Kapitulo 23

Dugang mga Milagro sa Capernaum

SA ADLAWNG Igpapahulay human sa pagtawag ni Jesus sa iyang unang upat ka disipulo—Pedro, Andres, Santiago, ug Juan—miadto silang tanan sa sinagoga sa Capernaum. Didto misugod si Jesus sa pagpanudlo, ug nahibulong ang mga tawo tungod kay nagtudlo sila kanila nga may kagahom ug dili ingong mga eskriba.

Niining maong adlaw nga Igpapahulay dihay usa ka tawong nayawaan. Unya, siya misinggit: “Unsay imong labot kanamo, Jesus nga Nazaretnon? Mianhi ba ikaw aron sa paglaglag kanamo? Nakaila ako kon kinsa ikaw, ang Balaang Usa sa Diyos.”

Ang yawa nga nagkontrolar sa tawo sa pagkatinuod mao ang usa sa mga manulonda ni Satanas. Gibadlong ang yawa, si Jesus miingon: “Hilom diha, ug gumula ka kaniya!”

Buweno, gipalit-ad ug gipalimbag ang tawo sa demonyo ug misinggit. Apan migula kini sa tawo nga wala makahimo kaniyag kadaot. Natingala ang tanan! “Unsa kini?” nangutana sila. “Uban sa kagahom mosugo siya bisan sa mahugawng mga espiritu, ug sila mosugot kaniya.” Kining balitaa mikaylap sa tanang kasikbit nga dapit.

Migawas sa sinagoga, si Jesus ug ang iyang mga disipulo miadto sa balay ni Simon, o Pedro. Didto ang ugangang-babaye ni Pedro may hataas kaayong hilanat. ‘Palihog tabangi siya,’ sila mihangyo. Busa giadto siya ni Jesus, gikuptan ang iyang kamot, ug gibangon siya. Dihadiha naayo siya ug misugod sa pagluto alang kanila!

Dayon, sa misalop ang adlaw, ang mga tawo nga gikan sa tanang dapit misugod sa pagpangabot sa balay ni Pedro nga nanagdala sa ilang mga masakiton. Sa ulahi ang mga tawo sa tibuok siyudad nanagtapok sa pultahan! Ug giayo ni Jesus ang tanan nilang mga masakiton, bisan unsa pay matang sa ilang mga sakit. Gipagula pa gani niya ang daotang espiritu sa mga giyawaan. Sa nanggawas sila, ang mga demonyo nga iyang gipagula misinggit: “Ikaw mao ang Anak sa Diyos.” Apan gibadlong sila ni Jesus ug wala niya tugoting mosulti tungod kay nasayod sila nga siya mao ang Kristo. Marcos 1:21-34; Lucas 4:31-41; Mateo 8:14-17.

▪ Unsay nahitabo didto sa sinagoga sa Adlawng Ipapahulay human nga gitawag ni Jesus ang iyang upat ka tinun-an?

▪ Diin miadto si Jesus sa migawas sa sinagoga, ug unsang milagro ang iyang gihimo didto?

▪ Unsay nahitabo niadtong gabhiona?