DUL-AN sa 50,000 ka tawo ang mipanaw gikan sa Babilonya ngadto sa Jerusalem. Apan sa ilang pag-abot, ang Jerusalem maoy dakong kagun-oban lang. Ang mga Israelita kinahanglang magtukod pag-usab sa tanan.

Ang unang butang ilang gitukod mao ang halaran. Unya sila misugod sa pagtukod sa templo. Apan ang mga kaaway nga nagpuyo sa haduol misulay sa paglisang sa mga Israelita aron mohunong sila. Sa kataposan kining maong mga kaaway midangop sa bag-ong hari sa Persia aron mohimog balaod sa pagpahunong sa pagtukod.

Ang mga tuig nanglabay.Karon maoy 17 ka tuig na sukad ang mga Israelita mibalik gikan sa Babilonya. Si Jehova mipadala sa iyang manalagnang si Hageo ug Zacarias sa pag-awhag sa katawhan nga mopadayon sa pagtukod sa templo. Ang katawhan misalig kang Jehova, ug mipadayon na usab sa pagtukod sa templo.

Busa, usa ka Persianong opisyal ginganlan Tatnai miabot ug nangutana kanila kon diin sila makabaton sa pagbulut-an sa pagtukod sa templo. Ang mga Israelita mitug-an kaniya nga sa didto pa sila sa Babilonya, si Haring Ciro miingon kanila: ‘Lakaw kamo, ngadto sa Jerusalem ug tukora ang templo ni Jehova, nga inyong Diyos.’

Si Tatnai mipadalag sulat ngadto sa Babilonya ug nangutana kon si Ciro, kinsa patay na karon, tinuod bang nag-ingon niana. Ang bag-ong hari sa Persia mitubag sa sulat. Siya miingon nga si Ciro namulong niana. Siya usab miawhag kang Tatnai sa pagtabang sa mga Israelita sa pagtukod sa ilang templo. Dul-an sa upat ka tuig ang templo nahuman.

Daghan pang dugang mga tuig nanlabay. Kini karon dul-an sa 48 ka tuig sukad ang templo nahuman. Ang katawhan sa Jerusalem kabos, ug ang siyudad ug ang templo sa Diyos dili maayo kaayong tan-awon. Balik sa Babilonya, ang Israelitang si Esdras nasayod mahitungod sa kakinahanglan sa pagtul-id sa templo sa Diyos.

Busa, si Esdras miadto sa pakigkita kang Artajerjes, ang hari sa Persia, ug kining maayong hari mihatag kang Esdras daghang mga gasa nga dad-on balik sa Jerusalem. Unya, dul-an sa 6,000 ka mga Israelita nag-ingon nga sila kinahanglan magtabang kang Esdras sa pagdala niining mga gasaha ngadto sa Jerusalem.

Nakatigom silag daghang salapi ug bulawan ug ubang bililhong mga butang nga dad-on nila. Busa si Esdras nagtigom sa katawhan, maingon sa imong makita dinhi sa hulagway. Nag-ampo sila kang Jehova nga panalipdan sila gikan sa daotang mga tawo sa ilang hataas panaw balik sa Jerusalem.

Si Jehova nanalipod gayod kanila. Human sa upat ka bulang pagpanaw, sila nahiabot nga luwas sa Jerusalem. Wala ba kini magpakita nga si Jehova makapanalipod niadtong misalig kaniya sa panabang?