Kapitulo 15

Sa Unsang Paagi si Jehova Nagatultol sa Iyang Kapunongan?

1. Unsang impormasyon bahin sa kapunongan ni Jehova nga gibutyag sa Bibliya, ug nganong importante kana alang kanato?

 PINAAGIG inspiradong Kasulatan, si Jehova nagahatag kanato ug mga pasiplat sa iyang kahibulongan langitnong kapunongan. (Isa. 6:2, 3; Ezek. 1:1, 4-28; Dan. 7:9, 10, 13, 14) Bisan tuod dili ta makita ang espiritung mga linalang, siya nagapaigmat kanato sa mga paagi nga niana ang buluhaton sa balaang mga anghel mag-apektar sa matuod nga mga magsisimba ibabaw sa yuta. (Gen. 28:12, 13; 2 Hari 6:15-17; Sal. 34:7; Mat. 13:41, 42; 25:31, 32) Ang Bibliya usab nagahubit sa makitang bahin sa organisasyon ni Jehova ug nagatabang kanato sa pagsabot kon giunsa niya sa pagtultol niana. Kon kita aduna gayod ing espirituwal nga salabotan niining mga butanga, kini moabag kanato sa “paglakaw nga takos kang Jehova aron sa bug-os makapahimuot kaniya.”​—Col. 1:9, 10.

Pagbutyag sa Makitang Bahin

2. Sukad sa Pentekostes sa 33 K.P. unsa ang kongregasyon nga iya sa Diyos?

² Sa 1,545 ka katuigan ang nasod sa Israel mao ang kongregasyon sa Diyos. Apan sila napakyas sa pagtuman sa tugon sa Kasugoan ug misalikway sa kaugalingong Anak sa Diyos. Busa gipatungha ni Jehova ang usa ka bag-ong kongregasyon, nga uban niana iyang gihimo ang usa ka bag-ong tugon. Kining kongregasyona gibutyag sa Kasulatan nga mao ang “pangasaw-onon” ni Kristo, nga nalangkoban ug 144,000 nga gipili sa Diyos aron mahiusa uban sa iyang Anak didto sa langit. (Efe. 5:22-32; Pin. 14:1; 21:9, 10) Ang mga una kanila gidihogan ug balaang  espiritu sa panahon sa Pentekostes, 33 K.P. Pinaagi sa balaang espiritu si Jehova mihatag ug dili masayop nga pamatuod sa maong panahon nga mao kini ang kongregasyon nga iyang gamiton sa pagpalampos sa iyang katuyoan.​—Heb. 2:2-4.

3. Kinsa karon ang naglangkob sa makitang organisasyon ni Jehova?

³ Karon usa ka nanghibilin lamang sa 144,000 ang ania sa yuta. Apan, diha sa katumanan sa tagna sa Bibliya, ang usa ka dakong panon sa “ubang mga karnero” gipaduyog sa aktibong pakig-uban kanila. Si Jesu-Kristo, ang Maayong Magbalantay, nagtingob niining “ubang mga karnero” sa mga nanghibilin sa iyang inanak-espiritu nga mga sumusunod mao nga sila nalangkob nga “usa ka panon” lamang ubos kaniya ingong ilang “usa ka magbalantay.” (Juan 10:11, 16; Pin. 7:9, 10) Kini silang tanan naglangkob ug usa ka nahiusang organisasyon, ang makitang kapunongan ni Jehova karon.

Teokratikanhon sa Gambalay

4. Kinsa ang nagatultol sa organisasyon, ug sa unsang paagi?

⁴ Ang Kasulatanhong pagtawag nga “kongregasyon sa buhing Diyos” nagapamatuod na kon kinsa ang nagatultol niana. Ang organisasyon maoy teokratikanhon, o gimandoan-Diyos. Si Jehova ang nagahatag ug pagtultol alang sa iyang katawhan pinaagi kaniya nga Iyang gitudlo nga mahimong dili makitang ulo sa kongregasyon, ang Ginoong Jesu-Kristo, ug pinaagi sa Iyang kaugalingong dinasig nga Pulong, ang Bibliya.​—1 Tim. 3:14, 15; Efe. 1:22, 23; 2 Tim. 3:16, 17.

5. (a) Giunsa pagpadayag sa langitnong pagtultol sa kongregasyon sa unang siglo? (b) Unsa ang nagpakita nga si Jesus mao gihapon ang ulo sa kongregasyon?

⁵ Ang maong teokratikanhong pagtultol dayag kaayo sa dihang ang unang mga membro sa kongregasyon napalihok sa balaang espiritu sa Pentekostes sa 33 K.P. (Buh. 2:1-4, 32, 33) Dayag kadto sa dihang ang manulonda ni Jehova mitultol sa mga hitabo nga nagpakaylap sa maayong balita ngadto sa Aprika. (Buh. 8:26-39) Mao man usab, sa nadungog ang tingog ni Jesus nga nagtultol sa pagkakabig ni  Saulo sa Tarso ug ingon man sa dihang gisugdan ang buluhatong misyonaryo taliwala sa mga Hentil. (Buh. 9:3-7, 10-17; 10:9-16, 19-23; 11:12) Pero ang gikinahanglang pagtultol wala ikatagana kanunay sa maong mapasundayagong mga paagi. Miabot ang panahon nga wala nay madungog nga mga tingog gikan sa langit, wala nay mga anghel nga nagpakita sa mga tawo ug wala nay milagrosong mga gasa sa espiritu. Apan si Jesus misaad sa iyang matinumanong mga sumusunod: “Tan-awa! Ako magauban kaninyo sa tanang adlaw hangtod sa konklusiyon sa sistema sa mga butang,” ug ang mga kamatuoran nagpakita nga siya nagauban. (Mat. 28:20; 1 Cor. 13:8) Dili lang ang mga Saksi ni Jehova nagaila sa iyang pagkaulo, kondili maoy dayag nga imposible unta alang kanila sa pagpadayon sa pagmantala sa mensahe sa Gingharian tungod sa hilabihang kabangis kon wala pa ang iyang tabang.

6. (a) Kinsa ang naglangkob sa “matinumanon ug maalamong ulipon,” ug ngano? (b) Unsang asaynment nga iyang gihatag ngadto sa maong “ulipon”?

⁶ Sa hapit na ang kamatayon ni Jesus siya misulti ngadto sa iyang mga tinun-an bahin sa “matinumanon ug maalamong ulipon” nga siya ingong Agalon motugyan niana uban ang espesyal nga kaakohan. Kanang maong “ulipon,” sumala sa paghubit ni Jesus, anaa na dihang ang Ginoo miadto sa langit ug sa gihapon buhi sa panahon sa pagbalik ni Kristo. Ang maong kahubitan dili mahimong motukma sa indibiduwal nga tawo. Pero kana mohaom sa matinumanon dinihogang kongregasyon ni Kristo sa linangkob nga pagtamod. Hibalo si Jesus nga kinahanglan niyang paliton sila pinaagi sa iyang kaugalingong dugo, mao nga sa tukma iyang gipunting sila ingong iyang “ulipon” sa linangkob. Iyang gihatagan silag buluhatong pagabuhaton, ug nagsugo kanilang tanan sa paghimog mga tinun-an ug unya sa mauswagon magapakaon kanila sa espirituwal, nga nagahatag kanila sa “ilang [espirituwal] nga pagkaon sa hustong panahon.” Ang ilang pagkatudlo gilig-on pinaagig balaang espiritu sa Pentekostes sa 33 K.P.​—Mat. 24:45-47; 28:19, 20; 1 Cor. 6:19, 20; itanding Isaias 43:10.

7. (a) Unsang napadakong mga kaakohan nga nabatonan karon sa “ulipon”? (b) Ngano ang atong pagsanong sa instruksiyon pinaagi ning maong kanal nga galamiton importante?

 ⁷ Sa pagbalik sa Agalon, kon ang “ulipon” matinumanong nagbuhat sa iyang buluhaton, siya tugyanan sa mas dakong mga kaakohan. Ang mga tuig nga misunod maoy panahon sa globonhong pagpamatuod sa Gingharian, ug ang “dakong panon” sa mga magsisimba ni Jehova pagatigomon uban sa panglantaw sa ilang kaluwasan latas sa “dakong kasakitan.” (Mat. 24:14; Pin. 7:9, 10) Kini sila, usab, nanginahanglan ug espirituwal nga pagkaon, ug kana idulot kanila pinaagig linangkob nga “ulipon,” ang dinihogan-espiritung mga alagad ni Kristo. Aron makapahimuot kang Jehova, gikinahanglan tang dawaton ang pagtudlo nga iyang gitagana pinaagi ning maong kanal galamiton ug sa paggawi diha sa bug-os nga pagpahiuyon niana.

8, 9. (a) Dihay unsang kahikayan sa unang siglo sa pagsulbad sa mga suliran bahin sa doktrina ug paghatag ug gikinahanglang pagtultol maylabot sa pagsangyaw sa maayong balita? (b) Unsang susamang mga kahikayan ang nagalungtad karon?

⁸ May mga panahon, siyempre, nga ang mga suliran bahin sa doktrina ug paagi hayan motungha. Nan unsa? Ang ika-15 nga kapitulo sa Mga Buhat nagtug-an kon giunsa pagsulbad ang suliran bahin sa mga kinahanglanon alang sa Hentil nga mga kinabig. Kadto giduso ngadto sa mga apostol ug mga ansiano sa Jerusalem, kinsa nag-alagad ingong ulohang nagamandong lawas. Kadtong maong mga ansiano dili man kay dili masayop; dili sila mga tawo nga wala pa gayod masayop. (Itanding Galacia 2:11-14.) Apan ang Diyos migamit kanila. Ilang gitagad kon unsa ang giingon sa dinasig nga Kasulatan bahin sa ulohang giduso maingon man sa pamatuod sa paglihok sa espiritu sa Diyos diha sa pagbukas sa Hentil nga kanataran, ug unya ilang gihimo ang desisyon. Ang Diyos nagpanalangin sa maong kahikayan. (Buh. 15:1-29; 16:4, 5) Gikan sa maong ulohang lawas, ang mga indibiduwal gipadala usab aron padakoon ang pagsangyaw sa maayong balita nga subay sa gimbut-an mismo sa Ginoo.​—Buh. 8:14; Gal. 2:9.

⁹ Sa atong adlaw ang Nagamandong Lawas gilangkoban ug dinihogan-espiritung mga igsoong lalaki gikan sa lainlaing  kayutaan. Nahimutang kana didto sa kalibotang hedkuwarter sa mga Saksi ni Jehova. Sa lokal kana nagapauswag sa intereses sa putling pagsimba ubos sa pagkaulo ni Jesu-Kristo. Kining maong mga igsoon misunod sa panghunahuna sa apostol nga si Pablo, kinsa, sa nagpadalag espirituwal nga tambag ngadto sa mga isigka-Kristohanon, misulat: “Dili kay kami mga agalon sa inyong pagtuo, hinunoa kami mga isigkamagbubuhat alang sa inyong kalipay, kay pinaagi man sa inyong pagtuo nga kamo nagabarog nga malig-on.”​—2 Cor. 1:24.

10. (a) Unsaon sa pagtino kon kinsa ang mahimong mga ansiano o ministeryal nga mga alagad? (b) Nganong kinahanglan kitang suod nga mokooperar uban kanilang gitudlo sa maong mga katungdanan?

¹⁰ Kining maong teokratikanhong kahikayan giila sa mga Saksi ni Jehova sa tibuok nga kalibotan. Ang tanan nilang lokal nga mga kongregasyon nagabuhat diha sa suod nga pagtambayayong niana. Sila nagatutok sa Nagamandong Lawas sa pagtaganag pagkatinudlo sa mga ansiano ug ministeryal nga mga alagad aron sa pag-atiman sa hanoy nga kalihokan sa mga kongregasyon. Pinasukad sa unsa nga ang mga tawo pilion sa maong pagkatudlo? Ang mga kinahanglanon matin-aw nga gihisgotan diha sa Bibliya. Ang mga ansiano nga nagahimog mga rekomendasyon ug kadtong giawtorisahan sa paghimo sa maong pagtudlo nagapas-an ug mabug-at nga responsabilidad atubangan sa Diyos sa pagsunod niining mga kinahanglanona. (1 Tim. 3:1-10, 12, 13; 5:22; Tito 1:5-9) Walay pamuriring (sa politika) taliwala sa mga membro sa kongregasyon ni unsa mang kongregasyonal nga pagboto. Hinunoa, uyon sa gibuhat sa mga apostol sa dihang ang pagkatinudlo [appointments] gihimo sa unang siglo, kadtong mga magtatan-aw nga maoy nagrekomendar, ug kadtong sa ulahi maghimo sa mga pagkatinudlo, nanag-ampo alang sa panabang sa espiritu sa Diyos ug nangayog giya gikan sa iyang dinasig nga Pulong. (Buh. 6:2-4, 6; 14:23; itanding Salmo 75:6, 7.) Pinaagig atong pagsanong sa pagtultol nga gihatag sa mga ansiano, atong ikapakita ang atong pagpabili sa mahigugmaong tagana ni Kristo niining “gasa diha sa mga lalaki” sa  pagtabang kanatong tanan nga makab-ot ang “pagkausa diha sa pagtuo.”​—Efe. 4:8, 11-16.

11. (a) Unsang bililhong mga pag-alagad ang ginabuhat sa mga babaye nga subay sa teokratikanhong kahikayan? (b) Kanus-a man nga sila kinahanglang magbutang ug pandong sa ulo, ug ngano?

¹¹ Ang Kasulatan nagamando nga ang mga katungdanan sa pagdumala diha sa kongregasyon atimanon sa mga lalaki. Kini dili gayod pagyatak sa mga babaye, kay daghan man kanila ang apil sa mga manununod sa langitnong Gingharian. Pinaagig mapaubsanon, putling panggawi ug kakugi sa pag-atiman sa ilang mga pamilya, ang Kristohanong mga babaye usab makadugang sa maayong kadungganan sa kongregasyon. (Tito 2:3-5) Sagad dako ang ilang mahimo sa buluhaton sa pagpangita sa bag-ong mga interesado ug sa pagdala kanila nga makakontak sa organisasyon. (Sal. 68:11) Pero ang pagpanudlo sulod sa kongregasyon pagadumalahon sa mga lalaki nga gitudlo. (1 Tim. 2:12, 13) Ug kon walay takos nga mga lalaki diha sa tigom nga gihikay sa kongregasyon, nan ang usa ka babaye makagamit ug pandong sa ulo sa dihang nagadumala o nagaampo. a Sa ingon siya nagapakitag pagtahod sa kahikayan ni Jehova, gani si Jesus mihatag man ug panig-ingnan alang sa tanan diha sa pagpasakop sa iyang Amahan.​—1 Cor. 11:3-16; Juan 8:28, 29.

12. (a) Unsang tinamdan ang giawhag sa Bibliya nga pagahuptan sa mga ansiano maylabot sa ilang katungdanan? (b) Diha sa unsang bulawanong pribilehiyo nga ang tanan kanato mahimong makig-ambit?

¹² Diha sa kalibotan ang tawo nga nagahupot ug iladong katungdanan ginatagad nga importante, pero sulod sa organisasyon  sa Diyos ang lagda mao: “Siya nga nagagawi sa iyang kaugalingon ingong diyutay kaninyong tanan mao siya ang dako.” (Luc. 9:46-48; 22:24-26) Busa ang Kasulatan nagtambag sa mga ansiano nga magmabinantayon nga dili magharihari kanilang gipiyal sa Diyos kondili, hinuon, mahimong mga panig-ingnan sa panon. (1 Ped. 5:2, 3) Dili ang pipila lang nga gipili, apan ang tanan sa mga Saksi ni Jehova, lalaki ug babaye, adunay bulawanong pribilehiyo sa pagrepresentar sa Magmamando sa uniberso, nga mapainubsanong nagahisgot sa iyang ngalan ug nagatug-an sa katawhan bisan diin bahin sa iyang Gingharian.

13. Ginamit ang mga teksto nga gisitar, hisgoti ang mga pangutana nga gitala sa kataposan niining parapoha.

¹³ Makaayong pangutan-on ang atong kaugalingon: “Kita ba gayod nagapabili sa paagi ni Jehova sa pagtultol sa iyang makitang kapunongan? Ang ato bang mga tinamdan, sinultihan ug mga buhat nagabanaag niana?” Ang pagpangatarongan sa mosunod nga mga puntos makaabag sa matag usa kanato aron himoon ang maong pagsusi:

 Kon sa tininuod nagapasakop kita kang Kristo ingong ulo sa kongregasyon, nan, ingon sa gibutyag sa mosunod nga mga teksto, unsa man ang atong pagabuhaton? (Mat. 24:14; 28:19, 20; Luc. 21:34-36; Juan 13:34, 35)

 Diha sa ilang mga panlimbasog nga mahimong mabungahong mga Kristohanon, ngadto sa unsang gidak-on nga ang tanan kinsa bahin sa organisasyon kinahanglang mobati nga masaligon sa Diyos ug kang Kristo? (Juan 15:5; 1 Cor. 3:5-7)

 Sa dihang paninguhaon sa mga ansiano nga ipatakdo ang panghunahuna sa mga tawo aron ang ilang pagsabot sa mga butang mahauyon sa kadaghanan sa organisasyon, kang kinsang malulotong kabalaka ang kinahanglang atong pagailhon maylabot niini? (Efe. 4:7, 8, 11-13; 2 Cor. 13:11)

 Sa dihang sa maabiabihon dawaton ta ang espirituwal nga mga tagana nga nagaabot pinaagig “ulipon” nga matang ug sa Nagamandong Lawas niini, alang kang kinsa nga kita nagapakitag pagtahod? Pero unsa man kon kita magmatamayon niini? (Luc. 10:16; itanding 3 Juan 9, 10.)

 Nganong dili gayod kita maharasong manaway sa tinudlong mga ansiano? (Buh. 20:28; Roma 12:10)

14. (a) Pinaagig atong tinamdan maylabot sa teokratikanhong organisasyon, unsa man ang atong ginapasundayag? (b) Niining bahina, adunay unsang mga kahigayonan alang kanato aron pamatud-an ang Yawa nga usa ka bakakon ug sa paghatag ug kangaya sa kasingkasing ni Jehova?

 ¹⁴ Maoy pinaagi sa iyang makitang organisasyon ubos ni Kristo ingong tinudlong ulo nga si Jehova nagadumala kanato karon. Busa ang atong tinamdan ngadto ning maong kapunongan nagapasundayag diha sa praktikal nga paagi sa baroganan nga atong gihuptan bahin sa suliran sa pagkasoberano. (Heb. 13:17) Si Satanas nangatarongan nga kitang tanan gipalihok sa tinguha alang sa personal nga kaayohan, nga ang atong unang gikabalak-an mao ang kaugalingon. Pero kon kita malipayong magpalugar sa atong kaugalingon aron mag-alagad diha sa bisan unsang paagi nga gikinahanglan, samtang nagaayad sa pagsulti ug pagbuhat sa mga butang nga magbutad ug wala kinahanglanang pagtagad sa kaugalingon, atong ginapamatud-an nga ang Yawa maoy bakakon. Kon atong higugmaon ug tahoron silang ‘nagapanguna’ sa atong taliwala, nga nagasundog sa ilang pagtuo pero nagadumili sa pagkahimong matang sa tawo kinsa ‘mabihag sa mga personalidad alang sa iyang kaugalingong kaayohan,’ kita nagapangaya sa kasingkasing ni Jehova. (Heb. 13:7; Jud. 16) Pinaagig pag-ugmad ug makaayong pagtahod dapig sa kapunongan ni Jehova ug sa kinasingkasing nagabuhat sa buluhaton nga iyang gimbut-an, kita nagahatag ug pamatuod nga si Jehova mao gayod ang atong Diyos ug kita nahiusa diha sa iyang pagsimba.​—1 Cor. 15:58.

[Mga footnote]

Repasong Panaghisgot

● Unsa ang makitang kapunongan ni Jehova karon? Unsa ang katuyoan niana?

● Kinsa ang tinudlong ulo sa kongregasyon? Pinaagig unsang makitang mga kahikayan nga iyang ginatagana ang mahigugmaong pagtultol alang kanato?

● Unsang makaayong mga tinamdan ngadto sa kaakohan ug sa mga tawo diha sa organisasyon nga kinahanglan natong ugmaron?

[Mga Pangutana sa Pagtuon]