OY, OY! Unsa ang ginabuhat sa mga tawo karon? Sila nag-ampo sa usa ka nating baka! Nganong ilang gibuhat kini?

Sa dihang si Moises miestar sa tumoy sa bukid sulod sa usa ka hataas nga panahon, ang katawhan nag-ingon: ‘Wala kita mahibalo kon unsa nay nahitabo kang Moises. Busa maghimo kitag usa ka diyos nga magpanguna kanato sa paggawas ning yutaa.’

Ang igsoong lalaki ni Moises nga si Aaron miuyon. Iyang gitigom ang tanan nilang bulawang mga ariyos, gitunaw nila ug gihimong usa ka bulawan nating baka. Ug ang katawhan nag-ingon: ‘Kini mao ang atong Diyos, kinsa mipagawas kanato sa Ehipto!’ Ilang gisaulog ang usa ka dakong pangilin ug misimba sa bulawan nating baka.

Ang Diyos nasuko kaayo sa iyang nakita kini, ug iyang gisuginlan si Moises sa nahitabo. Si Moises midali sa paglugsong sa bukid. Sa nagkaduol na siya, iyang nakita ang mga tawo nga nag-awit ug nagsayaw palibot sa bulawan nating baka! Si Moises nasuko kaayo nga iyang gilabay ang duha ka lapad nga bato nga nasulatan sa mga balaod, ug napulpog sila. Unya iyang gitunaw ang bulawan nating baka ug gigaling kini hangtod napulbos.

Si Moises misugo sa pipila ka tawo sa pagkuha sa ilang espada. ‘Kinahanglan patyon ang daotang mga tawo nga misimba sa nating baka!’ matod niya. Busa ang mga lalaki mipatay sa 3,000 ka tawo. Wala ba kini magpakita nga si Jehova lamang ang atong simbahon ug dili ang bisan unsang bakak nga mga diyos?