Kapitulo 41

Adlaw sa Paghukom sa Diyos​—Ang Makalilipay nga Sangpotanan Niini!

Panan-awon 15​—Pinadayag 20:11–21:8

Ulohan: Ang katibuk-ang pagpamanhaw, Adlaw sa Paghukom, ug mga panalangin sa bag-ong mga langit ug usa ka bag-ong yuta

Panahon sa katumanan: Usa ka Libo ka Tuig nga Pagmando

1. (a) Unsay nawala sa katawhan sa dihang si Adan ug Eva nakasala? (b) Unsang katuyoan sa Diyos ang wala gayod mausab, ug sa unsang paagi nahibalo kita niana?

 INGON nga mga tawo, kita gilalang aron mabuhing walay kataposan. Kon gituman pa ni Adan ug Eva ang mga sugo sa Diyos, dili gayod unta sila mamatay. (Genesis 1:28; 2:8, 16, 17; Ecclesiastes 3:10, 11) Apan sa dihang nakasala sila, nawad-an silag kahingpitan ug kinabuhi alang sa ilang kaugalingon ug sa ilang mga anak, ug kamatayon na ang naghari sa katawhan ingong dili-molunga nga kaaway. (Roma 5:12, 14; 1 Corinto 15:26) Bisan pa niana, ang katuyoan sa Diyos nga ang hingpit nga mga tawo mabuhing walay kataposan sa paraisong yuta wala gayod mausab. Tungod sa iyang dakong gugma alang sa katawhan, iyang gipadala sa yuta ang iyang bugtong nga Anak, si Jesus, nga mihatag sa iyang hingpit tawhanong kinabuhi ingon nga lukat ilis sa “daghan” sa mga anak ni Adan. (Mateo 20:28; Juan 3:16) Si Jesus makagamit na karon sa legal nga bili sa iyang halad aron mapasig-uli ang matinuohong mga tawo sa hingpit nga kinabuhi diha sa usa ka paraisong yuta. (1 Pedro 3:18; 1 Juan 2:2) Pagkatalagsaong katarongan aron ang katawhan ‘magmalipayon ug magmaya’!—Isaias 25:8, 9.

2. Unsay gitaho ni Juan sa Pinadayag 20:11, ug unsa ang “dakong puti nga trono”?

² Tungod kay gibilanggo na si Satanas sa kahiladman, ang mahimayaong Usa ka Libo ka Tuig  nga Pagmando ni Jesus mosugod na. Kana mao na ang “adlaw” nga ‘gitakda sa Diyos aron iyang pagahukman ang gipuy-ang yuta subay sa pagkamatarong pinaagi sa usa ka tawo nga iyang gitudlo.’ (Buhat 17:31; 2 Pedro 3:8) Si Juan nagpahayag: “Ug nakita ko ang usa ka dakong puti nga trono ug ang naglingkod niini. Gikan sa atubangan niya ang yuta ug ang langit nangalagiw, ug walay dapit nga nakaplagan alang kanila.” (Pinadayag 20:11) Unsa kining “dakong puti nga trono”? Kini mao gayod ang lingkoranan sa paghukom sa “Diyos nga Maghuhukom sa tanan.” (Hebreohanon 12:23) Nianang panahona siya maghukom na sa katawhan kon kinsay makabenepisyo sa halad lukat ni Jesus.—Marcos 10:45.

3. (a) Unsay gipasabot sa kamatuoran nga ang trono sa Diyos maoy ‘dako’ ug “puti”? (b) Kinsay mohimo sa pagpanghukom sa Adlaw sa Paghukom, ug sa unsa kana ipasukad?

³ Ang trono sa Diyos ‘dako,’ nga nagpasiugda sa pagkahalangdon ni Jehova ingon nga Soberanong Ginoo, ug kini “puti,” nga nagpaila sa iyang walay-ikasaway nga pagkamatarong. Siya ang kinalabwang Maghuhukom sa katawhan. (Salmo 19:7-11; Isaias 33:22; 51:5, 8) Hinuon, iyang gitugyan ang buluhaton sa pagpanghukom kang Jesu-Kristo: “Wala gayoy usa nga pagahukman ang Amahan, apan iyang gipiyal ang tanang pagpanghukom sa Anak.” (Juan 5:22) Uban ni Jesus ang iyang katimbang nga 144,000, nga ‘gihatagan ug gahom sa pagpanghukom sulod sa usa ka libo ka tuig.’ (Pinadayag 20:4) Bisan pa niana, ang mga sukdanan ni Jehova mao ang magdesidir sa dangatan sa matag indibiduwal sa Adlaw sa Paghukom.

4. Unsay kahulogan nga “ang yuta ug ang langit nangalagiw”?

⁴ Sa unsang paagi “ang yuta ug ang langit nangalagiw”? Kini ang mismong langit nga mipahilayo ingon sa usa ka linukot nga basahon sa pagbukas sa ikaunom nga timbre—ang tawhanong mga magmamando nga “gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon.” (Pinadayag 6:14; 2 Pedro 3:7) Ang yuta mao ang organisadong sistema sa mga butang nga naglungtad ubos sa maong pagmando. (Pinadayag 8:7) Ang pagkalaglag sa mapintas nga mananap ug sa mga hari sa yuta ug sa ilang mga kasundalohan, uban niadtong nakadawat sa marka sa mapintas nga mananap ug sa mga nagsimba sa larawan niini, magtimaan sa pagkalagiw sa maong langit ug yuta. (Pinadayag 19:19-21) Kay gipatuman na ang paghukom diha sa yuta ug langit ni Satanas, ang Dakong Maghuhukom magtakda ug laing Adlaw sa Paghukom.

Ang Usa ka Libo ka Tuig nga Adlaw sa Paghukom

5. Human mangalagiw ang daang yuta ug ang daang langit, kinsay mahibilin nga pagahukman?

⁵ Kinsay nahibilin nga pagahukman human mangalagiw ang daang yuta ug ang daang langit? Dili ang nahibilin sa dinihogang 144,000, kay kini sila nahukman ug natimbrehan na. Kon adunay mga dinihogan nga buhi pa sa yuta human sa Armagedon, sila sa dili madugay mamatay ug modawat sa ilang langitnong ganti pinaagi sa pagkabanhaw. (1 Pedro 4:17; Pinadayag 7:2-4) Hinunoa, ang milyonmilyong sakop sa dakong panon nga niining tungora nakagula na sa dakong kasakitan dayag nga nagbarog sa “atubangan sa trono.” Sila giisip nang matarong aron makalabang-buhi tungod sa ilang pagtuo sa giulang dugo ni Jesus, apan ang paghukom kanila magpadayon gayod latas sa usa ka libo ka tuig samtang si Jesus padayong magagiya kanila ngadto sa “mga tuboran sa mga tubig sa kinabuhi.” Unya, kay mapasig-uli na sa tawhanong kahingpitan ug masulayan human niana, sila igapahayag nga matarong sa labing bug-os nga diwa. (Pinadayag 7:9, 10, 14, 17) Ang mga anak nga maluwas sa dakong kasakitan ug ang mga anak sa dakong panon nga matawo sulod sa Milenyo kinahanglang pagahukman sa susamang paagi sulod sa usa ka libo ka tuig.—Itandi ang Genesis 1:28; 9:7; 1 Corinto 7:14.

6. (a) Unsa ang panon nga nakita ni Juan, ug unsay gipasabot sa mga pulong “ang dagko ug ang gagmay”? (b) Sa unsang paagi pagabangonon ang dili-maihap nga milyonmilyon nga anaa sa panumdoman sa Diyos?

⁶ Apan, si Juan nakakitag usa ka panon nga mas daghan pa kay sa makalabang-buhi nga dakong panon. Ang gidaghanon niana moabot ug linibo ka minilyon! “Ug nakita ko ang mga patay, ang dagko ug ang gagmay, nga nagbarog sa atubangan sa trono, ug gibuksan ang mga linukot nga basahon.” (Pinadayag 20:12a) “Ang dagko ug ang gagmay” naglakip sa inila ug dili kaayo iladong mga tawo nga nabuhi ug namatay niining yutaa sulod sa miaging 6,000 ka tuig. Sa Ebanghelyo nga gisulat ni apostol Juan wala madugay human sa pagsulat sa Pinadayag, si Jesus miingon bahin sa Amahan: “Iyang gihatagan siya [si Jesus] ug awtoridad sa pagpanghukom, tungod kay siya Anak sa tawo. Ayaw kahibulong niini, tungod kay ang takna nagsingabot nga ang tanan nga anaa sa handomanang mga lubnganan makadungog  sa iyang tingog ug manggula.” (Juan 5:27-29) Pagkadakong proyekto—ang pagbuhi pag-usab sa mga patay ug paghanaw sa mga lubnganan sa tibuok nga kasaysayan! Segurado nga ang dili-maihap nga milyonmilyon nga anaa sa panumdoman sa Diyos anam-anam nga bangonon aron ang dakong panon—nga diyutay kaayo kon itandi—makasagubang sa mga suliran nga mahimong motungha tungod kay ang mga binanhaw sa sinugdan lagmit magsunod pa sa ilang karaang estilo sa kinabuhi, uban sa ilang unodnong mga kahuyangon ug mga tinamdan.

Kinsay Pagabanhawon ug Pagahukman?

7, 8. (a) Unsang linukot nga basahon ang gibuksan, ug unsay sunod nga mahitabo? (b) Kinsa ang dili pagabanhawon?

⁷ Si Juan nag-ingon pa: “Apan gibuksan ang laing linukot nga basahon; mao kini ang linukot nga basahon sa kinabuhi. Ug ang mga patay gihukman pinasukad sa mga butang nga nahisulat sa mga linukot nga basahon sumala sa ilang mga buhat. Ug ang dagat mitugyan sa mga patay nga diha niini, ug ang kamatayon ug ang Hades mitugyan sa mga patay nga diha kanila, ug gihukman ang matag usa sumala sa ilang mga buhat.” (Pinadayag 20:12b, 13) Pagkakahibulongang talan-awon! ‘Ang dagat, kamatayon, ug Hades’ matag usa may papel nga ginadula, apan matikdi nga kining mga terminoha dili mapihigon. a Si Jonas, sa dihang didto sa tiyan sa usa ka isda ug busa didto sa taliwala sa dagat, naghisgot nga siya didto sa Sheol, o Hades. (Jonas 2:2) Kon ang usa ka tawo gigamhan pa sa Adanhong kamatayon, siya lagmit gayod nga anaa usab sa Hades. Kining matagnaong mga pulong lig-ong nagpasalig nga walay usa ang mahikalimtan.

⁸ Siyempre, adunay wala-mahibaloi nga gidaghanon nga dili mabanhaw. Nalakip kanila ang dili-mahinulsolong mga eskriba ug mga Pariseo nga misalikway kang Jesus ug sa mga apostoles, ang relihiyosong “tawo sa kalapasan,” ug ang dinihogang mga Kristohanon nga ‘nangahulog.’ (2 Tesalonica 2:3; Hebreohanon 6:4-6; Mateo 23:29-33) Gihisgotan usab ni Jesus ang samag-kanding nga katawhan nga sa kataposan sa kalibotan moadto sa “kalayo nga walay kataposan nga giandam alang sa Yawa ug sa iyang mga manulonda,” nga mao, ang “walay kataposang kalaglagan.” (Mateo 25:41, 46) Kini sila dili gayod pagabanhawon!

9. Sa unsang paagi gipasabot ni apostol Pablo nga adunay pipila nga makadawat ug espesyal nga pabor sa pagkabanhaw, ug kinsay mahilakip kanila?

⁹ Sa laing bahin, ang pipila makadawat ug espesyal nga pabor sa pagkabanhaw. Gipasabot kini ni apostol Pablo sa dihang siya miingon: “Ako adunay paglaom diha sa Diyos . . . nga aduna unyay pagkabanhaw sa mga matarong ug sa mga dili-matarong.” (Buhat 24:15) Mahitungod sa yutan-ong pagkabanhaw, ang “mga matarong” maglakip sa matinumanong mga lalaki ug mga babaye sa kakaraanan—si Abraham, Rahab, ug daghan pang uban—kinsa gipahayag nga matarong tungod sa pagpakighigala sa Diyos. (Santiago 2:21, 23, 25) Mahilakip niini nga grupo mao ang matarong nga ubang mga karnero nga namatay nga matinumanon kang Jehova sa modernong panahon. Kanang tanang maghuhupot sa integridad lagmit pagabanhawon sa sinugdan sa Milenyong Pagmando ni Jesus. (Job 14:13-15; 27:5; Daniel 12:13; Hebreohanon 11:35, 39, 40) Ang daghan niining mga matarong nga banhawon seguradong itudlo sa espesyal nga mga pribilehiyo sa pagdumala sa dako kaayong buluhaton sa pagpasig-uli sa Paraiso.—Salmo 45:16; itandi ang Isaias 32:1, 16-18; 61:5; 65:21-23.

10. Kinsa ang “mga dili-matarong” nga pagabanhawon?

¹⁰ Apan kinsa ang “mga dili-matarong” nga gihisgotan sa Buhat 24:15? Kini maglakip sa dagkong mga panon sa katawhan nga namatay sa tibuok nga kasaysayan, ilabina kadtong nabuhi sa ‘mga panahon sa pagkawalay-alamag.’ (Buhat 17:30) Kini sila, tungod sa ilang dapit natawhan o sa panahong ilang gikinabuhian, wala makahigayon sa pagkat-on sa pagkamasinugtanon sa kabubut-on ni Jehova. Dugang pa, mahimong adunay pipila nga nakadungog sa mensahe sa kaluwasan apan wala mosanong sa bug-os niadtong panahona o namatay nga wala pa sila mouswag hangtod sa pagpahinungod ug pagbawtismo. Sa pagkabanhaw kana sila kinahanglang mohimog dugang kausaban sa ilang panghunahuna ug pagkinabuhi aron sila makapahimulos sa maong kahigayonan nga makabaton sa walay-kataposang kinabuhi.

Ang Linukot nga Basahon sa Kinabuhi

11. (a) Unsa ang “linukot nga basahon sa kinabuhi,” ug kansang mga ngalan ang nahisulat sa maong linukot nga basahon? (b) Nganong buksan ang linukot nga basahon sa kinabuhi sulod sa Usa ka Libo ka Tuig nga Pagmando?

¹¹ Si Juan naghisgot ug “linukot nga basahon  sa kinabuhi.” Kini maoy usa ka rekord sa mga nahalinya nga makadawat ug kinabuhing walay kataposan gikan kang Jehova. Ang mga ngalan sa dinihogang mga igsoon ni Jesus, sa dakong panon, ug sa matinumanong mga tawo sa kakaraanan, sama kang Moises, nahitala sa maong linukot nga basahon. (Exodo 32:32, 33; Daniel 12:1; Pinadayag 3:5) Sa pagkakaron, wala pay usa ka ngalan sa “mga dili-matarong” nga nahisulat diha sa linukot nga basahon sa kinabuhi. Busa ang linukot nga basahon sa kinabuhi buksan sulod sa Usa ka Libo ka Tuig nga Pagmando aron mahisulat ang mga ngalan sa uban pa nga mahimong takos niana. Kadtong mga tawo kansang mga ngalan dili mahisulat sa linukot nga basahon sa kinabuhi ‘itambog ngadto sa linaw nga kalayo.’—Pinadayag 20:15; itandi ang Hebreohanon 3:19.

12. Unsay magtino aron ang ngalan sa usa ka tawo mahisulat diha sa nabuksang linukot nga basahon sa kinabuhi, ug sa unsang paagi ang tinudlong Maghuhukom ni Jehova naghatag ug sulondan?

¹² Nan, unsay magtino aron ang ngalan sa usa ka tawo mahisulat diha sa nabuksang linukot nga basahon sa kinabuhi nianang panahona? Ang usa ka pangunang kinahanglanon mahisama ra sa mga adlaw ni Adan ug Eva: pagkamasinugtanon kang Jehova. Ingon sa gisulat ni apostol Juan ngadto sa hinigugmang mga isigka-Kristohanon: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:4-7, 17) Bahin sa pagkamasinugtanon, ang tinudlong Maghuhukom ni Jehova naghatag ug sulondan: “Bisan tuod [si Jesus] Anak, nakakat-on siya sa pagkamasinugtanon gikan sa mga butang nga iyang giantos; ug human siya mahingpit siya nahimong may kaakohan alang sa walay kataposang kaluwasan sa tanan nga masinugtanon kaniya.”—Hebreohanon 5:8, 9.

Pagbukas sa Ubang mga Linukot nga Basahon

13. Sa unsang paagi kinahanglang ipasundayag sa mga binanhaw ang ilang pagkamasinugtanon, ug unsang mga prinsipyo ang kinahanglan nilang sundon?

¹³ Sa unsang paagi kinahanglang ipasundayag niining mga binanhaw ang ilang pagkamasinugtanon? Gipunting ni Jesus mismo ang duha ka dagkong kasugoan, nga nag-ingon: “Ang una mao, ‘Paminaw, Oh Israel, si Jehova nga atong Diyos maoy usa ka Jehova, ug higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.’ Ang ikaduha mao kini, ‘Higugmaon mo ang imong silingan sama sa imong kaugalingon.’” (Marcos 12:29-31) Aduna say establisado kaayong mga prinsipyo ni Jehova nga kinahanglan nilang sundon, sama sa paglikay sa pagpangawat, pagpamakak, pagbuno, ug imoralidad.—1 Timoteo 1:8-11; Pinadayag 21:8.

14. Unsang ubang mga linukot nga basahon ang pagabuksan, ug unsay sulod niana?

¹⁴ Bisan pa niana, bag-o pang gihisgotan ni Juan ang ubang mga linukot nga basahon nga pagabuksan panahon sa Milenyong Pagmando. (Pinadayag 20:12) Unsa ba unya kini? Usahay, si Jehova naghatag ug espesipikong mga instruksiyon alang sa linaing mga situwasyon. Pananglitan, sa adlaw ni Moises siya mihatag ug detalyadong serye sa mga sugo nga nagkahulogan ug kinabuhi alang sa mga Israelinhon kon sundon nila kana. (Deuteronomio 4:40; 32:45-47) Sa unang siglo, ang bag-ong mga instruksiyon gihatag aron matabangan ang mga matinumanon sa pagsunod sa mga prinsipyo ni Jehova ubos sa Kristohanong sistema sa mga butang. (Mateo 28:19, 20; Juan 13:34; 15:9, 10) Niining panahona si Juan nagtaho nga ang mga patay “gihukman pinasukad sa mga butang nga nahisulat sa mga linukot nga basahon sumala sa ilang mga buhat.” Nan, dayag nga ang pagbukas niining mga  linukot nga basahon magpahayag ug detalyadong mga kinahanglanon ni Jehova alang sa katawhan sulod sa usa ka libo ka tuig. Pinaagi sa pagpadapat sa mga lagda ug mga sugo diha sa maong mga linukot nga basahon nganha sa ilang kinabuhi, ang masinugtanong mga tawo makapalugway sa ilang mga adlaw, nga sa kataposan mahidangat sa kinabuhing walay kataposan.

15. Unsang matang sa edukasyonal nga kampanya ang kinahanglanon unya panahon sa pagpamanhaw, ug sa unsang paagi lagmit himoon ang pagpamanhaw?

¹⁵ Pagkadakong kampanya sa teokratikanhong edukasyon ang kinahanglanon unya! Niadtong 2005, ang mga Saksi ni Jehova sa tibuok kalibotan, sa aberids, nagdumalag 6,061,534 ka pagtuon sa Bibliya sa nagkalainlaing mga dapit. Apan  panahon sa pagpamanhaw unya, walay duhaduha nga pagadumalahon ang dili-maihap nga milyonmilyong pagtuon, nga gipasukad sa Bibliya ug sa bag-ong mga linukot nga basahon! Kinahanglang mahimong mga magtutudlo ug manlimbasog gayod ang tanan nga katawhan sa Diyos. Ang mga binanhaw, samtang sila mouswag, sa walay duhaduha makigbahin niining dako kaayong programa sa pagpanudlo. Lagmit himoon ang pagpamanhaw sa paagi nga kadtong mga buhi malipay sa pag-abiabi ug pagtudlo sa kanhing mga membro sa pamilya ug mga kaila, kinsa, sa baylo, mahimong mag-abiabi ug magtudlo usab sa uban. (Itandi ang 1 Corinto 15:19-28, 58.) Ang kapig unom ka milyong Saksi ni Jehova nga aktibong nagpakaylap sa kamatuoran karon nagpahimutang ug maayong patukoranan alang sa mga pribilehiyong gilaoman nga ilang mabatonan panahon sa pagpamanhaw.—Isaias 50:4; 54:13.

16. (a) Kansang mga ngalan ang dili mahisulat sa linukot nga basahon sa kinabuhi? (b) Kansang pagkabanhaw ang mahimong pagkabanhaw ngadto sa “kinabuhi”?

¹⁶ Mahitungod sa yutan-ong pagkabanhaw, si Jesus miingon nga ‘ang mga nagbuhat ug maayong mga butang manggula ngadto sa pagkabanhaw sa kinabuhi, ang mga nagbuhat ug mangil-ad nga mga butang ngadto sa pagkabanhaw sa paghukom.’ Dinhi ang “kinabuhi” ug ang “paghukom” gitugbang, nga nagpakita nga kadtong mga gibanhaw nga “nagbuhat ug mangil-ad nga mga butang” human matudloi sa inspiradong Kasulatan ug sa mga linukot nga basahon pagahukman nga dili takos sa kinabuhi. Ang ilang mga ngalan dili mahisulat sa linukot nga basahon sa kinabuhi. (Juan 5:29) Mahitabo usab kini kang bisan kinsang nagsubay kanhi sa matinumanong dalan apan tungod sa usa ka hinungdan, motipas panahon sa Usa ka Libo ka Tuig nga Pagmando. Ang mga ngalan mapala baya. (Exodo 32:32, 33) Sa laing bahin, ang mga ngalan niadtong masinugtanong nagsunod sa mga butang nga nahisulat sa mga linukot nga basahon magpabiling nahisulat diha sa linukot nga basahon sa kinabuhi, ug magpadayong buhi. Alang kanila, ang pagkabanhaw maoy pagkabanhaw ngadto sa “kinabuhi.”

Ang Pagkatapos sa Kamatayon ug Hades

17. (a) Unsang talagsaong aksiyon ang gihubit ni Juan? (b) Kanus-a mabakante ang Hades? (c) Kanus-a ‘itambog ngadto sa linaw nga kalayo’ ang Adanhong kamatayon?

¹⁷ Unya gihubit ni Juan ang talagsaon kaayong butang! “Ug gitambog ang kamatayon ug ang Hades ngadto sa linaw nga kalayo. Mao kini ang ikaduhang kamatayon, ang linaw nga kalayo. Dugang pa, si bisan kinsa nga wala makaplaging nahisulat sa basahon sa kinabuhi gitambog ngadto sa linaw nga kalayo.” (Pinadayag 20:14, 15) Pagkatapos sa milenyong Adlaw sa Paghukom, “ang kamatayon ug ang Hades” mahanaw na gayod. Nganong mokabat man kini ug usa ka libo ka tuig? Mabakante na ang Hades, ang komong lubnganan sa tanang tawo, inigkabanhaw sa kataposang patay nga anaa sa panumdoman sa Diyos. Apan samtang ang mga tawo mantsado pa sa napanunod nga sala, ang Adanhong kamatayon anaa gihapon kanila. Ang tanan nga gibanhaw sa yuta, ingon man ang dakong panon nga makalabang-buhi sa Armagedon, kinahanglang mosunod kon unsay nahisulat sa mga linukot nga basahon hangtod ang bili sa lukat ni Jesus mapadapat na diha sa bug-os nga paghanaw sa sakit, pagkatigulang, ug ubang napanunod nga mga depekto. Unya ang Adanhong kamatayon, uban sa Hades, ‘itambog ngadto sa linaw nga kalayo.’ Mahanaw na kini sa walay kataposan!

18. (a) Sa unsang paagi gihubit ni apostol Pablo ang kalamposan sa pagmando ni Jesus ingong Hari? (b) Unsay buhaton ni Jesus sa nahingpit nang tawhanong pamilya? (c) Unsang ubang mga butang ang mahitabo pagkatapos sa usa ka libo ka tuig?

¹⁸ Busa, makompleto na ang programa nga gihubit ni apostol Pablo sa iyang sulat ngadto sa mga taga-Corinto: “Kay kinahanglan [nga si Jesus] magmando ingong hari hangtod ikabutang na sa Diyos ang tanang kaaway ilalom sa iyang mga tiil. Ingong kataposang kaaway, ang [Adanhong] kamatayon pagawagtangon.” Unsay sunod nga mahitabo? “Sa dihang ang tanang butang mapasakop na ngadto kaniya, niana ang Anak magpasakop usab ngadto sa Usa nga nagpasakop sa tanang butang ngadto kaniya.” Sa laing pagkasulti, si Jesus ‘magtugyan sa gingharian ngadto sa iyang Diyos ug Amahan.’ (1 Corinto 15:24-28) Oo, kay nabuntog na ni Jesus ang Adanhong kamatayon pinaagi sa bili sa iyang halad lukat, iyang itugyan ang usa ka nahingpit nang tawhanong pamilya ngadto sa iyang Amahan, si Jehova. Dayag nga niining tungora, pagkatapos sa usa ka libo ka tuig, si Satanas buhian ug mahitabo ang kataposang pagsulay aron matino kon kansang mga ngalan ang magpabiling permanente nga nahisulat diha sa linukot nga basahon sa kinabuhi. ‘Panlimbasog nga kusganon’ aron ang imong ngalan mahilakip kanila!—Lucas 13:24; Pinadayag 20:5.

[Footnote]

[Mga Pangutana sa Pagtuon]

[Hulagway sa panid 298]

Ang mga ngalan sa gibanhawng “mga dili-matarong” nga nagsunod sa nahisulat diha sa mga linukot nga basahon nga pagabuksan panahon sa Usa ka Libo ka Tuig nga Pagmando mahimong mahisulat usab diha sa linukot nga basahon sa kinabuhi