OH, OH! maorag si Daniel nahitumpawak sa kalisdanan. Apan ang mga leyon wala magdaot kaniya. Nahibalo ka bag ngano? Ug nahibalo ka ba kinsa ang nagtambog kang Daniel dinhi uban sa mga leyon? Atong susihon.

Ang hari karon sa Babilonya mao ang usa ka tawo ginganlan Dario. Nakagusto siya kang Daniel tungod kay si Daniel maluluy-on kaayo ug maalam. Si Dario nagpili kang Daniel nga mahimong pangulong magmamando sa iyang gingharian. Kini nagpasina sa ubang mga tawo kang Daniel, busa kini mao ang ilang gihimo.

Ilang gihangyo si Dario nga mohimog usa ka balaod nga sulod sa 30 ka adlaw, walay usang mag-ampo sa bisan unsang diyos o tawo gawas kang Dario. Si bisan kinsang tawhana ang mosupak ning balaora kinahanglang itambog sa mga leyon. Si Dario wala mahibalo ngano kining mga tawhana gustong mahimo kining balaora. Apan siya naghunahunang kini usa ka maayong ideya. Miuyon siya sa pagbuhat sa balaod.

Sa Pagkahibalo ni Daniel mahitungod sa maong balaod, siya mipauli ug nag-ampo, maingon sa kanunay niyang ginabuhat. Ang daotang mga tawo nahibalo nga si Daniel dili gayod mohunong sa pag-ampo kang Jehova. Daw ang ilang plano misaler.

Si Haring Dario nasubo kaayo, apan dili siya makausab sa balaod. Busa siya misugo gayod nga si Daniel itambog sa langob sa mga leyon. Apan ang hari misulti kang Daniel: ‘Ako naglaom nga ang imong Diyos, kinsa imong gialagaran magluwas kanimo.’

Sa sunod buntag si Dario midalagan ngadto sa langob sa mga leyon. Imong makita siya didto. Misinggit siya: ‘Daniel, ang Diyos ba kinsa imong gialagaran nakahimo sa pagluwas kanimo gikan sa mga leyon?’ Si Daniel mitubag: ‘Ang manulunda sa Diyos nagtakop sa mga baba sa mga leyon busa sila wala magdaot kanako.’ Ang hari nalipay. Siya nagsugo nga si Daniel haw-ason gikan sa langob. Ug ang daotang mga tawo kinsa misulay sa pagwagtang kang Daniel gitambog ngadto sa mga leyon ug namatay.

Unya si Dario nagsugo nga ang tanang katawhan sa iyang gingharian magtahod sa Diyos ni Daniel, tungod kay siya nagbuhat ning dakong milagro.