Jehova mao ang kinamaayohan. Gusto ni Satanas nga maghunahuna ka nga lisod kaayong kab-oton ang mga sukdanan sa Diyos ug mas magmalipayon  ka kon ikaw ang magdesisyon kon unsay husto ug sayop. Sukad pa didto sa tanaman sa Eden, naningkamot si Satanas nga ang mga tawo motuo niini. (Genesis 3:1-6) Ug mao gihapoy iyang ginahimo karon.

⁴ Husto ba si Satanas? Sobra ra ba ka estrikto ang mga sukdanan ni Jehova? Dili. Sa pag-ilustrar, ibutang ta nga misuroy ka sa nindot nga parke. Dunay lugar didto nga dili ka makasulod kay naay habog nga koral. Tingali maghunahuna ka, ‘Nganong gikoralan man ni?’ Dayon nakadungog kag leyon nga nagngulob luyo sa koral. Karon, unsa nay imong hunahuna bahin sa maong koral? Mapasalamaton ka kay gipanalipdan ka niini! Ang mga prinsipyo ni Jehova sama niana nga koral, ug ang Yawa sama sa leyon. Gipasidan-an ta sa Pulong sa Diyos: “Hupti ang maayong panghunahuna, magmabinantayon! Ang inyong kaaway, ang Yawa, naglibotlibot nga samag leyon nga nagngulob, nga nangitag matukob.”​—1 Pedro 5:8.

⁵ Gusto ni Jehova nga mabatonan nato ang labing maayong kinabuhi. Dili siya gustong malimbongan ta ni Satanas. Busa gihatagan ta niyag mga balaod ug prinsipyo aron mapanalipdan ta ug magmalipayon. (Efeso 6:11) Si Santiago misulat: “Ang usa nga nagatutok pag-ayo sa hingpit nga balaod nga magdalag kagawasan ug magpadayon niana . . . magmalipayon sa iyang ginabuhat.”​—Santiago 1:25.

6. Unsay atong himoon aron mahimo tang kombinsido nga ang mga paagi sa Diyos mao ang kinamaayohan?

⁶ Kon sundon nato ang mga sugo ni Jehova, mouswag ang atong kinabuhi ug mas molig-on ang atong panaghigalaay kaniya. Pananglitan, makabenepisyo ta dihang dawaton nato ang iyang pagdapit nga moampo kaniya  kanunay. (Mateo 6:5-8; 1 Tesalonica 5:17) Malipay ta dihang sundon nato ang iyang sugo nga magtigom aron simbahon siya ug magdinasigay sa usag usa ug bug-os tang makigbahin sa pagsangyaw ug pagpanudlo. (Mateo 28:19, 20; Galacia 6:2; Hebreohanon 10:24, 25) Dihang pamalandongon nato kon sa unsang paagi kining mga butanga nakatabang nga magpabiling lig-on ang atong pagtuo, mahimo tang mas kombinsido nga ang mga paagi ni Jehova mao ang kinamaayohan.

7, 8. Unsay makatabang aron dili ta mabalaka sa umaabot nga mga pagsulay?

⁷ Tingali mabalaka ta nga makaatubang unya tag lisod kaayong mga pagsulay sa pagtuo. Kon mao, hinumdomi ang giingon ni Jehova: “Ako, si Jehova, ang imong Diyos, ang Usa nga nagtudlo kanimo aron makabaton kag kaayohan, ang Usa nga naggiya kanimo sa dalan nga angay nimong laktan. Kon mamati lang unta ka sa akong mga sugo! Ang imong kalinaw mahisama gayod sa suba, ug ang imong pagkamatarong mahisama sa mga balod sa dagat.”​—Isaias 48:17, 18.

 ⁸ Kon sundon nato si Jehova, ang atong kalinaw mahisamag suba nga dili mahubas, ug ang atong pagkamatarong mahisamag mga balod nga kanunayng molapya sa baybayon. Bisag unsa pay mahitabo, makapabilin tang matinumanon. Ang Bibliya nagsaad: “Itugyan ang imong palas-anon kang Jehova, ug siya motabang kanimo. Dili gyod niya itugot nga mapukan ang matarong.”​—Salmo 55:22.

9, 10. Unsay ipasabot sa pagkahimong hamtong?

⁹ Samtang palig-onon nimo ang imong relasyon kang Jehova, ‘padayon kang mouswag sa pagkahamtong.’ (Hebreohanon 6:1) Unsay ipasabot sa pagkahimong hamtong?

¹⁰ Wala magpasabot nga hamtong na tang Kristohanon kon taas tag edad. Aron mohamtong, kinahanglan natong himoon si Jehova nga atong kinasuorang Higala ug sundogon ang iyang panglantaw. (Juan 4:23) Si Pablo misulat: “Kadtong nagkinabuhi uyon sa unod nagsigeg hunahuna sa mga butang sa unod, apan kadtong nagkinabuhi uyon sa espiritu, sa mga butang sa espiritu.” (Roma 8:5) Ang hamtong nga tawo magpokus dili sa kalipayan o sa materyal nga mga butang kondili sa pag-alagad kang Jehova, ug maalamon siyag mga desisyon. (Proverbio 27:11; basaha ang Santiago 1:2, 3.) Dili siya magpaimpluwensiya sa paghimog daotan. Siya nahibalo kon unsay husto ug determinadong himoon kini.

11, 12. (a) Unsay giingon ni Pablo bahin sa “katakos sa panghunahuna” sa usa ka Kristohanon? (b) Sa unsang paagi ang pagkahimong hamtong nga Kristohanon nahisama sa pagkahimong atleta?

¹¹ Nagkinahanglag paningkamot aron mahimong hamtong. Si apostol Pablo misulat: “Ang gahing  pagkaon maoy para sa mga tawong hamtong, nga pinaagi sa paggamit sa ilang mga katakos sa panghunahuna, sila nahibalo kon unsaon pag-ila ang maayo ug ang daotan.” (Hebreohanon 5:14) Sa orihinal nga pinulongan, ang pulong nga gihubad nga “nahibalo” nagkahulogang “nabansay.” Kini magpahunahuna nato sa pagbansay sa usa ka atleta.

¹² Dihang makakita tag hanas nga atleta, nahibalo ta nga nagkinahanglag panahon ug pagbansay ayha siya nahimong hanas. Wala siya matawo nga atleta. Dihang matawo ang usa ka bata, dili siya makamaong mogamit sa iyang bukton ug bitiis. Pero sa ulahi, makakat-on siya sa pagkupot ug paglakaw. Kon bansayon, mahimo siyang atleta. Sa susama, nagkinahanglag panahon ug pagbansay aron mahimong hamtong nga Kristohanon.

13. Unsay makatabang aron masundog ang panghunahuna ni Jehova?

¹³ Niining libroha, atong gihisgotan kon unsaon pagsundog ang panghunahuna ug panglantaw ni Jehova. Nakakat-on ta sa pag-apresyar ug paghigugma sa iyang mga sukdanan. Dihang maghimog desisyon, mamalandong ta: ‘Unsa nga mga balaod o prinsipyo sa Bibliya ang mapadapat niini nga situwasyon? Unsaon nako kini pagpadapat? Unsay gusto ni Jehova nga himoon nako?’​—Basaha ang Proverbio 3:5, 6; Santiago 1:5.

14. Unsay angay natong himoon aron molig-on ang atong pagtuo?

¹⁴ Dili gyod ta moundang sa pagpalig-on sa atong pagtuo kang Jehova. Kon mokaon tag sustansiyadong pagkaon, molig-on ang atong lawas. Sa susama, ang pagkat-on bahin kang Jehova magpalig-on sa atong pagtuo. Dihang nagsugod tag tuon sa Bibliya, nakat-onan nato ang pangunang mga kamatuoran bahin kang Jehova ug sa iyang mga paagi. Pero paglabay sa panahon,  kinahanglang masabtan nato ang mas lawom nga mga butang. Kanay gipasabot ni Pablo dihang siya miingon: “Ang gahing pagkaon maoy para sa mga tawong hamtong.” Pinaagi sa pagpadapat sa atong mga nakat-onan, makabaton tag kaalam. Ang Bibliya nag-ingon: “Ang kaalam ang labing importanteng butang.”​—Proverbio 4:5-7; 1 Pedro 2:2.

15. Nganong importanteng higugmaon si Jehova ug ang mga igsoon?

¹⁵ Tingali ang usa ka tawo lig-on ug himsog. Pero aron makapabiling ingon niana, siya nahibalo nga kinahanglan siyang magpadayon sa pag-amping sa iyang kaugalingon. Sa susama, ang hamtong nga tawo nahibalo nga kinahanglan siyang maningkamot nga magpabiling lig-on ang iyang relasyon kang Jehova. Si Pablo nagpahinumdom kanato: “Padayong sulayi kon naa ba mo sa pagtuo; padayong pamatud-i kon unsa mo sa inyong kaugalingon.” (2 Corinto 13:5) Pero dili igo ang lig-ong pagtuo. Kinahanglang padayong modako ang atong gugma kang Jehova ug sa atong mga igsoon. Si Pablo miingon: “Kon duna koy . . . kahibalo, ug kon nabatonan nako ang lig-on kaayong pagtuo aron ibalhin ang mga bukid, apan walay gugma, ako walay kapuslanan.”​—1 Corinto 13:1-3.

16. Unsay gusto ni Satanas nga bation nato?

¹⁶ Gusto ni Satanas nga maghunahuna ta nga dili gyod nato mapalipay si Jehova. Gusto niyang maluya ta ug maghunahuna nga dili masulbad ang atong mga problema. Dili niya gustong mosalig ta sa atong isigka-Kristohanon, ug dili niya gustong magmalipayon ta. (Efeso 2:2) Nahibalo siya nga ang negatibong panghunahuna makadaot nato ug sa atong relasyon kang  Jehova. Pero naay gihatag si Jehova aron masuklan nato kini nga panghunahuna. Gihatagan ta niyag paglaom.

17. Unsa ka importante ang paglaom?

¹⁷ Sa 1 Tesalonica 5:8, ang atong paglaom gipakasama sa helmet nga manalipod sa ulo sa sundalo panahon sa gubat, nga nagtawag sa maong helmet ingong “ang paglaom sa kaluwasan.” Kon molaom ta sa mga saad ni Jehova, mapanalipdan ang atong hunahuna ug masuklan nato ang negatibong panghunahuna.

18, 19. Sa unsang paagi ang paglaom nakapalig-on kang Jesus?

¹⁸ Ang paglaom ni Jesus nakapalig-on niya. Sa iyang kataposang gabii sa yuta, nakaatubang siyag sunodsunod nga pagsulay. Gibudhian siya sa iyang suod nga higala. Gilimod siya sa iyang laing higala. Gibiyaan siya sa uban. Gikontra siya sa iyang mga isigka-Hudiyo, ug gusto nilang ipapatay siya diha sa estaka. Unsay nakatabang niya nga makalahutay niining sakit nga mga  panghitabo? “Tungod sa kalipay nga gibutang sa iyang atubangan, nalahutay niya ang kamatayon sa estaka sa pagsakit, nga gibalewala ang kaulaw, ug milingkod sa tuong kamot sa trono sa Diyos.”​—Hebreohanon 12:2.

¹⁹ Nasayod si Jesus nga kon magmatinumanon siya, mahimaya niya ang iyang Amahan ug mapamatud-ang bakakon si Satanas. Kini nga paglaom naghatag niyag dakong kalipay. Nasayod sab siya nga hapit na niyang makauban pag-usab sa langit ang iyang Amahan. Kini nga paglaom nakatabang niya sa paglahutay. Sama kang Jesus, angay tang magpokus sa atong paglaom. Makatabang ni nato sa paglahutay bisag unsa pay mahitabo.

20. Unsay makatabang nimo nga mahimong positibo?

²⁰ Makita ni Jehova ang imong pagtuo ug paglahutay. (Isaias 30:18; basaha ang Malaquias 3:10.) Nagsaad siya nga “ihatag niya kanimo ang mga tinguha sa imong kasingkasing.” (Salmo 37:4) Busa pagpokus sa imong  paglaom. Gusto ni Satanas nga mawad-an kag paglaom ug mobati nga mapakyas ang mga saad ni Jehova. Pero ayawg padaog sa maong panghunahuna! Kon mamatikdan nimong nagkaawop na ang imong paglaom, pangayog tabang kang Jehova. Hinumdomi ang giingon sa Filipos 4:6, 7: “Ayawg kabalaka sa bisan unsa, apan sa tanang butang ipahibalo sa Diyos ang inyong mga hangyo pinaagi sa pag-ampo ug pangamuyo uban ang pagpasalamat; ug ang kalinaw nga gikan sa Diyos, nga labaw sa tanang pagsabot, magbantay sa inyong kasingkasing ug hunahuna pinaagi ni Kristo Jesus.”

21, 22. (a) Unsay katuyoan ni Jehova para sa yuta? (b) Unsay determinado nimong himoon?

²¹ Kanunayng gahinig panahon ang pagpamalandong sa makapalipayng kaugmaon. Sa dili madugay, ang tanang tawo magsimba na kang Jehova. (Pinadayag 7:9, 14) Hunahunaa ang kinabuhi sa bag-ong kalibotan. Mas maayo ni kay sa bisan unsa nga atong mahunahunaan! Si Satanas, ang iyang mga demonyo, ug ang tanang pagkadaotan mawala na. Dili na ka masakit o mamatay. Hinunoa, mobangon ka kada adlaw nga lagsik ug malipayon. Ang tanan magtinabangay sa paghimo sa yuta nga paraiso. Ang tanan naa nay sustansiyadong pagkaon ug luwas nga puy-anan. Wala nay daotan o bangis. Ang tanan buotan na sa usag usa. Sa ngadtongadto, matagamtam sa tanang tawo sa yuta ang “mahimayaong kagawasan sa mga anak sa Diyos.”​—Roma 8:21.

²² Gusto ni Jehova nga himoon nimo siyang kinasuorang Higala. Busa himoa ang tanan sa pagsunod kang Jehova ug sa pagpakigsuod kaniya kada adlaw. Hinaot kitang tanan magpabilin sa gugma sa Diyos hangtod sa hangtod!​—Judas 21.