SA Agosto 15-18, 1963, gatosan ka igsoon gikan sa lainlaing bahin sa Indonesia ug 122 gikan sa laing nasod ang nangadto sa siyudad sa Bandung, West Java. Nanambong sila sa “Walay Kataposang Maayong Balita” nga Asembliya, ang unang internasyonal nga asembliya sa Indonesia.

Daghang babag ang giatubang sa mga igsoon sa pagpangandam sa maong okasyon. Ang lokasyon katulo giusab tungod sa pagsaulog sa Independence Day sa nasod. Gipatas-an sa awtoridad ang plete ug 400 porsiyento tungod sa krisis sa ekonomiya. Pero ang ubang igsoon nangitag laing paagi sa pagbiyahe. Usa ka brader naglakaw ug unom ka adlaw aron makatambong. Setenta ka igsoon sa Sulawesi mibiyaheg lima ka adlaw sakay sa mga lansa nga way atop ug naghuot ang mga pasahero.

Sa kombensiyon, lipay kaayo ang mga delegadong taga-Indonesia nga mailaila ang mga igsoon gikan sa laing nasod, apil ang duha ka membro sa nagamandong lawas, si Frederick Franz ug Grant Suiter. Usa ka delegado miingon: “Malipayon kaayo ang mga igsoon; bibo sila ug pirmeng nagpahiyom.”

Kapin sa 750 ang nanambong, ug 34 ang nabawtismohan. “Tungod sa maong halandomong asembliya, daghang interesado ang nakadesisyon sa pag-alagad kang Jehova,” miingon si Ronald Jacka. “Nakatabang kini sa lokal nga mga igsoon nga magmadasigon sa buluhaton sa Diyos.”