Sa miaging mga panid, atong gihisgotan ang mga batan-on nga ‘naghinumdom sa ilang Dakong Maglalalang sa mga adlaw sa ilang pagkabatan-on.’ (Eccl. 12:1) Gani, mga 33 porsiyento sa 3,197 nga mga payunir sa Georgia ang nag-edad ug 25 o mas ubos pa. Nganong daghang batan-on ang dasig sa pag-alagad?

Daghan ang posibleng hinungdan niini. Usa niana mao ang suod nga relasyon sa mga membro sa pamilya, nga komon sa mga taga-Georgia. Si Konstantine, nga dunay lima ka anak, miingon: “Nadani ko sa kamatuoran kay gibati nako nga si Jehova usa ka mahigugmaong Amahan. Dihang nahimo na kong amahan, gusto sab nako nga masuod ang akong mga anak kanako.”

Si Malkhazi ug ang iyang asawa, nga dunay tulo ka anak, naningkamot pag-ayo aron magpadayon ang kasuod sa ilang pamilya. Siya miingon: “Ginapangutana namo ang among mga anak kon unsay ilang ganahan kanamo ug sa ilang mga igsoon. Dayon amo nang hisgotan panahon sa among pamilyahanong pagsimba. Tungod ana, nakat-onan nila nga magpokus sa maayong kinaiya sa uban ug apresyahon sila.”

Aron matabangan ang mga ginikanan sa pagbansay sa ilang mga anak, ginaapil sa mga ansiyano ang mga bata sa mga kalihokan sa kongregasyon. Si Nestori, nga nabawtismohan sa edad nga 11, miingon: “Sukad adtong bata pa ko, gihatagan na kog mga asaynment sa mga ansiyano. Tungod ana, gibati gyod nako nga bahin ko sa kongregasyon.”

Nakatabang sab ang maayong panig-ingnan ug suporta sa mga ansiyano. Si Koba, usa sa mga igsoon ni Nestori, miingon: “Lahi ra ko sa akong mga igsoon, kay nagbinugoy ko niadtong tin-edyer pa ko. Usa ka batan-ong ansiyano, nga maayo kaayog panig-ingnan, ang naningkamot nga masabtan ko ug wala ko niya hukmi. Nakatabang kaayo siya nako nga mobalik kang Jehova.”

Karon, si Nestori ug Koba, kauban ang ilang igsoong babaye nga si Mari, nagboluntaryo sa layo nga teritoryo. Si  Koba miingon, “Malipayon na kaayo ang akong kinabuhi!”

Naningkamot sab ang sangang buhatan sa pagtabang sa mga ginikanan aron mabansay ang ilang mga anak pinaagi sa pag-apil sa mga batan-on sa mga proyekto sa organisasyon. Usa ka membro sa Komite sa Sangang Buhatan miingon: “Gipabilhan namo ang mga batan-on, maong ginatabangan namo sila nga makab-ot ang ilang espirituwal nga mga tumong.”

Ang pagboluntaryo ug ang pagpakig-uban kanunay sa hamtong nga mga brader ug sister nakadasig kaayo sa mga batan-on. Si Mamuka, nga nakaboluntaryo kauban ang mga international servant dihang gitukod ang Assembly Hall sa Tbilisi, miingon: “Ang maong proyekto naghatag nakog kahigayonan nga makakat-on sa uban. Gawas nga nahanas ko sa pagpanukod, mas milig-on ang akong espirituwalidad.”

Ang suod nga relasyon sa pamilya, pagdasig gikan sa mga ansiyano, ug ang maayong mga panig-ingnan dako kaayog natabang sa daghang batan-on sa Georgia. Gibati sa ilang mga ginikanan ang gibati ni apostol Juan, nga miingon: “Wala nay labaw nga hinungdan sa akong pagkamapasalamaton kay niining mga butanga, nga akong madungog nga ang akong mga anak nagpadayon sa paglakaw diha sa kamatuoran.”—3 Juan 4.

Niadtong 2013, ang Nagamandong Lawas mihatag ug direksiyon sa tanang sangang buhatan sa pagsusi kon kinahanglan bang maghubad ug mga publikasyon diha sa  uban pang pinulongan sa ilang teritoryo. Katuyoan niini nga mas daghan pang tawo ang masangyawan sa maayong balita.

Busa ang sangang buhatan sa Georgia nakadesisyon nga maghubad ug pipila ka publikasyon sa Svan ug Mingrelian, duha ka diyalekto nga halos parehas ra sa Georgian.

Ang mga payunir sa Svaneti misulat: “Ang mga tawo sa Svaneti ganahang makighisgot ug espirituwal nga mga butang ug dunay dakong pagtahod sa Bibliya. Bisan kadtong sa primero dili interesado sa atong mga publikasyon midawat ra sa mga publikasyon nga gihubad diha sa ilang pinulongan.”

Nalipay kaayo ang tanang igsoon nga nagsultig Mingrelian kay duna nay panagkatigom diha sa ilang pinulongan.  Si Giga, usa ka batan-ong payunir, miingon: “Karon, sayon na kaayo ang pagkomento sa mga tigom. Di na nako kinahanglang hubaron sa akong hunahuna ang akong ikomento.”

Si Zuri, nga ansiyano sa Mingrelian nga kongregasyon sa Tkaia, miingon: “Daghan nay nahitabo sa akong kinabuhi, makapalipay man o makapaguol. Pero wa gyod to sukad nakapahilak nako. Dihang gikanta na sa tigom ang mga awit sa Gingharian sa pinulongang Mingrelian, nakahilak gyod ang tanan, apil ko.”

Niadtong Sabado, Abril 6, 2013, dunay dili malimtang panghitabo sa kasaysayan sa mga Saksi sa Georgia. Si David Splane, nga membro sa Nagamandong Lawas, mihatag ug  dedication talk alang sa giremodel ug gipadak-an nga pasilidad sa sangang buhatan, Assembly Hall, ug sa bag-ong pasilidad alang sa Bible school. Daghan sa mga igsoon didto ang nagpagamit sa ilang mga balay aron puy-an sa 338 ka delegado gikan sa 24 ka nasod.

Pagkaugma, si Brader Splane mihatag ug espesyal nga pakigpulong. Kini gikonektar pinaagig audio/video ngadto sa mga kongregasyon sa tibuok nasod, ug 15,200 ang nakapahimulos niini. Kini ang kinadak-ang internasyonal nga panagkatigom nga nahitabo sukad sa Georgia. Makapatandog kaayo ang pagdinasigay ug ang kalipay nga nasinati sa mga igsoon. Usa ka batan-ong brader miingon, “Morag naa na mi sa Paraiso.”

Ang Bible School for Christian Couples, nga karon gitawag ug School for Kingdom Evangelizers, usa gayod ka dakong panalangin sa mga alagad ni Jehova sa Georgia. Sukad sa 2013, kapin na sa 200 ang nakaeskuyla niini. Giapresyar pag-ayo sa mga graduwado ang pagbansay nga ilang nadawat, maong andam silang moalagad bisan asa nga dunay panginahanglan.

Tungod sa mga paningkamot ug kaisog sa unang mga magsasangyaw sa Gingharian, ang maayong balita nakaabot sa tibuok nasod sa Georgia. Ang ilang tinuod nga gugma sa Diyos ug sa silingan, pagtuo, kaisog, ug inisyatibo gipanalanginan gayod ni Jehova.

Karon, kapin na sa 18,000 ang mga igsoon sa Georgia ug malipayon nilang gipadayon ang buluhaton nga gisugdan sa unang mga magsasangyaw. Ilang gitabangan ang mga tawo nga makasinati sa gahom sa Pulong sa Diyos.—Filip. 3:13; 4:13.