Niadtong 1953, si Peter Vanderhaegen giasayn ingong tigdumala sa sirkito sa tibuok Indonesia—5,100 kilometros gikan sidlakan pakasadpan, ug 1,800 kilometros gikan amihanan pahabagatan. Daghan siyag makapanglimbawot nga mga eksperyensiya dihang gikobrehan kining lapad kaayong teritoryo.

Pagka-1954, si Brader Vanderhaegen mibiyahe sa sidlakang bahin sa Indonesia. Lainlain ang relihiyon niining dapita, sama sa isla sa Bali, nga kadaghanan Hindu; Lombok ug Sumbawa, nga kadaghanan Muslim; Flores, nga kadaghanan Katoliko; ug Sumba, Alor, ug Timor, nga sagad Protestante. Sakay sa karaang bangka, mosangyaw siya kadiyot sa mga isla nga iyang maagian padulong sa Kupang, ang kaulohan sa Timor. “Duha ka semana kong magsangyaw sa Timor,” miingon si Brader Vanderhaegen. “Bisag kusog ang ulan, natanyag nako ang tanang literatura nga akong dala, nakakuhag 34 ka subskripsiyon, ug  nakasugod ug daghang Bible study.” Gibalikan sa mga espesyal payunir ang mga interesado ug nakatukod ug kongregasyon sa Kupang. Gikan sa Kupang, ang maayong balita nasangyaw sa duol nga mga isla sa Rotè, Alor, Sumba, ug Flores.

Ang mga lider sa Protestante sa Kupang nasuko pag-ayo dihang nakita nila nga naminaw sa mga Saksi ni Jehova ang ilang mga membro. Usa ka edarang lider ang nagmando kang Thomas Tubulau—tigulang nga pungkol, unya panday ug metal—nga moundang nag tuon uban sa mga Saksi. Gibaharan sab siya sa lider nga mobanaw ang dugo kon dili siya moundang sa pagsulti sa uban sa iyang nakat-onan. Si Thomas maisogong mitubag: “Walay Kristohanon nga mosultig ingon ana. Dili na ko mosimba sa inyong simbahan.” Sa ulahi, nahimong madasigong magsasangyaw si Thomas, ug nahimong espesyal payunir ang iyang anak nga babaye.

Bisan pa niana, ang mga lider sa relihiyon sa Timor determinado nga mawala ang mga Saksi. Pagka-1961, napugos nila ang Department of Religious Affairs ug ang militar nga idili ang pagsangyaw sa balay ug balay. Busa, giusab sa mga igsoon ang ilang paagi sa pagsangyaw. Estoryahon nila ang mga tawo sa merkado ug atabay, mga mangingisda nga naghabwa sa ilang mga kuha, ug mga pamilya nga nagduaw sa sementeryo. Human sa usa ka bulan, dili na estrikto ang militar ug ilang gipahibalo diha sa radyo nga may kagawasan sa relihiyon sa Timor. Dihang miinsistir ang Department of Religious Affairs nga gidili pa gihapon ang pagsangyaw sa balay ug balay, mihangyo ang mga igsoon nga idokumento ang maong pahayag. Pero wala mosugot ang mga opisyal. Human niadto, wala na samoksamoka ang pagsangyaw.

Pagka-1962, nangabot sa Papua ang mga misyonaryong si Piet ug Nell de Jager ug Hans ug Susie van Vuure. Sila gisupak  sab sa mga lider sa Kakristiyanohan. Gikompronta sila sa tulo ka tag-as ug posisyon nga pastor ug giingnan nga sa laing lugar magsangyaw. Ang mga Saksi ni Jehova gidaot sa mga lider sa relihiyon diha sa mga wali sa simbahan, mantalaan, ug radyo nga mao kunoy hinungdan sa kagubot kontra sa gobyerno. Giulog-ulogan, gihadlok, ug gibayran sab nila ang mga membro nga nagpa-Bible study. Ug ilang gipresyur ang mga lider sa tribo nga supakon ang pagsangyaw.

Pero wala molampos ang ilang plano dihang ang mga misyonaryo gipadiskurso sa usa ka lider sa tribo sa iyang baryo. “Human patapoka sa lider ang mga tagabaryo, mihatag mi ni Piet ug duha ka mugbong pakigpulong, nga nagpatin-aw sa among buluhaton,” miingon si Hans. “Dayon ipasundayag sa among mga asawa kon unsaon pagbalaybalay, pagdawat sa imbitasyon kon padayonon, ug pagpaambit ug mubong mensahe sa Bibliya. Maayo ang sanong sa lider ug sa iyang mga sakop, ug gitugtan ming magpadayon sa buluhaton.”

Halos pareho ni sa misunod nga mga panghitabo. Wala kaayoy Muslim nga mosupak sa pagsangyaw; kasagaran, mga lider sa Kakristiyanohan ang magsupaksupak. Ug kini gihapon ang kahimtang karon.

Si Jesus nag-ingon sa iyang mga tinun-an: “Kamo pagataralon atubangan sa mga gobernador ug sa mga hari tungod kanako, ingong usa ka pagpamatuod kanila ug sa mga nasod.” (Mat. 10:18) Kadaghan kining nahitabo sa mga Saksi sa Indonesia.

Niadtong 1960, usa ka iladong teologo nga Dutch sa Jakarta ang nag-imprentag libro nga nag-ingong bakak nga mga Kristohanon ang mga Saksi ni Jehova. Gigamit sa daghang lider sa relihiyon ang maong libro kontra sa  mga Saksi. Pananglitan, ang lider sa simbahan sa usa ka lungsod misulat sa Department of Religious Affairs nga mga Saksi kuno ang hinungdan sa “kalibog sa mga membro sa simbahan.” Dihang gihatagag higayon sa mga opisyal ang mga igsoon nga modepensa, ilang gipresentar ang tinuod nga impormasyon ug nakahatag silag maayong pamatuod. Gitambagan sa usa ka opisyal sa relihiyon ang iyang mga kauban: “Ayaw ninyo hilabti ang mga Saksi ni Jehova. Ilang ginapukaw ang nangatulog nga Protestante.”

Pagka-1964, usa ka grupo sa mga lider sa Protestante sa Papua ang miapelar sa Parliamentary Committee on Religious and Social Affairs nga idili ang buluhaton sa mga  Saksi ni Jehova. Sa laing bahin, ang sangang buhatan mihangyo nga modepensa atubangan sa maong komite. “Halos usa ka oras ang among testimonya atubangan sa komite nga nagpatin-aw sa among edukasyonal nga buluhaton bahin sa Bibliya,” miingon si Tagor Hutasoit. “Usa ka supakerong politiko—nga Protestante—ang nag-akusar nga kami ang hinungdan sa away sa relihiyon sa Papua. Pero buotan ang kadaghang membro sa komite nga Muslim. Ila ming giingnan: ‘Ang Konstitusyon naggarantiyag kagawasan sa relihiyon, busa naa moy katungod sa pagsangyaw.’” Human niadto, usa ka taas ug ranggo nga opisyal sa Papua ang miingon: “Ang bag-ong gobyerno . . . naghatag ug kagawasan sa relihiyon, ug apil ana ang bag-ong mga relihiyon.”