Sa kapanahonan sa Bibliya ang paghalok o ang pagdapat sa ngabil sa usa ka tawo ngadto sa ngabil sa laing tawo (Pr 24:26), ngadto sa aping sa laing tawo, o, sa talagsaon nga kahimtang, bisan ngadto sa iyang mga tiil (Luc 7:​37, 38, 44, 45), nagsilbing usa ka timaan sa pagmahal o pagtahod. Ang paghalok maoy komon dili lamang tali sa mga paryenteng lalaki ug babaye (Gen 29:11; 31:28) kondili tali usab sa mga paryenteng lalaki. (Gen 27:​26, 27; 45:15; Ex 18:7; 2Sa 14:33) Usa usab kini ka pahayag sa pagmahal tali sa suod nga mga higala.​—1Sa 20:​41, 42; 2Sa 19:39.

Ang paghalok mahimong maglakip sa pagpahayag ug panalangin. (Gen 31:55) Ang tigulang nga si Israel o Jacob mihalok ug migakos sa mga anak nga lalaki ni Jose, si Epraim ug Manases, sa wala pa magpanalangin sa ilang amahan ug kanila. (Gen 48:8-20) Sa ulahi, sa dihang nahatag na sa patriarka ang mga sugo ngadto sa iyang 12 ka anak nga lalaki, siya nabugtoan sa gininhawa, ug “si Jose mihalog sa nawong sa iyang amahan ug mihilak kaniya ug mihalok kaniya.” (Gen 49:33–​50:1) Si Samuel mihalok kang Saul sa dihang nagdihog kaniya ingong unang hari sa Israel.​—1Sa 10:1.

Ang usa ka mabinationg pangomosta naglakip sa paghalok, nga tingali inubanan sa paghilak ug paggakos. (Gen 33:4) Ang amahan sa mibalik nga anak nga mausikon sa sambingay ni Jesu-Kristo migakos sa liog sa iyang anak ug “mabinationg mihalok kaniya.” (Luc 15:20) Ang paghalok nalangkit usab sa mahigugmaong pagpanamilit. (Gen 31:55; Ru 1:​9, 14) Sa dihang si apostol Pablo hapit nang mobiya sa Mileto, ang mga ansiyano sa kongregasyon sa Efeso natandog kaayo nga tungod niana sila nanghilak ug “gigakos si Pablo sa liog ug gihalokan siya nga mabination.”​—Buh 20:​17, 37.

Ang Bibliya daklit lamang nga naghisgot sa mga halok maylabot sa gugma tali sa mga magkaatbang nga sekso. (Aw 1:2; 8:1) Sa paghatag ug tambag nga magbantay batok sa mga laraw sa usa ka daotan nga babaye, ang basahon sa Mga Proverbio nagpasidaan batok sa mahayloon nga halok sa usa ka pampam.​—Pr 7:13.

Ang mga halok mahimong sinalingkapaw. Si Absalom, nga malansisong nagtinguha ug gahom, mihalok sa mga tawo nga miduol kaniya aron sa pagyukbo. (2Sa 15:​5, 6) Ang maluibong halok ni Joab nagkahulogan ug kamatayon sa walay-kalibotang si Amasa. (2Sa 20:​9, 10) Dugang pa, maoy pinaagig malimbongon nga halok nga si Judas Iskariote nagbudhi kang Jesu-Kristo.​—Mat 26:​48, 49; Mar 14:​44, 45.

Bakak nga Pagsimba. Ang paghalok ingong usa ka buhat sa pagsimba sa bakak nga mga diyos gidili ni Jehova, kinsa naghisgot sa 7,000 ka tawo nga wala moluhod ug mohalok kang Baal. (1Ha 19:18) Ang Epraim gibadlong tungod sa paghimog mga idolo ug sa pag-ingon: “Ang mga tawo nga naghalad pahaloka sa mga nating baka.” (Os 13:​1-3) Ang mga Grego ug mga Romano adunay batasan sa paghalok ginamit ang kamot patunong sa ilang mga idolo, kon kini layo gikan kanila, ug niining paagiha gitimbaya usab nila ang misubang nga adlaw. Lagmit nga gipunting sa Job 31:27 ang susamang idolatrosong buhat.

Ang “Balaang Halok.” Taliwala sa unang mga Kristohanon dihay “balaang halok” (Rom 16:16; 1Co 16:20; 2Co 13:12; 1Te 5:26) o “halok sa gugma” (1Pe 5:14), nga lagmit gihimo sa mga indibiduwal nga pareho ug sekso. Kini nga matang sa pangomosta sa unang mga Kristohanon lagmit nga katumbas sa karaang Hebreohanong batasan sa pagpangomosta sa usa ka tawo pinaagig halok. Bisan tuod ang Kasulatan wala mohatag ug mga detalye bahin niini, ang “balaang halok” o “halok sa gugma” dayag nga nagpabanaag sa makapalig-on nga gugma ug panaghiusa nga naglungtad sa Kristohanong kongregasyon.​—Ju 13:​34, 35.

Mahulagwayong Paggamit. Ang paghalok, ingong pagpasundayag sa pagtahod ug sa debosyon, gihisgotan diha sa inspiradong tambag sa ‘pag-alagad kang Jehova uban ang kahadlok’ ug sa ‘paghalok sa anak, aron dili Siya masuko ug dili kamo mangahanaw gikan sa dalan.’ (Sal 2:​11, 12) Ang mga tawo nga paborableng misanong ug nagpasakop sa usa nga gitudlo sa Diyos ingong Hari ug sa iyang Gingharian makabaton ug dagkong mga panalangin sa dihang kini ikaingon: “Ang pagkamatarong ug pakigdait​—sila naghinalokay,” tungod kay ang kalangkitan niining duha madayag gayod sa tanan sama sa suod nga panag-uban sa mabinationg managhigala.​—Sal 85:10.