Kapitulo 13

Pagkat-on Gikan sa mga Pagsulay ni Jesus

HUMAN dayon sa iyang bawtismo, si Jesus gidala pinaagi sa espiritu sa Diyos ngadto sa kamingawan sa Judea. Daghan kaayong butang nga iyang hunahunaon, kay diha sa iyang bawtismo “ang langit nabukas,” aron siya makasabot sa langitnong mga butang. Matuod, daghan kaayong butang ang iyang palandongon!

Si Jesus migugol ug 40 ka adlaw ug 40 ka gabii didto sa kamingawan ug nagpusa sa maong panahon. Unya, sa dihang si Jesus gigutom kaayo, ang Yawa miduol aron sa pagsulay kaniya, nga nagaingon: “Kon ikaw anak sa Diyos, sugoa kining mga bato nga mahimong mga tinapay.” Apan nahibalo si Jesus nga sayop ang paggamit sa iyang milagrosong mga gahom aron sa pagtagbaw sa iyang kaugalingong mga tinguha. Busa siya wala magpasulay.

Apan wala moundang ang Yawa. Siya misulay ug laing paagi. Iyang gihagit si Jesus sa pag-ambak gikan sa padir sa templo aron luwason siya sa mga manulonda sa Diyos. Apan si Jesus wala magpasulay sa paghimo sa maong talagsaon nga pasundayag. Mikutlo gikan sa Kasulatan, gipakita ni Jesus nga daotan ang pagsulay sa Diyos niining paagiha.

Diha sa ikatulo nga pagsulay, gipakitaan siya sa Yawa sa tanang gingharian sa kalibotan diha sa usa ka milagrosong paagi ug miingon: “Kining tanan akong ihatag kanimo kon ikaw mohapa ug mosimba kanako.” Apan wala gihapon magpadaog sa pagsulay si Jesus sa pagbuhat ug daotan, mipili sa pagpabiling matinumanon sa Diyos.

May makat-onan kita gikan niining mga pagsulay ni Jesus. Sila nagpakita, pananglitan, nga ang Yawa dili maoy usa ka kalidad lamang sa doatan, sama sa gipangangkon sa uban, apan nga siya moy usa ka tinuod, dili-makitang persona. Ang pagsulay ni Jesus nagpakita usab nga ang tanang kagamhanan sa kalibotan iya sa Yawa. Kay sa unsang paagi ang pagtanyag sa Yawa kanila ngadto kang Jesus maoy usa ka tinuod nga pagsulay kon kini dili pa iya?

Ug hunahunaa kini: Ang Yawa miingon nga siya andam sa pagganti kang Jesus alang sa usa ka buhat sa pagsimba, ihatag pa gani kaniya ang tanang gingharian sa kalibotan. Ang Yawa mahimong mosulay sa pagtintal kanato sa samang paagi, tingali ibutang diha sa atong atubangan ang madanihong mga higayon nga mabatonan ang kalibotanong bahandi, gahom, o posisyon. Apan pagkamaalamon kanato kon atong sundon ang pananglitan ni Jesus pinaagi sa pagpabiling matinumanon sa Diyos sa bisan unsa nga pagsulay! Mateo 3:16; 4:1-11; Marcos 1:12, 13; Lucas 4:1-13.

▪ Unsa ang gipalandong ni Jesus sa panahon sa iyang 40 ka adlaw diha sa kamingawan?

▪ Sa unsang paagi naningkamot ang Yawa sa pagsulay kang Jesus?

▪ Unsay atong makat-onan gikan sa mga pagsulay ni Jesus?