NAHIBALO ka bag kinsa ang babaye dinhi sa hulagway? Ang iyang ngalan maoy Rebeka. Ug ang tawo nga iyang himamaton mao si Isaac. Siya mahimong iyang asawa. Sa unsang paagi kini nahitabo?

Buweno, ang amahan ni Isaac nga si Abraham gustong makakuhag usa ka buotang asawa alang sa iyang anak. Busa iyang gitawag ang iyang ulipon ug miingon: ‘Buot kong mobalik ka sa dapit diin ang akong mga kabanay nagpuyo sa Haran sa pagkuhag maasawa sa akong anak nga si Isaac.

Diha dayon ang ulipon ni Abraham mikuha ug napulo ka kamelyo ug milakaw. Sa duol na siya sa Haran mihunong siya sa usa ka atabay. Kadto maoy panahon nga ang mga babaye sa siyudad moanha sa pagkuhag tubig sa atabay. Busa ang ulipon ni Abraham militok sa usa ka pag-ampo kang Jehova: ‘Itugot unta nga ang babayeng mokalos ug tubig alang kanako ug sa mga kamelyo mamao na ang usa nga imong gipili nga mahimong asawa ni Isaac.’

Wala madugay si Rebeka miabot sa pagkalos ug tubig. Sa dihang ang ulipon mihangyo kaniya nga moinom, siya naghatag kaniya. Unya iyang gihatagan ug tubig ang tanan nga giuhawng mga kamelyo. Kana maoy malisod nga trabaho, tungod kay ang mga kamelyo moinom ug daghang tubig.

Human niini, ang ulipon ni Abraham nangutana kaniya sa ngalan sa iyang amahan. Nangutana usab siya kon mahimo bang makaestar sa ilang balay sa kagabhion. Matod niya: ‘Ang akong amahan mao si Bethuel, ug may lawak para nimo nga kaestahan uban namo.’ Si Bethuel pag-umangkon ni Abraham. Busa ang ulipon ni Abraham mipasalamat kang Jehova nga mitultol niya sa kabanayan ni Abraham.

Nianang gabhiona ang ulipon ni Abraham misaysay kang Bethuel ug sa igsoong lalaki ni Rebeka nga si Laban sa hinungdan sa iyang pag-anha. Sila nagkauyon nga si Rebeka mahimong makauban kaniya ug maminyo kang Isaac. Si Rebeka andam sa pag-uban. Busa sa pagkasunod adlaw misugod sila sa usa ka layo nga panaw balik sa Canaan.

Gabii na silang nahiabot. Si Rebeka nakakita kang Isaac nga naglakaw sa kapatagan. Nalipay siyang nakakita kang Rebeka. Ang iyang inahan nga si Sara namatay tulo ka tuig nang milabay, ug siya sa gihapon masulub-on. Apan karon si Isaac nahigugma kang Rebeka sa labihan gayod, siya malipayon na usab.