Kapitulo 27

Nganong Gusto Ko nga Mahimo Gyod Kong Perpekto?

Maglagot ka ba kon dili ka makakuhag 100 sa eksamin sa eskuylahan?

□ Oo

□ Dili

Mobati ka ba nga wala kay pulos kon sawayon ka?

□ Oo

□ Dili

Naglisod ka ba sa pagpakighigala o sa pagpatunhay sa panaghigalaay tungod kay morag walay nakaabot sa imong sukdanan?

□ Oo

□ Dili

KON nakatubag kag oo sa usa o duha sa mga pangutana sa ibabaw, tingali perpeksiyonista ka. Seguro mangutana ka, ‘Apan daotan ba kon gusto ko nga maayo kaayo ang tanan nakong pagabuhaton?’ Aw, wala may daotan niana. Gani gihatagag komendasyon sa Bibliya ang tawo nga “hanas sa iyang buhat.” (Proverbio 22:29) Apan sobra ra pod ang perpeksiyonista kay siya moinsistir nga kinahanglang wala siyay mahimong sayop.

Pananglitan, ang 19-anyos nga si Jason miingon: “Para nako bala  ako nga estudyante kon dili ako makakuhag 100 sa eksamin niadtong nag-eskuyla pa ko sa hayskul. Kon motugtog pod kog piano, gusto ko nga sama ko ka hanas motugtog sa propesyonal nga pianista.”

Ang pagtinguha nga mahimong perpekto makababag usab sa pagsimba. Palandonga ang mahitabo sa usa ka batan-on nga gilantaw nga maayong sulondan. Kay kanunay man siyang sentro sa atensiyon, mora siyag sirkador nga naglakaw sa pisi diin ang tanan nagbantay sa iyang matag tikang. Siyempre, ang Kristohanong mga batan-on ug tigulang makabenepisyo sa maayong mga sulondan sa kongregasyon. Apan, ang batan-on nga gustong malantaw nga maayo sa ngatanan dili magmalipayon sa iyang pag-alagad sa Diyos. Busa, kini nga batan-on nagkinahanglag tabang. Apan tingalig dili siya mangayog tabang kay mahadlok siya nga basig mahigawad kadtong taas kaayog pagtamod kaniya. Mahimong matental siya sa pag-angka, ug mangatarongan, ‘Dili nako maabot ang akong hingpit nga mga sukdanan, busa nganong maningkamot pa man ko?’

Pagbuntog sa Tinguha nga Mahimong Perpekto

Ang perpeksiyonista maglisod tungod kay gusto niya nga dili siya makahimog sayop. Apan dili gayod kana maayo nga kaisipan. Ang Bibliya prangkang nag-ingon: “Ang tanan nakasala ug wala makaabot sa himaya sa Diyos.” (Roma 3:23) Busa imposible nga mahimo kitang perpekto. Sa pagkatinuod, ang pagtuo nga makabuhat kag mga butang sa hingpit nga paagi maoy sama ka imposible sa  pagtuo nga makalupad ka. Bisag unsaon pa nimog tuo, dili gyod ka makalupad!

Sa unsang paagi makontrolar nimo ang imong pagkaperpeksiyonista? Sulayi ang mosunod:

Usba ang imong pagsabot sa pulong nga “kalamposan.” Gihago mo ba pag-ayo ang imong kaugalingon aron mahimo kang labing maayo sa bisan unsang butang? Gipakita sa Bibliya nga mora kag ‘naggukod sa hangin’ kon mangagpas ka nga mahimong labing maayo. (Ecclesiastes 4:4) Sa pagkatinuod, pipila lang ang nahimong “labing maayo.” Ug bisan pag dunay labing maayo, moabot ang panahon nga dunay motungha nga mas maayo pa. Sa ato pa, ang pulong kalamposan nagpasabot ug paghimo sa imong labing maayo​—dili kay magpalabaw ka sa uban.​—Galacia 6:4.

Magmarealistiko. Ayaw pagdahom ug sobra sa imong mahimo ug hunahunaa sab ang imong mga limitasyon. Ang pagtakda ug taas kaayong sukdanan alang sa imong kaugalingon maoy ilhanan  nga wala ka makakita sa imong mga limitasyon ug gihatagan nimog dakong importansiya ang imong kaugalingon. Si apostol Pablo mihatag ug maalamong tambag: ‘Ako magasulti sa tanan dinha sa inyong taliwala nga dili maghunahuna ug labaw sa inyong gihunahuna.’ (Roma 12:3) Busa magmarealistiko. Bag-oha ang imong mga pagdahom. Himoa ang imong labing maayo apan ayaw paninguha nga mahimo kang perpekto.

Relaks lang! Sulayi ang mga butang nga dili ka maayo, sama sa pagtugtog ug instrumento sa musika. Natural lang nga  magkasayop-sayop gyod ka. Apan tan-awa ang imong mga sayop sa laing paagi. Ang Bibliya nag-ingon nga dunay “panahon sa pagkatawa.” (Ecclesiastes 3:4) Busa relaks lang, kay kon relaks ka makita nimo nga ang kasaypanan nga imong mahimo maoy bahin lamang sa proseso sa pagkat-on. Siyempre, maglisod ka tingali sa pagdawat nga masayop ka. Apan paningkamot nga mawala ang maong negatibo ug makapaluyang tinamdan.

Hinumdomi nga si Jehova wala magpangayo ug kahingpitan; buot lang niya nga magmatinumanon kita kaniya. (1 Corinto 4:2) Kon maningkamot ka nga magmatinumanon, malipay ka gayod sa pagdawat kon kinsa ka​—bisag dili ka hingpit.

SA SUNOD NGA KAPITULO

Balewala na sa kadaghanan karon kon bayot ka man o tomboy. Unsay imong himoon aron makalikay ka niana? Komosta kon may tendensiya ka sa pagkahimong bayot o tomboy?

TEKSTO

“Walay tawong matarong sa yuta nga nagpadayon sa pagbuhat sa maayo ug dili makasala.”​—Ecclesiastes 7:20.

SUGYOT

Paghunahunag usa ka buluhaton nga wala dayon nimo himoa kay nahadlok ka nga dili nimo kini mahimo sa hingpit nga paagi. Dayon pagtakda ug petsa kon kanus-a nimo kini humanon.

NAHIBALO KA BA . . . ?

Si Jehova hingpit, apan sa dihang makiglabot siya sa mga tawong dili hingpit, wala siya mangayog kahingpitan kanila. Siya makataronganon ug realistiko sa iyang mga ginadahom kanato.

ANG AKONG PLANONG HIMOON!

Kini ang akong himoon kon nagpangita ako ug kahingpitan sa akong kaugalingon ․․․․․

Kini ang akong himoon kon nagpangita ako ug kahingpitan sa uban ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Unsang bahina sa kinabuhi nga taas ra kaayo kag gitakda nga mga sukdanan sa imong kaugalingon?

● Unsang mga teksto sa Bibliya ang nagpakita nga si Jehova nga Diyos wala magpangayog kahingpitan sa iyang mga alagad?

● Nganong ang uban magpalayo nimo kon perpeksiyonista ka?

● Unsay imong himoon sa sunod higayong masayop ka?

[Blurb sa panid 226]

“Ang paghimo sa imong labing maayo lahi kay sa pagkahimong perpeksiyonista; ang una makataronganon ug ang ulahi dili.”​—Megan

[Kahon sa panid 228]

Pagkaperpeksiyonista ug Panaghigalaay

Dili ka ba makighigala tungod kay para nimo wala sila makaabot sa imong mga sukdanan? O naglikay ba nimo ang maayong mga tawo tungod kay taas ra kaayo kag sukdanan alang sa usa ka higala? Ang Bibliya nagtambag kanato: ‘Ayaw pagpalabi sa pagkamatarong, ni magpakita nga ikaw hilabihan ka maalamon. Nganong hatagan mo man ug kasakit ang imong kaugalingon?’ (Ecclesiastes 7:16) Ang perpeksiyonista makahatag ug kasakit sa iyang kaugalingon tungod kay ang mga tawo magpalayo man kaniya. Ganahan unta sila nga makig-uban kaniya kon dili pa siya perpeksiyonista. “Walay gustong makig-uban sa mga tawo nga mopabati kanila nga ubos sila,” miingon ang batan-ong si Amber, “ug nakaila akog mga perpeksiyonista nga nawad-ag suod nga mga higala tungod sa walay kapuslanang hinungdan.”

[Hulagway sa panid 229]

Ang pagtinguha nga mahimong hingpit sama ra ka kawang sa pagpaningkamot nga makalupad