Usa ka walog diin sa duha ka okasyon gipildi sa mga Israelinhon ang mga Edomhanon. (2Sa 8:13; 2Ha 14:7) Ang tukmang nahimutangan niini dili matino, apan ang mga eskolar sa katibuk-an mirekomendar sa bisan hain sa duha ka dapit, ang usa duol sa Beer-seba ug ang lain sa H sa Dagat sa Asin.

Sa sidlakan gikan sa Beer-seba sa Negeb adunay usa ka walog nga ang ngalan sa Arabiko (Wadi el-Milh) nagkahulogang Walog sa Asin. Kini mao ang dapit diin ang mga Judeanhon gikan sa A ug ang  mga Edomhanon gikan sa HS mahimong magtagbo aron magsangka. Apan, ang pipila ka eskolar, nga mipabor sa usa ka dapit sa teritoryo sa Edom, nagtuo nga ang Walog sa Asin diha sa Kasulatan mao ang patag sa HHK sa Dagat sa Asin. Sa pagkakaron, ang kapatagan sa H sa Dagat sa Asin maoy kalamakan ug dili gayod usa ka dapit nga mahimong pilion alang sa pagpakiggubat. Apan, sanglit mitaas ang lebel sa Dagat sa Asin, ang patag lagmit nga mas bantok sa panahon nga nahitabo ang mga gubat, o ang gubat mahimong nagsugod diha sa usa ka bahin sa walog diin ang yuta dili kalamakan. Human sa ikaduhang panaggubat, ang 10,000 ka Edomhanon gipanghulog gikan sa usa ka pangpang ug nangamatay, apan ang nahimutangan sa maong pangpang wala hisgoti.​—2Cr 25:​11, 12.

Sa unang gubat, si David ug Joab (lagmit uban kang Abisai nga nangulo sa pipila ka sundalo) nakapatay ug 18,000 ka Edomhanon sa Walog sa Asin. (2Sa 8:13; 1Ha 11:15; 1Cr 18:12; Sal 60:Sup) Sa ulahi, si Haring Amazias (858-830 W.K.P.) miatake ug nakapatay ug 10,000 ka Edomhanon sa samang walog, ug human niini iyang gipatay ang 10,000 ka Edomhanon nga nadakpan, ingon man giilog ang Edomhanong kuta sa Sela.​—2Ha 14:7; 2Cr 25:​11, 12; tan-awa ang EDOM, EDOMHANON.