Kapitulo 60

Pasiuna sa Himaya sa Gingharian ni Kristo

SI Jesus mihapit sa pagpadulong niya sa Cesarea ni Filipo, ug siya nagtudlo sa usa ka panon nga nag-apil sa iyang mga apostoles. Gipahayag niya kining makapakurat nga pahibalo kanila: “Sa pagkatinuod magaingon ako kaninyo nga sa mga nagabarog dinhi adunay pila kaninyo nga dili makatilaw sa kamatayon hangtod nga makita nila una ang Anak sa tawo nga moabot sa iyang gingharian.”

‘Unsay gipasabot ni Jesus?’ tinong nahibulong ang mga tinun-an. Mga usa ka semana sa ulahi, gidala ni Jesus si Pedro, Santiago, ug Juan uban kaniya, ug sila mitungas sa usa ka hataas nga bukid. Lagmit gabii kadto, sanglit nagduka man ang mga tinun-an. Samtang nag-ampo si Jesus, nausab ang iyang panagway sa ilang atubangan. Ang iyang nawong midan-ag sama sa adlaw, ug ang iyang mga sapot misulaw sama sa kahayag.

Dayon, ang duha ka pigura, nga nailhang “si Moises ug si Elias,” mitungha ug nakigsulti kang Jesus mahitungod sa iyang ‘paglakaw nga mahitabo sa Jerusalem.’ Ang paglakaw dayag nagtumong sa kamatayon ni Jesus ug sa mosunod nga pagkabanhaw. Sa ingon, ang maong kabildohay nagapamatuod nga ang iyang makauulawng kamatayon maoy butang dili pagalikayan, sumala sa gusto ni Pedro.

Nga bug-os nahigmata na karon, ang mga tinun-an nagbantay ug nagpatalinghog nga nahingangha. Bisan tuod kadto usa ka panan-awon, mipatim-aw kadto nga tinuod kaayo nga si Pedro miapil sa talan-awon, nga miingon: “Ginoo, maayo nga kami ania dinhi. Kon gusto nimo, magbuhat ako dinhig tulo ka payag, usa alang kanimo ug usa alang kang Moises ug usa alang kang Elias.”

Samtang si Pedro nagsulti, ang masulaw nga panganod nagtabon kanila, ug ang usa ka tingog gikan sa panganod nag-ingon: “Mao kini ang akong Anak, ang pinalangga, nga akong giuyonan; patalinghogi ninyo siya.” Sa pagkadungog sa tingog, ang mga tinun-an nanghapa. Apan si Jesus miingon: “Bangon ug ayaw kamo kalisang.” Sa ilang pagbangon, wala silay nakita gawas kang Jesus.

Sa ilang paglugsong sa bukid sa sunod nga adlaw, si Jesus mibaod: “Ayaw ninyo isugilon ang panan-awon kang bisan kinsa hangtod ang Anak sa tawo mabanhaw na gikan sa mga patay.” Ang pagtungha ni Elias sa panan-awon nagpatunghag pangutana sa mga hunahuna sa mga tinun-an. “Ngano man,” sila nangutana, “nga nagaingon ang mga eskriba nga si Elias kinahanglang unang moabot?”

“Si Elias miabot na,” miingon si Jesus, “ug sila wala makaila kaniya.” Hinunoa, si Jesus naghisgot kang Juan Bautista, kinsa nagtuman sa usa ka papel nga susama sa iya ni Elias. Giandam ni Juan ang dalan alang kang Kristo, sama sa gihimo ni Elias alang kang Eliseo.

Nakapalig-on kaayo ang maong panan-awon, alang kang Jesus ug sa mga tinun-an! Ang panan-awon, ingnon ta, maoy pasiuna sa himaya sa Gingharian ni Kristo. Sa pagkamatuod, ang mga tinun-an nakakita sa “Anak sa tawo nga miabot sa iyang gingharian,” sumala sa gisaad ni Jesus sa usa ka semana nga sayosayo. Tapos sa pagkamatay ni Jesus, si Pedro misulat mahitungod sa ilang pagkahimong ‘mga saksing-nakakita sa pagkahalangdon ni Kristo samtang didto sila uban kaniya sa balaang bukid.’

Ang mga Pariseo nangayo kang Jesus sa usa ka ilhanan sa pagpamatuod nga siya mao ang gisaad sa Kasulatan nga mahimong pinili sa Diyos nga Hari. Sila wala hatagi sa maong ilhanan. Sa laing bahin, ang suod nga mga tinun-an ni Jesus gitugotan sa pagkakita sa pagkausab sa dagway ni Jesus ingong pamatuod sa mga tagna bahin sa Gingharian. Sa ingon, sa ulahi misulat si Pedro: “Busa labi pang namatud-an ang matagnaong pulong.” Mateo 16:13, Mat 16:28–17:13; Marcos 9:1-13; Lucas 9:27-37; 2 Pedro 1:16-19.

▪ Una pa sila nakatilaw sa kamatayon, sa unsang paagi nakita sa pipila ang pag-abot ni Kristo sa iyang Gingharian?

▪ Sa panan-awon, unsay gipakigsulti ni Moises ug Elias kang Jesus?

▪ Nganong ang kining panan-awon makapalig-ong tabang sa mga tinun-an?