NIADTONG 1933, gihikay sa mga igsoon nga ipatokar sa usa ka estasyon sa radyo sa Jakarta ang Iningles nga rekording sa mga diskurso ni Brader Rutherford. Usa ka interesado ang naghubad sa ubang diskurso ngadto sa Dutch nga pinulongan ug nagsibya niini diha sa radyo. Tungod niini, daghan ang nainteres ug mas daghang literatura ang napahimutang.

Dihang gipatokar ang prangka nga diskurso ni Brader Rutherford nga “Epekto sa Balaang Tuig Diha sa Kalinaw ug Kauswagan,” ang mga lider sa Katoliko nahutdan nag pailob. * Pinaagi sa ilang mga bata-bata, ilang giakusar nga “nagbutangbutang, nanaway, ug nangdaot” si Brader De Schumaker, nga maoy nagsuplay sa mga rekording. Midepensa si Brader De Schumaker pero gipamulta siyag 25 guilders * ug gipabayad sa gastos sa korte. Ang maong husay gibalita sa tulo ka iladong mantalaan ug tungod niana mas daghan ang nakadungog bahin sa mga Saksi.

Sa Hulyo 15, 1935, miabot sa Jakarta ang Lightbearer, ang 16 metros nga lansa sa Watch Tower Society. Unom ka bulan kining mibiyahe gikan pa sa Sydney, Australia. Sakay niini ang pito ka madasigong payunir nga determinado sa pagsangyaw sa maayong balita sa tibuok Indonesia, Singapore, ug Malaysia.

 Kapig duha ka tuig nga tig-adtoan ang mga payunir sa dagko ug gagmayng pantalan sa Indonesia sakay sa Lightbearer, nga nakapanagtag ug daghan kaayong literatura sa Bibliya. Dihang hapit nang modunggo sa matag pantalan, “patokaron ang usa sa mga diskurso ni J. F. Rutherford, presidente kaniadto sa Watch Tower Society,” miingon si Jean Deschamp. “Hunahunaa ang reaksiyon sa mga taga-isla dihang makita ang dakong lansa nga nagpadulong sa ilang pantalan ug madungog ang kusog kaayong tingog nga naglanoglanog. Mora silag nakakitag flying saucer gikan sa laing planeta.”

Nasuko ang mga lider sa relihiyon sa madasigong pagsangyaw sa mga igsoon maong gisulsolan nila ang mga awtoridad nga did-an ang Lightbearer sa pag-adto sa mga isla sa Indonesia. Pagka-Disyembre 1937, ang Lightbearer mibalik sa Australia, nga nagbilin ug talagsaong rekord sa kakugi sa mga misyonaryo sa Indonesia.